Yelusaleme ebebisami
Nzembo ya Asafe.
Yerusalemi ezali na kobebisama, bibembe etikali kokundama te mpe ezali bilei ya bandeke, mpe baninga ya pene bazali kosepela. Libondeli esengi na Tata na biso bolimbisi mpe kozongisa mabe na pole moko, mpe ntina na yango ezali polele: bikolo bazali kotuna esika Nzambe na bango akendeki.
79 1Tata na biso, bikolo bikotaki na libula na Yo ; bisali tempelo na Yo ya bule mbindo ; bikomisi Yelusaleme etuluku ya mabanga.
2Bipesi ebembe ya basaleli na Yo lokola bilei na bandeke ya likolo, mosuni ya bato na Yo ya sembo na banyama ya mokili. 3Bisopi makila na bango lokola mai zingazinga na Yelusaleme, mpe moto moko te azalaki mpo na kokunda bango. 4Tokomi eloko ya kotiola epai ya bazalani na biso, tosekisami mpe totiolami na bato oyo bazingi biso.
5Tii tango nini, Tata na biso ? Okozala na nkanda libela ? Zuwa na Yo ekopela lokola moto ? 6Sopa nkanda na Yo likolo ya bikolo oyo biyebi Yo te, mpe likolo ya mabokonzi oyo mabelelaka Kombo na Yo te. 7Pamba te bilei Yakobo mpe bibebisi mokili na ye. 8Kotia te masumu ya bankoko na biso likolo na biso ; tika ete mawa na Yo ya bolingo eya noki kokutana na biso, pamba te tokitisami penza.
9Salisa biso, Tata na biso oyo obikisaka biso, mpo na nkembo ya Kombo na Yo ; lokolisa biso mpe limbisa masumu na biso mpo na Kombo na Yo. 10Mpo na nini bikolo biloba : « Nzambe na bango azali wapi ? » Na miso na biso, tika ete eyebana kati na bikolo ete Yo ozongisaka bosembo mpo na makila ya basaleli na Yo oyo masopami. 11Tika ete kolela ya moto oyo akangami ekoma liboso na Yo ; na bonene ya loboko na Yo, bikisa bato oyo basambisami na kufa.
12Zongisela bazalani na biso mbala sambo na mabolongo na bango mpo na kotiola oyo batiolaki Yo, Tata Mokonzi. 13Bongo biso, bato na Yo, mpate ya elanga na Yo, tokotonda Yo matondi libela ; uta libota tii libota tokosakola masanzoli na Yo.
