Yelusalemi me kuma kisika ya kumwangana
Nkunga ya Asafi.
Yelusalemi me kuma kisika ya kumwangana, bamvumbi kondwa kukunda mpe ba me pesa yawu na bandeke, mpe bamfinangani ke sakinina yawu. Lusambulu ke lomba Tata ya beto kulemvokila masumu mpe kuvutula mbela na ntangu mosi, mpe dibanza ya yawu kele na meso ya bantu nyonso: bayinsi ke yufula wapi Nzambi ya bawu me kwenda.
79 1Tata ya beto, bantu ya bayinsi me kwiza na mvwilu ya nge; bawu me defisa Yinzo ya nge ya longo; bawu me kitula Yelusalemi kisika ya kumwangana.
2Bawu me pesa bamvumbi ya bisadi ya nge bonso madya na bandeke ya zulu, musuni ya bantu ya nge ya kukwikama na bibulu ya ntoto. 3Bawu me mwangisa menga ya bawu bonso maza na bisika nyonso yina me zungidila Yelusalemi, mpe muntu mosi vwandaka ve samu na kukunda bawu. 4Beto me kuma kima ya kuseka na meso ya bamfinangani ya beto, bayina kele pene-pene na beto ke seka mpe ke finga beto.
5Tii ntangu yinki, Tata ya beto? Nge ke vwanda na nkele tii seko? Kimbanda ya nge ke pela bonso tiya? 6Mwangisa nkele ya nge na zulu ya bantu ya bayinsi yina ke zaba nge ve, mpe na zulu ya bimfumu yina ke bokila Nkumbu ya nge ve. 7Samu ti bawu me dya Yakobi mpe me bebisa yinsi ya yandi. 8Kubambuka ve moyo na masumu ya bankooko ya beto samu na kupesa beto kitumbu; bika ti kyadi ya nge ya mawete kwiza na nswalu samu na kubwabana na beto, samu ti beto me kuluka mingi.
9Sadisa beto, Tata ya beto yina ke vuukisaka beto, samu na nkembo ya Nkumbu ya nge; kuula beto mpe lemvokila masumu ya beto samu na Nkumbu ya nge. 10Samu na yinki bantu ya bayinsi fwana kutuba: «Nzambi ya bawu kele wapi?» Na meso ya beto, bika ti yawu zabana na kati ya bantu ya bayinsi ti nge ke futisa menga ya bisadi ya nge yina ba me mwangisa. 11Bika ti bidilu ya muntu ya boloko kwiza na mantwala ya nge; na bunene ya diboko ya nge, keba bantu yina ba me zengila kitumbu ya lufwa.
12Vutula na bamfinangani ya beto mbala nsambwadi na matolo ya bawu samu na kusafula yina bawu safulaka nge, E Tata, Mfumu. 13Na yina, beto, bantu ya nge, mameme ya bilanga ya nge, beto ke tonda nge seko; katuka mbandu na mbandu, beto ke samuna lukumu ya nge.