Nyaksinamei chem to ngaibü lam ajeklabü
Chia songdakbou shanga. Koraeibü shousi shuongeibü chia che.
Keibü hoba shalebü pendou to tetenbü ngüh che: aoeikei jaisina hailabü ka lela jongsak ong juong akia. Hanbü hoba ngoubü shuong jetei haoeneibü nyaksinam phaikukei. Sopboueibü maanglem kho aekao kia—seneibü Bouei hao jembü thüka laplabü.
49 1Ho ditashi, kan mütli pendou; nou haangashi, kaodaka kibü pendou, 2hanbü si yaangbü ham, keibü si shalebü pendou jetei. 3Kü sembungei songsihon joyolabü; kü maangpon damanchühbü ditenbü kulabü. 4Kü nou tetenbü ngüh aeto sepeilabü; kongkin yoa kü phenyemlabü suletlabü. 5Amaibü chalou loulaje, ngo aila hatlabü, ngo phaiyetlabü shuongeibü shabüei ngo kommangjinei? 6haoeneibü nyaksinam to mailembü shuong, hoba haoeneibü juongbü nyaksinam yoa yong lambü? 7Maimaitham aoeikei haoeibü jaisina angngaila athük, ayingsi hao shanga seneibü Bou to angnam kula athük, 8langkei shanga angnam kho namsek ki; ai mu kuasikei ladangkei asouthünglabü, 9khünei hao ponpen langkei kisi, hoba hee ladangkei ahaplabü. 10Aishanga songsido kibü shuongkei haida dogo haoei hapda; ngoubü shuong hoba sensimaang shuong jetei maulabü, hoba haoeneibü nyaksinam lubü shuong la üpyolabü. 11Haoeneibü hee kho haoeneibü chem ki, meten meten shanga haoeneibü kishang ponpen kilabü, khei haoenei kaonyek shuong himshuong nyenei nyenkukei. 12Müt kho haoeibü soneikangbü kümasikei akaangkhühlabü; hao maubü meisiau tegü ki. 13Ho kho himshuong to mailembü ngoubü shuongeibü lam ki, hoba haoen phaibü haoeneibü ngüh haü laubü shuongeibü lam ki.
14San shuong tegü haoen hee shanga phokukei, hoba haibüei haoen sheplabü. Maang tangbü shuongei ngeyang ka haoen thüka songdaklabü; haoeneibü mang hee ka nyaülettilabü, haoeneibü yaangbü chem ka saan kilabü. 15Lausikei seneibü Bouei hee seisihau ka kü langkei angngailabü; haoei maimaitham ngo himshuong to leilabü. a a v15 Keibü shuongei haibü ka longbü lam jekla athük, lausikei chia atbouei seneibü Bou himshuongei hee ka hao khümenlabü hoba himshuong thedanga hao leilabü dogo mailemda.
16Aoei keibou yeilaje tehüt, haoeibü chem soneikangbü kungailaje, 17Aishanga haoei hailaje ai ong alelabü; haoeibü soneikangbü hao phai asemda yanlabü. 18Hao lang kijinei haoei hao lolo olinbou dogo weeikei, hoba nyi no lolo maibü kümlaje, mütei ka nyen sangda, 19haoei jembü bousi shuongeibü meten yoa shenlabü, haoen touje ngesakbü ladangkei ühüplabü. 20Müt, haoeibü soneikangbü kiasikei, aditenbou kho, meisiau mautibü tegü ki.
