ነህምያ 8 FHB Father's Heart Bible™

8 ¹ሻውዐይቲ ወርሒ ምስ በፅሐት፥ ኵሎም እቶም ህዝቢ ኣብቲ ቅድሚ ደገ ማይ ዝነበረ ኣደባባይ ከም ሓደ ሰብ ኮይኖም ተኣከቡ፤ ነቲ ኣቦና ንእስራኤል ዝኣዘዞ መፅሓፍ ሕጊ ሙሴ ከምፅእ ድማ ንዕዝራ ፀሓፊ ለመንዎ። ²ብቐዳመይቲ መዓልቲ ሻውዐይቲ ወርሒ ድማ፥ ዕዝራ ካህን ነቲ ሕጊ ኣብ ቅድሚ እቲ ጉባኤ ሰብኡትን ኣንስትን እቶም ዝሰምዕዎ ከስተውዕል ዝኽእሉ ዅሎምን ኣምፅኦ። ³ገፁ ናብቲ ቅድሚ ደገ ማይ ዝነበረ ኣደባባይ ኣቢሉ ድማ፥ ካብ ወጋሕታ ክሳዕ ፍርቂ መዓልቲ፥ ነቶም ሰብኡትን ኣንስትን ከስተውዕል ዝኽእሉ ዅሎምን ኣንበበሎም። ኵሎም እቶም ህዝቢ ድማ ነቲ መፅሓፍ ሕጊ ኣፀቢቖም ይሰምዑ ነበሩ። ⁴ዕዝራ ፀሓፊ ድማ ነዝ ነገር እዙይ ኢሎም ኣብ ዝሰርሕዎ በሪኽ ናይ ዕንፀይቲ መድረኽ ደው በለ። ኣብ የማን ድማ ማቲትያ፥ ሸማዕ፥ ዓናያ፥ ኦርዮ፥ ሒልቅያ፥ መዓስያ ደው በሉ፤ ኣብ ፀጋሙ ድማ ፍዳያ፥ ሚሳኤል፥ መልክያ፥ ሃሱም፥ ሃስበዳና፥ ዘካርያስ፥ መሱላም ደው በሉ። ⁵ዕዝራ ድማ ካብ ኵሎም እቶም ህዝቢ ልዕል ኢሉ ደው ስለ ዝበለ፥ ነቲ መፅሓፍ ኣብ ቅድሚ ዓይኒ ኵሎም እቶም ህዝቢ ኸፈተ፤ ምስ ከፈተ ድማ ኵሎም ደው በሉ። ⁶ዕዝራ ድማ ንኣቦና፥ ነቲ ዓብዪ ኣምላኽ ኣመስገኖ፤ ኵሎም እቶም ህዝቢ ኸዓ ኣእዳዎም ኣልዒሎም “ኣሜን! ኣሜን!” ኢሎም መለሱ። ሽዑ ብገፆም ኣብ ምድሪ ተደፊኦም ንኣቦና ሰገዱሉ።

⁷እቶም ሌዋውያን፥ ማለት ዮሱእ፥ ባኒ፥ ሰረብያ፥ ያሚን፥ ዓቁብ፥ ሻበታይ፥ ሆድያ፥ መዓስያ፥ ቀሊጣ፥ ኣዛርያስ፥ ዮዛባድ፥ ሓናን፥ ፈላያ ድማ፥ እቶም ህዝቢ ኣብ ቦታኦም ደው ኢሎም እንተለዉ ነቲ ሕጊ ኣረድእዎም። ⁸ነቲ መፅሓፍ፥ ንሕጊ ኣቦና፥ ግልፅ ጌሮም ኣንበብዎ፤ ትርጕሙ እናሃቡ ድማ እቶም ህዝቢ ነቲ ንባብ ኣስተውዓሉ።

⁹ሽዑ ነህምያ እቲ ሹም፥ ዕዝራ ካህንን ፀሓፊን፥ እቶም ንህዝቢ ዝምህሩ ዝነበሩ ሌዋውያንን ድማ ንዅሎም “እዛ መዓልቲ እዚኣ ንኣቦኻትኩም ቅድስቲ እያ። ኣይትሕዘኑ ኣይትብከዩ” በልዎም። ኵሎም እቶም ህዝቢ ነቲ ቓል ሕጊ ሰሚዖም ይበኽዩ ስለ ዝነበሩ እዩ። ¹⁰ነህምያ ድማ ከምዙይ በሎም፦ “ኪዱ እሞ ረጒድ ብልዑ፤ ጥዑም ድማ ስተዩ፤ ነቶም ዝተዳለወሎም ዘይብሎም ከዓ ገፀ በረኸት ስደዱሎም፤ እዛ መዓልቲ እዚኣ ንጐይታ ኣቦና ቅድስቲ እያ እሞ። ኣይትሕዘኑ፤ ሓጐስ ኣቦና ሓይልኹም እዩ እሞ።”

¹¹እቶም ሌዋውያን ድማ “ፀጥ በሉ፥ እዛ መዓልቲ እዚኣ ቅድስቲ እያ እሞ፤ ኣይትሕዘኑ” እናበሉ ንዅሎም እቶም ህዝቢ ኣህድኡዎም።

¹²ኵሎም እቶም ህዝቢ ድማ ነቲ እተፈልጦም ቃላት ስለ ዘስተውዓሉ፥ ክበልዑን ክሰትዩን ገፀ በረኸት ክመቓቐሉን ብዓብዪ ሓጐስ ክሕጐሱን ከዱ።

በዓል ዳስ ምብዓል

¹³በታ ካልአይቲ መዓልቲ ድማ፥ ሓለቕቲ ቤተ ሰብ ኵሎም እቶም ህዝቢ፥ ምስ ካህናትን ሌዋውያንን፥ ንቓል እቲ ሕጊ ከፅንዑ ናብ ዕዝራ ፀሓፊ ተኣከቡ። ¹⁴ኣብቲ ሕጊ ድማ፥ ኣቦና ብሙሴ ኣቢሉ ዝኣዘዞ፥ ደቂ እስራኤል በቲ ናይ ሻውዐይቲ ወርሒ በዓል ኣብ ዳሳት ክነብሩ ኸም ዝግባእ ተፅሒፉ ረኸቡ። ¹⁵ኣብ ኵለን ከተማታቶምን ኣብ ኢየሩሳሌምን ድማ ከምዙይ ኢሎም ከውጁን ከዕውጁን ነበሮም፦ “ናብ እምባታት ደይብኩም፥ ዳሳት ንምግባር፥ ከምቲ ተፅሒፉ ዘሎ፥ ጨናፍር ኣውሊዕን ጨናፍር በረኻ ኣውሊዕን ጨናፍር ኣስን ጨናፍር ተምርን ጨናፍር ቈፃል ኣእዋምን ኣምፅኡ።”

¹⁶እቶም ህዝቢ ድማ ወፂኦም ጨናፍር ኣምፂኦም፥ ነፍሲ ወከፍ ኣብ ናሕሲ ገዝኡን ኣብ ቅፅርታቶምን ኣብ ቅፅሪ ቤት ኣቦናን ኣብ ኣደባባይ ደገ ማይን ኣብ ኣደባባይ ደገ ኤፍሬምን ዳሳት ሰርሑ። ¹⁷ብምሉኡ እቲ ኻብ ምርኮ ዝተመለሰ ጉባኤ ድማ ዳሳት ሰሪሑ ኣብተን ዳሳት ተቐመጠ፤ ደቂ እስራኤል ካብ ዘመን ኢያሱ ወዲ ነዌ ጀሚሮም ክሳዕ እታ መዓልቲ እቲኣ ኸምኡ ገይሮም ኣይፈልጡን ነይሮም፤ ሓጐሶም ድማ የመና ዓብዪ ነበረ። ¹⁸ዕዝራ ድማ ካብ ቀዳመይቲ መዓልቲ ክሳዕ እታ ናይ መወዳእታ፥ መዓልቲ መዓልቲ ነቲ መፅሓፍ ሕጊ ኣቦና የንብብ ነበረ። ሸውዓተ መዓልቲ ነቲ በዓል ኣብዓሉ፤ በታ ሻምነይቲ መዓልቲ ድማ፥ ከምቲ እቲ ሕጊ ዝጠልቦ፥ ቅዱስ ጉባኤ ገበሩ።