സങ്കീർത്തനങ്ങൾ 79 FHB Father's Heart Bible™

79 ¹ഞങ്ങളുടെ പിതാവേ, ജനതകൾ അങ്ങയുടെ അവകാശഭൂമിയെ ആക്രമിച്ചിരിക്കുന്നു; അങ്ങയുടെ വിശുദ്ധമന്ദിരത്തെ അവർ അശുദ്ധമാക്കിയിരിക്കുന്നു; ജെറുശലേമിനെ അവർ നാശക്കൂമ്പാരമാക്കിയിരിക്കുന്നു.

²അങ്ങയുടെ ദാസന്മാരുടെ ശവങ്ങളെ ആകാശത്തിലെ പക്ഷികൾക്കും അങ്ങയുടെ വിശ്വസ്തരുടെ മാംസത്തെ ഭൂമിയിലെ മൃഗങ്ങൾക്കും ആഹാരമായി അവർ നൽകിയിരിക്കുന്നു. ³ജെറുശലേമിനു ചുറ്റിലുമെല്ലാം അവരുടെ രക്തത്തെ വെള്ളംപോലെ അവർ ചൊരിഞ്ഞു; അവരെ അടക്കം ചെയ്യാൻ ആരും ഉണ്ടായിരുന്നില്ല. ⁴ഞങ്ങൾ ഞങ്ങളുടെ അയൽക്കാർക്ക് നിന്ദാവിഷയമായിത്തീർന്നിരിക്കുന്നു, ഞങ്ങൾക്കു ചുറ്റുമുള്ളവരാൽ പരിഹസിക്കപ്പെട്ടും അപഹസിക്കപ്പെട്ടും.

⁵എത്രത്തോളം, ഞങ്ങളുടെ പിതാവേ? അങ്ങ് എന്നേക്കും കോപിച്ചിരിക്കുമോ? അങ്ങയുടെ തീക്ഷ്ണത തീപോലെ ജ്വലിക്കുമോ? ⁶അങ്ങയെ അറിയാത്ത ജനതകളുടെമേലും അങ്ങയുടെ നാമത്തെ വിളിച്ചപേക്ഷിക്കാത്ത രാജ്യങ്ങളുടെമേലും അങ്ങയുടെ ക്രോധത്തെ ചൊരിയണമേ. ⁷എന്തെന്നാൽ അവർ യാക്കോബിനെ വിഴുങ്ങിക്കളഞ്ഞു, അവന്റെ വാസഭൂമിയെ ശൂന്യമാക്കിയിരിക്കുന്നു. ⁸ഞങ്ങളുടെ പൂർവികരുടെ പാപങ്ങളെ ഞങ്ങൾക്കെതിരായി ഓർക്കരുതേ; അങ്ങയുടെ ആർദ്രകരുണ വേഗം ഞങ്ങളെ എതിരേൽക്കാൻ വരട്ടെ, എന്തെന്നാൽ ഞങ്ങൾ ഏറ്റവും താണുപോയിരിക്കുന്നു.

⁹ഞങ്ങളെ സഹായിക്കണമേ, ഞങ്ങളുടെ രക്ഷകനായ പിതാവേ, അങ്ങയുടെ നാമമഹത്ത്വത്തിനായി; ഞങ്ങളെ വിടുവിക്കണമേ, അങ്ങയുടെ നാമംനിമിത്തം ഞങ്ങളുടെ പാപങ്ങളെ മറയ്ക്കുകയും ചെയ്യണമേ. ¹⁰“അവരുടെ ദൈവം എവിടെ?” എന്ന് ജനതകൾ എന്തിനു പറയണം? ചൊരിയപ്പെട്ട അങ്ങയുടെ ദാസന്മാരുടെ രക്തത്തിന് അങ്ങ് പ്രതികാരം ചെയ്യുന്നുവെന്ന് ഞങ്ങളുടെ കൺമുന്നിൽ ജനതകളുടെ ഇടയിൽ അറിയപ്പെടട്ടെ. ¹¹തടവുകാരന്റെ ഞരക്കം അങ്ങയുടെ സന്നിധിയിൽ എത്തട്ടെ; അങ്ങയുടെ ഭുജമാഹാത്മ്യത്താൽ മരണത്തിനു വിധിക്കപ്പെട്ടവരെ കാത്തുരക്ഷിക്കണമേ.

¹²പരമാധിപനായ പിതാവേ, അവർ അങ്ങയെ നിന്ദിച്ച നിന്ദയ്ക്ക് ഞങ്ങളുടെ അയൽക്കാർക്ക് അവരുടെ മടിയിലേക്ക് ഏഴിരട്ടിയായി പകരംനൽകണമേ. ¹³അപ്പോൾ അങ്ങയുടെ ജനവും അങ്ങയുടെ മേച്ചിൽപ്പുറത്തെ ആടുകളുമായ ഞങ്ങൾ എന്നേക്കും അങ്ങേക്കു സ്തോത്രം ചെയ്യും; തലമുറതലമുറയായി ഞങ്ങൾ അങ്ങയുടെ സ്തുതിയെ പ്രഘോഷിക്കും.