Richès pa ka achte chemen pou ou tounen lakay

Pou chèf koral la. Se yon sòm pitit Kore yo.

Yon devinèt pou rich kou pòv: pesonn pa rich ase pou l rachte frè l anba lanmò. Moun entelijan ak moun sòt kite lajan yo dèyè menm jan an. Espwa salmis la yon lòt kote — Papa nou ap pran l mete bò kote l.

Chapit 49.

Koute sa, nou tout pèp yo; pare zòrèy, nou tout ki rete sou latè, piti kou gran, rich kou pòv. Bouch mwen pral di pawòl sajès; sa kè m'ap kalkile a pral bay konprann. M'ap panche zòrèy mwen sou yon pwovèb; avèk gita a m'ap devwale devinèt mwen an. Poukisa pou m' ta pè lè move jou yo rive, lè mechanste moun k'ap chache fè m' tonbe yo vlope m', moun ki mete konfyans yo nan richès yo epi k'ap vante tèt yo pou gwo byen yo? Sa se vre, pèsonn pa ka delivre frè l' ni peye Papa nou yon ranson pou li, ranson pou yon lavi koute chè; pa gen pèman ki janm ase, pou li ta viv pou tout tan san l' pa janm wè kavo a. Paske li wè menm moun ki gen sajès yo mouri; moun sòt ak moun egare yo peri menm jan, epi yo kite richès yo pou lòt moun. Kavo yo se kay yo pou tout tan, kote yo rete pou tout jenerasyon, atout yo te bay tè yo non pa yo. Moun, malgre tout bèl pouvwa li, p'ap dire; li tankou bèt ki peri yo. Se konsa chemen moun ki gen konfyans sòt yo ye, ak chemen moun k'ap vin apre yo ki dakò ak pawòl yo.

Tankou mouton yo sòti pou kavo a, epi lanmò pral kondui yo. Moun ki dwat yo pral gouvènen sou yo nan maten; kò yo pral pouri nan kavo a, lwen bèl kay yo. Men Papa nou pral delivre lavi mwen anba pouvwa kavo a; se vre l'ap pran m' avèk li. ^a

Pa pè lè yon moun vin rich, lè bèlte kay li ap ogmante, paske li p'ap pote anyen ale lè l' mouri; bèlte l' p'ap desann swiv li. Atout pandan l' vivan li konte tèt li beni—epi moun fè lwanj ou lè ou fè byen pou tèt ou, l'ap al jwenn jenerasyon zansèt li yo, ki p'ap janm wè limyè a ankò. Moun, malgre tout bèl pouvwa li, ki pa gen konprann, li tankou bèt ki peri yo.