Bouei Matjemla Ngada
Asafeibü Zabur che.
Seneibü Bouei matjem jinkukei hoba jembü mütli khulimbo aukabü kuda. Haoeibü lanbü kho lembü shisho shanga aying—yam kabü meisiau pendou haoeibü ki—lausikei kokbü shuong yoa saten khünei haoeibü ngühkhüm weanbü mütli shuongeibü lembü shanga ki. Haoei nyensang lembü hoba lam chanyubü maiku lamda.
50 1Hau Yaangbü, seneibü Bouei lenkei; chanyu longbü ka khoeibü nepbü sühko haoei kaodak ngakei. 2Hemaibüa penan souan kibü Zion ka seneibü Bouei shingda. 3Seneibü Bou louda, hoba semele akilabü; hao thedanga wanei suida, hoba hao kaijembo hau yaangbü ngokan kida. 4Haoeibü mütli matjemla shanga, haoei thükae kibü müh hoba kaodak ngada.
5“Lembüei kü yoa theyolanyobü kümbü ngeibü ikjaibü shuong kü junga kamtiashi.”
6Hoba mühei haoeibü saopobü phinthonda, aishanga seneibü Bou lolo matjembou ki. a a v6 Selah kho nyensangbü yoa kibü sangkubü ngüh che ki; khoei banglangbü ayingsi haksobü che tetlabü dogo damda, lausikei kho tükde tetbü kho angeko ki.
7“Ditashi, ngeibü mütli, hoba ngei lenlabü; O Israel, ngei kan khulimbo aukabü kulabü: ngo kaneibü Bou ki. 8Ngei kaneibü lembü shanga kan ahakda; kaneibü juokbü lembü ponpen kü thedanga kida. 9Ngei kaneibü chem ka masu pongsu, kaneibü samkeisamuk ka lon alelabü. 10Aishanga yam kabü meisiau pendou ngeibü ki, shongh hajar che thüka kibü masu shuong ngeibü ki. 11Ngei shongh kabü au pendou ngeda, hoba seka ka atonenlabü pendou ngeibü ki. 12Ngo mühei haialonga ngei kan to alenlabü, aishanga kaodak hoba khünei kibü pendou ngeibü ki. 13Ngei masu pongsu phe shaula, ayingsi lon sii yungla lo?‘
14“Kü to nyensang lembü lemashi, hoba Thükenbou to kaneibü takletbü kuashi. b b v14 'Nyensang lembü' kho müt cheei jembü maang angbüei saopobü chem to nyensang maang yoa kubü lembü che kikei. 15Hoba kan khonkubü chaloua kü to ngekashi; ngei kan khümenlabü, hoba kanei kü to soumo hatlabü.’
16“Lausikei seneibü Bouei amaibü shuong to lauda, ‘Aila kanei ngeibü songkhüm wean chühda, ayingsi kaneibü sembungei ngeibü theyolanyobü lenda? 17Kanei tangtikubü mangsenda, hoba ngeibü ngüh kaibü phaito attila. 18Ladang no kokbü hapda, no hao yoa shenyoan, hoba no suonlam kümbü shuong yoa laangla. 19No kaibü sembung amaibü to phokuda, hoba kaibü lishangei aei lauda. 20No setan kaibü na khulimbo joyoda; no kaibü nyueibü shou to nyikuda. 21Habü thinei no kümbei, hoba ngo semele kikei; ngo no tegütham ki dogo no dambei. Lausikei tou ngei ka to hakda, hoba kaibü nyek thea mat phokuda.’
22“Tou ho daman chühashi, ngo maabü no, ayingsi ngei ka to phenthetlabü, hoba ka khümenla aokei akilabü. 23Aoei nyensang kubü lembü lemda, haoei ngo to soumo kuda; hoba aoei tükde lam jungeida, hao to ngei kü khümenbü lenlabü.”
