Dhun-sampoti pora ghor laga rasta kinibo napare

Gana porichalok karne. Korah laga putro khan laga ekta bhajan.

Dhoni aru dukhia dunu nimite ekta dhanda: kunbi itiman dhoni nai je tai laga bhai ke mrityu pora kini kene bachai dibo pare. Gyani aru murkh dunu eke nisena tai khan laga poisa piche te chari jai. Gana likha manuh laga asha dusra jagate ase — amar Pitri taike nijor logote loi jabo.

Adhyay 49.

Eitu huni bi, tumi sob manuh khan; prithibi te thaka sob manuh khan, dhyan di bi, chutu aru dangor dunu, dhuni aru gorib, sob eke nisena. Moi laga mukh pora gyaan laga kotha kobo; moi laga mon laga chinta pora bujhibo laga gyaan anibo. Moi laga kaan ekta hikisa kotha phale ghura bo; bina baja logot moi laga lukai thaka kotha khuli dibo. Biya din khan ahhile, moi ke giri bole kora khan laga paap pora moi ke gheri loile, moi kele bhoy koribo? kun manuh khan tarkhan laga dhun te biswas kore aru tarkhan laga dangor sampoti karne phutani kore? Hosa bhi kun bhi tar laga bhai ke udhar koribo napare, nahole tar karne amar Pitri ke mukti laga daam dibo napare, ekta jivon laga mukti daam bisi dangor ase; kitia bhi diya daam pura nohoi, tai hodai jinda thaki bole aru kobor kitia bhi nadikhibo. Kilemane gyaani manuh khan bhi mori jai eitu tai dikhe; murkho aru buddhi nathaka manuh, sob eke nisena khotom hoi jai, aru tarkhan laga dhun dusra khan ke chari di jai. Tarkhan nijor nam pora mati khan ke nam rakhise hoilebi, tarkhan laga kobor khan he hodai tarkhan laga ghor, sob yug karne tarkhan laga thaki bole jaga ase. Manuh, tar sob mohima thakile bhi, hodai nathake; tai khotom hoi jua janwar khan nisena ase. Eitu murkho bharosa thaka khan laga rasta ase, aru tarkhan laga pichete thaka, tarkhan laga kotha ke bhal mani loa khan laga rasta ase.

Mer nisena tarkhan ke kobor karne thik kori rakhise, aru mrityu he tarkhan laga rokhiya hobo; phojur te dharmik manuh khan tarkhan uporte raj koribo; tarkhan laga gaw kobor te khotom hoi jabo, tarkhan laga dangor ghor khan pora bisi dur te. Kintu amar Pitri pora kobor laga takot pora moi laga jivon ke udhar koribo; Tai pora hosa bhi moi ke Tar nijor logot te loi lobo. ^a

Kunba manuh dhuni hoile bhoy nakoribi, tar laga ghor laga mohima bari jaile bhi, kilemane tai eku bhi loi najabo jitia tai mori jabo; tar laga mohima tar logot niche najabo. Tai jinda thaka homoi te tai nijor ke asirbaad pua bhabe hoilebi—aru tumi nijor karne bhal korile manuh khan tumi ke prosansa kore, tai tar laga baba khan laga yug logot te mili jabo, jun khan kitia bhi aru puhor nadikhibo. Manuh, tar sob mohima thakile bhi, kun nabuje, khotom hoi jua janwar khan nisena ase.