Saamu 49

49 ¹Ẹ gbọ́ èyí, gbogbo ẹ̀yin ènìyàn; ẹ fetísílẹ̀, gbogbo ẹ̀yin tí ń gbé ní ayé, ²àti ẹni rẹlẹ̀ àti ẹni gíga, ọlọ́rọ̀ àti tálákà bákan náà. ³Ẹnu mi yóò sọ ọgbọ́n; ìrònú ọkàn mi yóò mú òye wá. ⁴Èmi yóò dẹtí mi sí òwe; pẹ̀lú háàpù èmi yóò ṣí àlọ́ mi payá. ⁵Èéṣe tí èmi yóò fi bẹ̀rù nígbà tí ọjọ́ búburú bá dé, nígbà tí ìwà ìkà àwọn tí ń fẹ́ gbé mi ṣubú bá yí mi ká, ⁶àwọn tí ń gbẹ́kẹ̀lé ọrọ̀ wọn tí wọ́n sì ń ṣe ìfọ́nnu ọ̀pọ̀lọpọ̀ ọrọ̀ wọn? ⁷Nítòótọ́, kò sí ẹnikẹ́ni tí ó lè ra arákùnrin rẹ̀ padà tàbí kí ó san owó ìràpadà fún Baba wa nítorí rẹ̀, ⁸owó ìràpadà ẹ̀mí wọ́n gidigidi; kò sí owó tí yóò tó rí, ⁹kí ó lè wà láàyè títí láé kí ó má sì rí isà òkú láé. ¹⁰Nítorí ó rí i pé àní àwọn ọlọ́gbọ́n ń kú; aṣiwèrè àti òpè bákan náà ń ṣègbé tí wọ́n sì ń fi ọrọ̀ wọn sílẹ̀ fún àwọn ẹlòmíràn. ¹¹Isà òkú wọn ni ilé wọn títí láé, ibùgbé wọn fún gbogbo ìran, bí ó tilẹ̀ jẹ́ pé wọ́n ti fi orúkọ ara wọn sọ ilẹ̀. ¹²Ènìyàn, bí ó tilẹ̀ ní ọlá, kì í dúró pẹ́; ó dàbí ẹranko tí ń ṣègbé. ¹³Èyí ni ọ̀nà àwọn tí ó ní ìgbẹ́kẹ̀lé òmùgọ̀, àti ti àwọn tí ń tẹ̀lé wọn tí wọ́n fohùn sí ọ̀rọ̀ wọn.

¹⁴Bí àgùntàn ni a ti kádàrá wọn fún isà òkú, ikú yóò sì ṣe olùṣọ́ wọn. Àwọn olódodo yóò jọba lé wọn lórí ní òwúrọ̀; ara wọn yóò díbàjẹ́ nínú isà òkú, jìnnà sí ilé gíga wọn. ¹⁵Ṣùgbọ́n Baba wa yóò ra ẹ̀mí mi padà kúrò lọ́wọ́ agbára isà òkú; dájúdájú yóò mú mi sọ́dọ̀ ara rẹ̀. ^a a v15 Yàtọ̀ sí àwọn ọlọ́rọ̀ tí kò lè fi owó ra ara wọn kúrò nínú ikú, ẹni tí ó kọ Saamu náà gbẹ́kẹ̀lé pé Baba wa fúnra rẹ̀ yóò gbà á là kúrò nínú isà òkú, yóò sì mú un wá sí iwájú rẹ̀.

¹⁶Má bẹ̀rù nígbà tí ẹnìkan bá di ọlọ́rọ̀, nígbà tí ògo ilé rẹ̀ bá ń pọ̀ sí i, ¹⁷nítorí kì yóò mú ohunkóhun lọ nígbà tí ó bá kú; ògo rẹ̀ kì yóò bá a sọ̀kalẹ̀. ¹⁸Bí ó tilẹ̀ jẹ́ pé nígbà tí ó wà láàyè ó ka ara rẹ̀ sí ẹni ìbùkún—àwọn ènìyàn a sì máa yìn ọ́ nígbà tí o bá ṣe rere fún ara rẹ, ¹⁹yóò darapọ̀ mọ́ ìran àwọn baba rẹ̀, àwọn tí kì yóò tún rí ìmọ́lẹ̀ mọ́ láé. ²⁰Ènìyàn, bí ó tilẹ̀ ní ọlá, tí kò ní òye, ó dàbí ẹranko tí ń ṣègbé.