Nehemiah 9

9 ¹Kachāng hiwui zimiksho maga̱da khamatethang, Israelwui mibingna kakhum eina, bora ngavailaga, akuili chifa tottāt eina akazipsera. ^a a v1 Kuili chifa ngavaida, khum kala bora ngavai eina ngasoda, hi achālakhawui panglāk chapngachā kala ning ngateiwui machut kahaina. ²Israelwui ara̱-azāna yur kateibing saikorawui eina ngatei ngasakta, nganingda, athum khalattawui morei kala awova̱ ngarāwui khayonkhamāng hāngphata. ³Athumna kachichāwui pamli pamda, ithumwui Avāwui ainwui lairik chi pung kathum sha̱kha pāda, chiwui thili pung kathum khangatei athumna morei hāngphata kala ithumwui Avāli khoruma. ⁴Jeshua, Bani, Kadmi-el, Shebaniah, Bunni, Sherebiah, Bani kala Chenani chibingna Levinaobingwui chonchaktungli nganingda, panglāk eina ithumwui Avāli khangakaona. ⁵Chiwui thili Levinaobing Jeshua, Kadmi-el, Bani, Hashabneiah, Sherebiah, Hodiah, Shebaniah, kala Pethahiahna hānga, "Ngakarthuida, katang makhavaiwui eina katang mavaila nathumwui Avāli solu. Sokhami kala masot saikorawui tungli masot chikata nawui tekhamatei mingli soranu. ⁶Na akhalatta ithumwui Avā china. Nana kazingram, juimeikap kaja kazingram, chili khalei ashangva̱ saikora eina ngasoda, okathui kala chiwuitungli khalei saikora, shamadru kala chi alungli khalei saikora sākhui. Nana athum saikorali kharing mi, kala kazingramwui ashangva̱na nali khoruma. ⁷Na ithumwui Avā china; nana Abramli kapangkhuida Chaldeawui Ur eina thānshoka, kala ali Abraham da aming mihaira. ⁸Nana awui malung nawui mangāli chisin kahaina da theihaira, kala Canaannaobing, Hitnaobing, Amornaobing, Periznaobing, Jebusnaobing, kala Girgashnaobingwui ngalei awui ara̱-azāli khami khavai nana ali tuingashit sāhaira. Kala nana nawui tuingashit mayonhaira, kaja na khamashungana. ⁹Nana ithumwui awova̱ ngarāwui khanang Egyptli theihaira; nana Red Seali athumwui khavao shāhaira. ¹⁰Nana Pharaohli, awui wungnaobing saikora kala awui ngaleiwui mi saikorali machut kahai ot kala matakhak kahai ot chihovāhaira, kaja Egyptnaobingna ithumwui mibingli ningyat eina sāshihaikhala kaji nana thei. Chiwui vang eina nana khalattawui vang namei sākhui, chi aja eina tangda leichingra. ¹¹Nana athumwui mangāli ngayi ngalākpak khangasaka, chiwui vang athumna tara̱ makhalei ngaleili kānhaowa, kha kapanga tara̱lungli ngalung akha thāda nana athumwui kakharombing kathukali horsanga. ¹²Ngashun nana muiyā pākra̱ eina athumli thānmi, kala athumna zat khavai apongli kahor mi khavai, ngayāshong mei pākra̱ eina athumli thānmi. ¹³Nana Sinai Kaphungli tāhaira; nana kazingramwui eina athumli hānga. Nana athumli khamashung shiyan kala kachangkhat ain, kaphā shiyan-chikan kala ningkhami mihaira. ¹⁴Nana athumli nawui kathara Sabbath theingasaka, kala nawui rao Moseswui mahāna ningkhami, shiyan, kala ain mihaira. ¹⁵Athumna thaihaida, nana kazingramwui eina athumli khamui mihaira, kala athumna ra̱kachanghaida, nana lunggui eina athumli tara̱ thānshoka. Nana athumli tākida nana khami khavai ngashithairasai ngalei chi khui khavai hānga. ¹⁶Kha ithumwui awova̱ ngarā athum hiklaka kala marākkapaiya mimānga, kala nawui ningkhami nganai khavai mamayāmana. ¹⁷Athumna nganai khavai mamayāmada, nana athum mangāli sāhai matakhak kahai ot chi phaningung khavai malaihaowa. Athumna ning khamakang sāda, athumwui ngakaishiwui pongli athumwui narkahaipamli latung khavai kathāna akha pangkhui. Kha nava pheokhame, leikashi kala lukhamashan, malung mavatkazāra kala makhangachei leikashi pemting kahai Avā china, kala nana athumli horchao kahai masāmana. ¹⁸Athumna khalattawui vang seinao heikakhui ama̱ akha sākhuilaga, "Hi nathumli Egypt ngaleiwui eina thānshokkahai nathumwui vare china," da hānglaga, khangachee khangachā mana̱shi ot sāhairasāla, ¹⁹nawui kahaka lukhamashan pemting eina nana athumli lamhāngli mahorhaimana. Ngashun muiyā pakra̱na athumli shongfali thānmichinga, kala ngayā pongda mei pakra̱na athumwui shongfa horngasakchinga. ²⁰Nana athumli tamchithei khavai nawui kaphā Manglā mihaira. Nawui manna athumwui khamorwui eina majimimana, kala athumwui ra̱chanwui vang athumli tara̱ mihaira. ²¹Zingkum hangmati zatlaga nana athumli lamhāngli phauimihaira, kala athumli khikha makhalei maleimana; athumwui pheila khamahing maleimana, kala athumwui kashankachonla kakāk mavaimana. ²²Ngaleiwui achikun kachida athumli leiret milaga, nana athumli wungrambing kala miyurbing mihaira. Chieina athumna Heshbonwui awunga Sihonwui ngalei kala Bashanwui awunga Ogwui ngalei shimlui khuihaowa. ²³Nana athumwui naomayara ngarāli kazingramwui sirā thāda kachungkha mayāsangmihaira, kala athumwui avā ngarāli vāzangda shimlui khui khavai hāngkahai ngalei chili athumli thānzangmihaira. ²⁴Athumwui naomayara ngarā vāzangda ngalei chi shimlui khuihaowa. Nana athumwui mangāli ngalei chili leikasā Canaannaobingli maishi ngasakhaira, kala athumwui ningkachāng athumli sākhavai Canaannaobingli athumwui awungabing kala ngaleiwui mibing eina athumwui pāngli horsangmihaira. ²⁵Athumna raipan sākahai keinungbing kala ngalei katum khuihaowa; kaphā ot saikora eina peida kahai shimbing, khonkahai ra̱khongbing, drakhā yāmgui, olive yāmgui, kala atheirong kachungkha shimlui khuihaowa. Chieina athumna phazāda ningyāng unglakhaowa kala mataihaowa, kala nawui kahaka makhavātli athumna ringphāhaowa. ²⁶Chithālala athum kahāng makhanganā sāda nali ngakaishihaowa; nawui ain chi athumwui khanukli sanghaowa. Athumli nashong ngareiung khavai hāngmachinkahai nawui marānbingli athumna shaothathaowa; kala khangachee khangachā mana̱shi ot sāhaowa. ²⁷Chieina nana athumli athumwui yangkashebingwui pāngli horsangmihaira, chibingna athumli rekhareka. Chithālala athumwui kachot atamli, athumna nali ngakao tharan, nana kazingramwui eina athumli shāmihaira, kala nawui kahaka lukhamashan pemting eina athumli huikhami mihaira, chibingna athumli yangkashebingwui pāngwui eina kanmihaira. ²⁸Chithālala athumna ngasāmkakhui samphanghaoda, athumna nawui mangāli latluida makhayāwui ot sāhaowa. Chieina nana athumli athumwui yangkashebingwui pāngli horhaowa, chibingna athumwuitungli munghaowa. Chithālala athumna ngareiungda nali ngakao tharan, nana kazingramwui eina shāmihaira, kala atam kachungkha, nawui lukhamashan pemting eina athumli kanmihaira. ²⁹Nana athumli nawui ainshong latluikhui khavai hāngmachinhaira, kha athum langkasohaida nawui ningkhami mamayonmana. Khamayon mina kharing samphang khavai nawui bicharbingli athumna morei sāhaowa. Ngakaishilāk eina athum ngareithuihaowa, lah ngakaishitingtinghaowa, kala manganāsangmana. ³⁰Zingkum kachungkhawui vang nana athumli khangaraimihaira. Nawui Manglā eina nawui marānbingwui pongli athumli hāngmachinhaira, kha athumna manganātitkhuimana. Chieina nana athumli ngaleibingwui mibingwui pāngli horsangmihaira. ³¹Chithālala nawui kahaka lukhamashan pemting eina athumli sāshimānmana kala athumli mahorhaimana, kaja nava lumashankatha kala lukhamashan pemting kahai Avā china. ³²Ara, kahaka, pangshapa kala khangachee khangachā, makhangachei leikashiwui tuingashit ngākchingkahai ithumwui Avā, Assyriawui awungabingwui atam eina aja shangshungda ithumwuitungli, ithumwui awungabing kala akhokabingtungli, ithumwui pāngmonbing kala marānbingtungli, ithumwui avā ngarā kala nawui mi saikoratungli rāshokkahai kachotkachāng saikora hi nawui mangāli mateo thāda mayangalu. ³³Ithumwuitungli rāshokkahai saikorawui pongli nava khamashunga china; nana ningtonglak eina sāhaira, kha ithumna khangui ot sāhaira. ³⁴Ithumwui awungabing kala akhokabing, ithumwui pāngmonbing kala avā ngarāna nawui ain mamayonmana; athumna nawui ningkhamibing kala nana athumli mikahai hāngmachin tuibing manganātitkhuimana. ³⁵Athum khalatta wungramli leilakha eina tangdala, nana athumli mikahai kaphā hakkhamahā, kala nana athumwui mangāli sākahai khamashā, katum ngalei chi ringphāda, athumna nali otram mangatha̱mana kala athumwui makhayā apongwui eina malatungmana. ³⁶Kala ara yanglu, aja ithum raona; chiwui athei kala kaphā athei shaikhavai nana ishāvā ngarāli mikahai ngalei khalattali ithum rao ngasāhaira. ³⁷Chiwui athei-arai kachungkha chi, ithumwui moreiwui vang ithumwuitungli nana chipamkahai awungabingli vāra. Athumna ithumwui phasā kala ithumwui sha̱kei tungli, athumwui kahāng thada munga, kala ithum kachot hakmahālungli lei."

³⁸Chiwui vang eina ithumna khalapa tuingashit akha kagapina sāhaira, kala chi ithumwui wungnaobing, Levinaobing kala pāngmonbingna seali.