Kashāngna Shimli Vākhavai Apong Maloshaprarmana
Laa kasābingwui akhavāli. Corahwui naomayarabingwui laa akha.
Kaphā-mashā saikorali hāngkhami ngahān akha: khipānakhala ashang kasa akhali kathi eina ngatangkhuishap khavai lanpāi mazangmara. Khangathuma kala khangapāibing kathā chithāda athumwui lanpāi malaihaira. Laa kasāwui kashit chiya tamrarda lei — ithumwui Avāna ali awui thāli khuira.
49 1Hi nganālu, miyur nathum saikora; okathuili leiping nathum saikora, nganākhuilu, 2khanempamli khalei eina kajuipamli khalei, kashānga eina kachāma saikora. 3Ikhamorna thangkhamei tui matuira; iwuklungwui khamachukna theishingkakhui rāra. 4Ikhanā chānsam ngareira; lyre eina iwui pakhon phāshokra. 5Makhayā atam rā tharan, iphei phatkhavai kasābingwui makhayāna ili kuinam tharan, khisāda ina khangacheerakhala, 6athumwui lanli shitkasangbing, kala athumwui kashāng khahakwui vang langkasobing? 7Kachangkhat eina mi khipānakha achināli mahuishaprarmana, lah awui vang ithumwui Avāli ngatangman mamishaprarmana, 8mirinwui ngatangman chi aman kahakva̱na; aman chi khipālikha mashaipaimara, 9chithākha ana katang makhavai ringchingda, chikhur khipālikha matheimara. 10Kaja thangkhamabing tangda thi kaji ana thei; mangkhama̱ eina matheithangkhamei ngarumda shimānserhaora, kala athumwui lan kateibingli horhaira. 11Athumna ngalei chi themlākwui ming eina phoklala, athumwui chikhur athumwui shim katang makhavai, thot saikorali athumwui pamkhavaina. 12Mikumo chi awui tekhamatei leilala, maleichingmara; ana shimāna sāyur kathāna. 13Hi mangkhama̱ ning horkasang khalei mibingwui apong, kala athumwui thili athumwui tui khamayābingwuina.
14Yao thāda athum chikhurwui vang kapangkakhui, kala kathina athumli homra. Ngathor wuklung khangatarbingna athumli mungra; athumwui kajuipam shim eina katāva̱li, athumwui phasā chikhurli parhaira. 15Kha ithumwui Avāna Kathewui ramwui pangshap eina iwui manglā huimira; ana kachangkhata ili awui thāli khuira. a a v15 Kashāngabingna kathiwui eina lam maloshaprarmana; chithālala laa kasāpana ithumwui Avā khalattana ali chikhurwui eina huikhuira kala awui mangāli khuira da shitkasanga.
16Kachikathā mi akha kashāng tharan, awui shimwui tekhamatei mataisang tharan, mangacheealu, 17Kaja ana thi tharan khikhala maphungmara; awui tekhamatei ali mashurmara. 18A ringlakha akhalatta sokhami da shānkhuilala, nana nakhalattawui vang khamathā sāakha mibingna nali masotmira, 19ana avā ngarāwui thotli vāra, athumna kahor matheiluilakmara. 20Mikumo china, awui tekhamatei leilala, bhap matāa, shimānra sāyur kathāna.
