Zaburi 49

49 ¹Sikieni haya, enyi mataifa yote; sikilizeni, enyi wote mkaao duniani, ²wote wadogo na wakuu, matajiri na maskini vilevile. ³Kinywa changu kitanena hekima; tafakari ya moyo wangu italeta ufahamu. ⁴Nitatega sikio langu kwa mithali; kwa kinubi nitafumbua kitendawili changu. ⁵Kwa nini niogope zifikapo siku za uovu, uovapo uovu wa wale wanaotaka kunikwaza, ⁶wale wanaotumainia mali zao na kujivuna kwa wingi wa utajiri wao? ⁷Hakika hakuna awezaye kumkomboa ndugu yake wala kumlipia Baba yetu fidia kwa ajili yake, ⁸fidia ya uhai ni ghali; hakuna malipo yatoshayo kamwe, ⁹hata aishi milele na asilione kaburi. ¹⁰Kwa maana anaona kuwa hata wenye hekima hufa; mpumbavu na mjinga huangamia vilevile na kuwaachia wengine mali zao. ¹¹Makaburi yao ni nyumba zao za milele, maskani yao kwa vizazi vyote, ingawa waliyaita mashamba kwa majina yao wenyewe. ¹²Mwanadamu, pamoja na fahari yake, hadumu; ni kama wanyama waangamiao. ¹³Hii ndiyo njia ya wale wenye ujasiri wa kipumbavu, na ya wale wafuatao baada yao wanaokubali maneno yao.

¹⁴Kama kondoo wamekusudiwa kaburi, na mauti yatawachunga. Wanyofu watawatawala asubuhi; miili yao itachakaa kaburini, mbali na nyumba zao za fahari. ¹⁵Lakini Baba yetu ataukomboa uhai wangu kutoka nguvu za kaburi; hakika atanichukua kwake mwenyewe. ^a a v15 Tofauti na matajiri wasioweza kununua njia ya kutoka mautini, mtunga zaburi anatumaini kwamba Baba yetu mwenyewe atamwokoa kutoka kaburini na kumchukua kwenye uwepo wake mwenyewe.

¹⁶Usiogope mtu anapotajirika, fahari ya nyumba yake inapoongezeka, ¹⁷kwa maana hatachukua chochote afapo; fahari yake haitamfuata chini. ¹⁸Ingawa maadamu yu hai hujihesabu kuwa amebarikiwa—na watu hukusifu ufanyapo vyema kwa nafsi yako, ¹⁹atajiunga na kizazi cha baba zake, ambao hawataiona nuru kamwe tena. ²⁰Mwanadamu, pamoja na fahari yake, asiye na ufahamu, ni kama wanyama waangamiao.