Jerusalem ne mi Karotwek
Tienwogitap Asap.
Kagoek Jerusalem karotwek, muuswek che ma kiamde ak kiigoochi toriitik koek amdit, ak boiboiyen piigap kokwa. Soomei saaet Kwandanyo konyoiywe tengek ak koroong'chi nereeget puunik eng' sait agenge, ak ng'olyoondoni ko po tuiyet ne oo: teebei pororyosyek kole, “Mi ano Kamuktaindennywa?”
79 1Kwandanyo, kagochut pororyosyek poroteng'ung'; kagong'em Hekalung'ung' ne tiliil; kagoyai Jerusalem koek karotwek.
2Kagogoochi muuswegap otwogiguk koek amditap toriitik che po parak, ak panyeegap piiguk che po iman tyong'ik che po ng'wony. 3Kagotumda korotiikwak ko uu peek eng' komoswegap Jerusalem tugul, ak ma mi chii ne tupei icheek. 4Kageek chotisyet eng' piigap kokwennyo, ichombilech ak isasech icheek che koyomech.
5Agoi ano, Kwandanyo? Inereech agoi koigeny? Ingobeel ng'etkondang'ung' ko uu maat? 6Iroong'chi nereegeguk pororyosyek che ma ingen inyee, ak laitornatosyek che ma kuure kaineng'ung'. 7Amu kagoam Jakobo ak kagoyai emennyi koek karaatya. 8Amat ibwaat agobo echeek tengekwogigap kwanisyekyok; ingochir rireenosyeguk che po chamyet konyoonech, amu kagiming'inech miising'.
9Itoretech, Kwandanyo ne sarwech, agobo toroornatetap kaineng'ung'; isarwech ak itindiny tengekwogikyok agobo kaineng'ung'. 10Amu nee si komwa pororyosyek kole, “Mi ano Kamuktaindennywa?” Eng' konyekyok, ingonaigei eng' pororyosyek kole iyaei mugetuut agobo korotiigap otwogiguk che kagitumda. 11Ingonyo tigenoigap piik che ratotiin eng' taing'ung'; eng' ooindap eung'ung', iriip piik che kagirwookyi meet.
12Igeerchi piigap kokwennyo konyil tisap eng' kwenunnywa agobo chotisyet ne kichotin, ee Kiptaiyat Kwanda. 13Nguno acheek, piiguk, keechiirek che po kiyageng'ung', kigoochin kongoi agoi koigeny; eng' ibinda agoi ibinda kimwaei kalasuneng'ung'.