መዝሙር 79

79 ¹አባታችን ሆይ፣ አሕዛብ ርስትህን ወረሩ፤ ቅዱስ ቤተ መቅደስህን አረከሱ፤ ኢየሩሳሌምንም ፍርስራሽ አደረጓት።

²የባሪያዎችህን ሬሳ ለሰማይ ወፎች ምግብ አድርገው ሰጡ፤ የቅዱሳንህን ሥጋ ለምድር አራዊት ሰጡ። ³ደማቸውን እንደ ውሃ በኢየሩሳሌም ዙሪያ ሁሉ አፈሰሱ፤ የሚቀብራቸውም አልነበረም። ⁴ለጎረቤቶቻችን መሳለቂያ ሆንን፤ በዙሪያችን ላሉት መዘበቻና መቀለጃ ሆንን።

⁵እስከ መቼ ነው፣ አባታችን? ለዘላለም ትቈጣለህን? ቅናትህስ እንደ እሳት ይቃጠላልን? ⁶ቍጣህን አንተን በማያውቁ አሕዛብ ላይ፣ ስምህንም በማይጠሩ መንግሥታት ላይ አፍስስ። ⁷ያዕቆብን በልተውታልና፤ መኖሪያውንም አውድመዋል። ⁸የቀድሞ አባቶቻችንን ኀጢአት አትቍጠርብን፤ እጅግ ዝቅ ተደርገናልና ርኅራኄህ ፈጥኖ ይቀበለን።

⁹አባታችን ሆይ፣ አንተ የምታድነን፣ ስለ ስምህ ክብር እርዳን፤ አድነን፤ ስለ ስምህም ብለህ ኀጢአታችንን ሸፍንልን። ¹⁰አሕዛብ፣ “አምላካቸው ወዴት አለ?” ለምን ይላሉ? የፈሰሰውን የባሪያዎችህን ደም በቀል እንደምትመልስ በዐይናችን ፊት በአሕዛብ መካከል ይታወቅ። ¹¹የእስረኛው ልቅሶ ወደ ፊትህ ይድረስ፤ በክንድህ ታላቅነት ለሞት የተፈረደባቸውን ጠብቅ።

¹²ለጎረቤቶቻችን በተሳለቁብህ ስላቅ ፈንታ፣ ሰባት እጥፍ አድርገህ በእቅፋቸው ብድራትን መልስላቸው፣ ጌታ አባታችን ሆይ። ¹³እኛም ሕዝብህ፣ የማሰማሪያህ በጎች፣ ለዘላለም እናመሰግንሃለን፤ ከትውልድ እስከ ትውልድ ምስጋናህን እንናገራለን።