Leilubüa Kibü Jerusalem
Asapheibü nyensang che.
Jerusalem leilubü yeian danjung kia, haibü mang shuong tephenbü akiko au shuong la shausiyung shanga kukei, hoba lepbü shuongei kho maang olinko hapda. Welauei seneibü Bou to shabü apbu la hoba haoeneibü sii shanga ngühmai kümla, ngüh longkoei ditda, hoba haoei lenbü kho pendouei ditlabü: phangshuongei, “Haoeneibü Mühghaü laeto ki?” dogo phekda.
79 1Seneibü Abou, phangshuongei kaibü phet khüto lotkei; haoenei kaibü saopobü chem shatikei; haoenei Jerusalem leilubü yeitikei.
2Haoenei kaibü khangenbü shuongeibü haibü mang müh kabü au la shausiyung shanga kukei, kaibü ikjaibü shuongeibü phe kaodak kabü meisiau la kukei. 3Haoeneibü sii dei tegü Jerusalem kaijembo jonkei, hoba haoen khünbou ao akitei. 4Künei küneibü lepbü shuong to himou la yeikei, kün kaijembo kibü shuongei nyikuko hoba louyokei.
5Lalok sühko, seneibü Abou? Nyi ponpen khauanglabü lo? Kaibü nyekto shatbü wan tegü juoklabü lo? 6Kaibü maangshat ka angebü phangshuong thüka, hoba kaibü nyen to angabü sangle shuong thüka jonashi. 7Aishanga haoenei Jakob suian apbei, hoba haoeibü kaodak leilukei. 8Küneibü nyusiboueibü shabü kün khulimbo tedamenyo; kaibü üeisanou maibü tongde kün jungto loutishi, aishanga kün aeibou naklepkei.
9Kün to thuikaishi, kün khümenbou seneibü Bou, kaibü nyen soneikangbü shanga; kün khümenashi hoba küneibü shabü apbushi, kaibü nyen shanga. 10Aila phangshuongei, “Haoeneibü Mühghaü laeto ki?” dogo laulabü? Küneibü nyek thedanga, kaibü khangenbü shuongeibü shedbü sii shanga nyi ngühmai kümlabü dogo phangshuong yoa ho ngeashi. 11Khühbü müteibü wiyobü kaibü thedanga loutishi; kaibü hau yaangbüei, haila shedbü kubü shuong langkei püetshi.
12Küneibü lepbü shuong to, haoenei ka to aweasüngbü himou shanga, haoeneibü khüto nyetnei kungaishi, O Thükenbou Abou. 13Kheijinei künei, kaibü mütli, kaibü lamshaushang sanshuong, ponpen ka la nyensang kulabü; meten ka meten sühko künei kaibü nyensang lenlabü.
