Pitri pora Bisar-Sabha ke Matise
Asaph laga ekta geet.
Amar Pitri adalot boha bole matai aru nijor laga manuh khan laga biruddh te gawahi dei. Tai laga dukh to kom bolidan karne nohoi — sob jinda janwar to tai laga ase — kintu etu aradhana nimite ase, jun manuh khan tai laga niyom-bandhan ke mukh pora koi aru chor khan logote dorai. Tai dhanyabad aru ekta bodli kora rasta bisare.
50 1Mohan Ekjon, amar Pitri, koi dise; suruj utha pora nami ja tak Tai prithibi ke matise. 2Sion pora, sundorta te purna, amar Pitri ujala hoi ase. 3Amar Pitri ahhi ase aru chup-chap nathakibo; Tar usor te jui pora grohon kori ase, aru Tar age-pache ekta dangor andhi ase. 4Tai upor te thaka sorgo khan ke matise, aru prithibi ke, Tai laga manuh khan ke bisar koribole.
5“Moi laga biswasi khan ke Moi usor te joma koribi, kun pora bolidan pora Moi logot vachan korise.”
6Aru sorgo khan pora Tar dharmikota prochar kori ase, kilemane amar Pitri nijor he bisar-korta ase. a a v6 Selah tu aradhana nohoile baja-sangeet laga ekta chihna ase, jun pora ekta rukhi ja nohoile majkhan te ja laga homoi ke dikhai, eneka hobo pare; kintu tar asol motlob tu nishchit nohoi.
7“Huni bi, Moi laga manuh khan, aru Moi kobo; Israel, tumi laga bipokhe Moi gawahi dibo: Moi tumar Pitri ase. 8Tumar bolidan khan karone Moi tumi ke gali nadiye; tumar julai diya daan khan hodai Moi usor te ase. 9Moi tumar ghor pora ekta goru nolobo, tumar bakhal pora chagol khan bhi nolobo. 10Kilemane jongol laga sob janwar Moi laga ase, 1,000 pahar te thaka goru khan bhi Moi laga ase. 11Moi pahar laga sob chiriya ke jane, aru kheti te beraikena thaka sob Moi laga ase. 12Jodi Moi ke bhuk lagise koile, Moi tumi ke nokobo, kilemane prithibi Moi laga ase, aru itu te thaka sob bhi Moi laga ase. 13Moi goru laga mangso khai naki nohoile chagol laga khoon pi loi naki?’
14“Moi ke dhanyavad laga daan dibi, aru Sob-se-Uporte thaka Ekjon ke tumar kosom khan pura koribi. b b v14 ‘Dhanyavad laga daan’ tu mondir te dhanyavad laga aradhana nisena nijor itcha pora diya ekta bolidan thakise. 15Aru tumi digdar te poribo homoi te Moi ke matibi; Moi tumi ke bachai dibo, aru tumi Moi ke sonman koribo.’
16“Kintu biya manuh khan ke amar Pitri koi ase: ‘Moi laga niyom khan kobole, nohoile tumar oth pora Moi laga vachan kobole, tumi ke ki adhikar ase? 17Tumi niyom-sikhai ke ghin kore aru Moi laga kotha khan ke phelai diye. 18Tumi ekjon chor ke dikhile, tumi tar logot milai jai, aru tumi bebichari khan logot polai jai. 19Tumi tumar mukh ke biya te lagai diye, aru tumar jiba pora thogai-baji bonai. 20Tumi bohikena tumar bhai laga bipokhe kotha kore; tumi nijor ama laga chokra ke bodnam kore. 21Eitu khan tumi korise, aru Moi chup-chap thakise; tumi eneka bhabise ki, Moi tumi nisena he ekjon ase. Kintu etiya Moi tumi ke gali di ase, aru tumar suku age te golti khan rakhi di ase.’
22“Etiya eitu ke bujhi bi, Moi ke pahori juwa tumikhan, nohole Moi tumi ke tukra-tukra kori phelabo aru tumi ke bachabole kun bhi nathakibo. 23Kun pora dhanyavad laga daan ane, tai Moi ke sonman kore; aru thik rasta te juwa ekjon ke, Moi laga poritran dikhai dibo.”