詩篇 79

79 ¹ 我哋嘅父啊,列國侵佔咗你嘅產業; 佢哋污穢咗你嘅聖殿; 佢哋使耶路撒冷變成廢墟。

² 佢哋將你僕人嘅屍體, 畀天空嘅飛鳥做食物,將你忠信之人嘅肉,畀地上嘅走獸做食物。 ³ 佢哋將佢哋嘅血好似水咁傾倒 喺耶路撒冷四圍, 卻冇人埋葬佢哋。 ⁴ 我哋成為鄰舍羞辱嘅對象, 受到周圍嘅人嗤笑同譏諷。

⁵ 我哋嘅父啊,重要幾耐呢?你要永遠發怒咩? 你嘅妒忿要好似火咁燒咩? ⁶ 求你將你嘅烈怒傾倒喺列國, 就係唔認識你嘅,同埋列邦, 就係唔求告你名嘅。 ⁷ 因為佢哋吞滅咗雅各, 又使佢嘅家園荒廢。 ⁸ 求你唔好追討 我哋祖先嘅罪,願你溫柔嘅憐憫快啲 嚟迎接我哋,因為我哋已經卑微到極。

⁹ 拯救我哋嘅父啊,求你為咗你名嘅榮耀幫助我哋; 求你拯救我哋,遮蓋我哋嘅罪, 為咗你嘅名。 ¹⁰ 點解要畀列國講:「佢哋嘅神喺邊度呢?」 求你喺我哋眼前,喺列國中間顯明, 你要為你僕人所流嘅血伸冤。 ¹¹ 願被囚之人嘅呻吟達到你面前; 求你用你大能嘅膀臂,保全嗰啲被定死罪嘅人。

¹² 求你報應我哋嘅鄰舍, 佢哋點樣羞辱你,求你就七倍報應喺佢哋懷中,主宰嘅父啊。 ¹³ 咁樣,我哋就係你嘅子民,係你草場嘅羊, 要永遠感謝你; 我哋要世世代代 傳揚對你嘅讚美。