நெகேமியா 8

8 ¹ஏழாம் மாதம் வந்தபோது, ஜனங்கள் எல்லாரும் ஏகமனதாய்த் தண்ணீர் வாசலுக்கு முன்னிருந்த வீதியில் கூடிவந்து, எங்கள் பிதா இஸ்ரவேலுக்குக் கட்டளையிட்ட மோசேயின் நியாயப்பிரமாண புஸ்தகத்தைக் கொண்டுவரும்படி வேதபாரகனாகிய எஸ்றாவைக் கேட்டுக்கொண்டார்கள். ²ஏழாம் மாதத்தின் முதலாந்தேதியிலே, ஆசாரியனாகிய எஸ்றா புருஷர், ஸ்திரீகள், கேட்டு உணர்ந்துகொள்ளத்தக்க எல்லாருமாகிய சபைக்கு முன்பாக நியாயப்பிரமாணத்தைக் கொண்டுவந்து, ³தண்ணீர் வாசலுக்கு முன்னிருந்த வீதிக்கு எதிராக நின்று, அதைப் புருஷருக்கும், ஸ்திரீகளுக்கும், உணர்ந்துகொள்ளத்தக்க எல்லாருக்கும் முன்பாக விடியற்காலந்தொடங்கி மத்தியானமட்டும் வாசித்தான்; ஜனங்கள் எல்லாரும் நியாயப்பிரமாண புஸ்தகத்திற்குக் கவனமாய்ச் செவிகொடுத்தார்கள். ⁴வேதபாரகனாகிய எஸ்றா, இதற்கென்று செய்யப்பட்ட உயர்ந்த மரமேடையின்மேல் நின்றான். அவன் வலதுபக்கத்தில் அவனருகே மத்தித்தியா, செமா, அனாயா, உரியா, இல்க்கியா, மாசெயா என்பவர்களும்; அவன் இடதுபக்கத்தில் பெதாயா, மிசவேல், மல்கியா, ஆசூம், அஸ்பதானா, சகரியா, மெசுல்லாம் என்பவர்களும் நின்றார்கள். ⁵எஸ்றா ஜனங்களெல்லாருக்கும் உயரமாய் நின்றபடியால், அவன் எல்லா ஜனங்களுடைய கண்களுக்கு முன்பாகவும் புஸ்தகத்தைத் திறந்தான்; அதைத் திறந்தபோது ஜனங்கள் எல்லாரும் எழுந்து நின்றார்கள். ⁶எஸ்றா மகா தேவனாகிய எங்கள் பிதாவைத் துதித்தான்; ஜனங்கள் எல்லாரும் தங்கள் கைகளை உயர்த்தி, “ஆமென், ஆமென்” என்று மறுமொழி சொல்லி, தரைமட்டும் முகங்குனிந்து எங்கள் பிதாவைப் பணிந்துகொண்டார்கள்.

⁷லேவியரான யெசுவா, பானி, செரெபியா, யாமின், அக்கூப், சப்பேதாயி, ஒதியா, மாசெயா, கெலிதா, அசரியா, யோசபாத், ஆனான், பெலாயா என்பவர்கள், ஜனங்கள் தங்கள் நிலையில் நிற்கையில், அவர்களுக்கு நியாயப்பிரமாணத்தை விளக்கிச் சொன்னார்கள். ⁸அவர்கள் எங்கள் பிதாவின் நியாயப்பிரமாணப் புஸ்தகத்தைத் தெளிவாய் வாசித்து, அதின் பொருளை விளக்கிச் சொன்னதால், ஜனங்கள் வாசிக்கப்பட்டதை உணர்ந்துகொண்டார்கள்.

⁹அப்பொழுது தலைவனாகிய நெகேமியாவும், ஆசாரியனும் வேதபாரகனுமாகிய எஸ்றாவும், ஜனங்களுக்குப் போதித்த லேவியரும், எல்லாரையும் நோக்கி, “இந்த நாள் உங்கள் பிதாவுக்குப் பரிசுத்தமானது; நீங்கள் துக்கப்படாமலும் அழாமலும் இருங்கள்” என்றார்கள்; ஏனெனில் ஜனங்கள் எல்லாரும் நியாயப்பிரமாண வார்த்தைகளைக் கேட்டபோது அழுதார்கள். ¹⁰மேலும் நெகேமியா அவர்களை நோக்கி, “நீங்கள் போய்ச் சுவையான உணவைப் புசித்து, மதுரமானதைக் குடித்து, ஒன்றும் ஆயத்தம்பண்ணாதவர்களுக்குப் பங்குகளை அனுப்புங்கள்; இந்த நாள் எங்கள் ஆண்டவராகிய பிதாவுக்குப் பரிசுத்தமானது; விசனப்படாதிருங்கள்; எங்கள் பிதாவின் சந்தோஷமே உங்கள் பெலன்” என்றான்.

¹¹லேவியரும், “இந்த நாள் பரிசுத்தமானது, நீங்கள் அமைதலாயிருங்கள், விசனப்படாதிருங்கள்” என்று சொல்லி, ஜனங்கள் எல்லாரையும் அமர்த்தினார்கள்.

¹²அப்பொழுது ஜனங்கள் எல்லாரும் தங்களுக்கு அறிவிக்கப்பட்ட வார்த்தைகளை உணர்ந்துகொண்டபடியால், புசிக்கவும் குடிக்கவும் பங்குகளைப் பகிர்ந்துகொடுக்கவும் மிகுந்த சந்தோஷத்துடன் களிகூரவும் போனார்கள்.

கூடாரப் பண்டிகையை ஆசரித்தல்

¹³இரண்டாம் நாளிலே, ஜனங்கள் எல்லாருடைய பிதாக்களின் வம்சத்தலைவரும், ஆசாரியரும், லேவியரும், நியாயப்பிரமாணத்தின் வார்த்தைகளைக் கவனித்துப் படிக்கும்படி வேதபாரகனாகிய எஸ்றாவினிடத்தில் கூடிவந்தார்கள். ¹⁴இஸ்ரவேல் புத்திரர் ஏழாம் மாதத்தின் பண்டிகையிலே கூடாரங்களில் குடியிருக்கவேண்டும் என்று எங்கள் பிதா மோசேயைக்கொண்டு கட்டளையிட்டதாய் நியாயப்பிரமாணத்தில் எழுதியிருக்கிறதைக் கண்டார்கள். ¹⁵“நீங்கள் மலைகளுக்குப் போய், எழுதியிருக்கிறபடி கூடாரங்களைப் போடும்படிக்கு, ஒலிவ கிளைகளையும், காட்டொலிவ கிளைகளையும், மிருதுச் செடியின் கிளைகளையும், பேரீச்சமட்டைகளையும், மற்ற தழைத்த மரங்களின் கிளைகளையும் கொண்டுவாருங்கள்” என்று தங்கள் சகல பட்டணங்களிலும் எருசலேமிலும் கூறிப் பிரசித்தப்படுத்தவேண்டியதாயிருந்தது.

¹⁶அப்பொழுது ஜனங்கள் போய், கிளைகளைக் கொண்டுவந்து, அவனவன் தன் தன் வீட்டின்மேலும், தங்கள் முற்றங்களிலும், எங்கள் பிதாவின் ஆலய முற்றங்களிலும், தண்ணீர் வாசலின் வீதியிலும், எப்பிராயீம் வாசலின் வீதியிலும் தங்களுக்குக் கூடாரங்களைப் போட்டுக்கொண்டார்கள். ¹⁷சிறையிருப்பிலிருந்து திரும்பிவந்த சபையார் எல்லாரும் கூடாரங்களைப் போட்டு, அவைகளில் குடியிருந்தார்கள்; நூனின் குமாரனாகிய யோசுவாவின் நாட்கள்முதல் அந்நாள்வரைக்கும் இஸ்ரவேல் புத்திரர் இப்படிச் செய்யவில்லை; அவர்களுடைய சந்தோஷம் மகா பெரிதாயிருந்தது. ¹⁸முதலாம் நாள்முதல் கடைசி நாள்வரைக்கும் தினந்தோறும் எஸ்றா எங்கள் பிதாவின் நியாயப்பிரமாண புஸ்தகத்தை வாசித்தான்; அவர்கள் ஏழுநாள் பண்டிகையை ஆசரித்து, நியாயப்பிரமாணம் கட்டளையிட்டபடி எட்டாம் நாளிலே விசேஷித்த ஆசரிப்பைக் கொண்டாடினார்கள்.