Nehemiah 8

8 ¹Kashine kachāng rā tharan, mi saikora Tara̱ Ngaveiwui mangāli leihngapha̱li katonga ngarumlaga, ithumwui Avāna Israelli kakaso Moseswui ainwui lairik chi hokhui khavai kapime Ezrali poi. ²Kashine kachāngwui zimiksho kharethang, pāngmon Ezrana mipāng, sha̱naobing, kala kashā chi theishingkhui khavai mi saikorawui yaruiwui mangāli ain chi hokhui. ³Ana Tara̱ Ngaveiwui mangāli leihngapha̱ shangda, kazing mathangwui eina pha̱kaphayā atam eina tangda, mipāng, sha̱naobing, kala theishingkhui khavai mi saikorali pāchithei. Mi saikorana ainwui lairik chi nganātitkhui. ⁴Kapime Ezrana hiwui vang sākahai thingwui khamasopam kajui akhawui tungli nganinga. Awui yāvāk Mattithiah, Shema, Anaiah, Uriah, Hilkiah, kala Ma-aseiah nganinga; kala awui uivāk, Pedaiah, Mishael, Malchijah, Hashum, Hashbaddanah, Zechariah, kala Meshullam. ⁵Ezrana mi saikorawui miktheili lairik chi rak ngasaka, kaja ana mi saikorawui kajuili nganinghairasai; ana chi rak tharan, athum saikora nganinga. ⁶Ezrana ithumwui Avā, Vare reikhamataia chili sochikata, kala mi saikorana apāng khāngkāda, "Amen! Amen!" da ngahānkai. Chiwui thili athum kui mashunzangda, amai ngaleili katolaga, ithumwui Avāli khoruma.

⁷Levinaobing—Jeshua, Bani, Sherebiah, Jamin, Akkub, Shabbethai, Hodiah, Ma-aseiah, Kelita, Azariah, Jozabad, Hanan, kala Pelaiah—na mibing athumwui pamli nganingda leilakha, mibingli ain chi hāngchithei. ⁸Athumna ithumwui Avāwui ain lairik chi tharlak eina pāchithei, kala kakhalat hāngmishapa, chieina mibingna pākahai chi theishingkhui.

⁹Chiwui thili rammunga Nehemiah, pāngmon kala kapime Ezra, kala mibingli tamchithei Levinaobingna, athum saikorali hānga, "Aja zimiksho hi nathumwui Avā vang katharana. Machapngachālu, machaplakalu." Kaja mi saikorana ainwui tui kashā tharan chapa. ¹⁰Nehemiahna athumli hānga, "Vāda kashakazā mavāt chi zālu, kala leishirihai chi manglu, kala khikha masepta leibingli yar sangmilu, kaja aja zimiksho hi ithumwui Proho Avā vang katharana. Makhananglakalu; ithumwui Avāwui ringphā chi nathumwui yāngna."

¹¹Levinaobingna mi saikorali chingri ngasakta, "Chingri leilu, kaja aja zimiksho hi katharana. Makhananglakalu," da hānga.

¹²Mi saikora vāda phāshak phazāda, yar horsangngarumda, kala khamathān kahakana ringphai, kaja athumli hāngchithei tui chi athumna theishingkhui.

Rāmrah Phanit Mayon

¹³Zimiksho kakhaneli, mi saikorawui shimkhurwui kathānabing, pāngmonbing kala Levinaobing ngasoda, ainwui tui chi tamkhui khavai kapime Ezrali ngarum. ¹⁴Ithumwui Avāna Moseswui eina kakaso ainli, Israelnaobingna kashine kachāngwui phanitlungli rāmrah sāpamra da kapihaida athumna theisamphang. ¹⁵Athumna athumwui keinung saikorali kala Jerusalemli hi phongshoklaga vaosangra, "Kaphungli vāda, olive, ram-olive, myrtle, khanei, kala khangatei timfa kahai thingphāng reokhuilaga, kapi kahai athishurda rāmrah sākhuilu."

¹⁶Mibingna kanvāda thingphāng reokhuilaga, akhavā akhavā awui shimtungli, kayāngli, ithumwui Avāwui shim kayāngli, kala Tara̱ Ngavei kala Ephraim Ngaveiwui leihngapha̱li rāmrah sākhui. ¹⁷Raithā kahaiwui eina latkhaungbing kazip katonga chi rāmrah sākhuilaga chili pamsera; Nunwui naomayara Joshuawui atam eina thuida chi zimiksho eina tangda, Israelnaobingna chithāda masamana, kala athumwui khamathān reikhamatai kalākhaowa. ¹⁸Thangthang, kharethang eina thuilaga khanaowa zimiksho eina tangda, Ezrana ithumwui Avāwui ain lairik chi pai. Athumna shinithang phanit mayona, kala kachishatathang ainwui khangachā athishurda chingri kahai kazip khui.