Nehemiah 7

Chapter 7.

7 ¹Phākho sakāluihaida kala ina khāmong sāsang kahaiwui thili, ngavei khamayonbing, laa kasābing, kala Levinaobing kapangsanghaowa. ²Ina ichinā Hanani eina raipanwui kathāna Hananiahli Jerusalemwui akhavā sāngasaka; kaja a chisin kahai eina mi kachungkha eina reimeida ithumwui Avāli ngachee. ³Ina athumli hānga, "Zimik makānranglakha eina tangda Jerusalemwui ngaveibing mashohailu; kala khamayonbing mayonpamlakha, khāmongbing shungserlaga phākashut haisangranu. Jerusalemli kapambingwui eina kachichā awui otpamli, kachichāwui shim kāroda khamayonbing phākhuilu."

⁴Keinung chi kahakva̱na, kha chiwui alungli khalei mibing kateokhamāng, kala shimbing masākāluirangsai.

Avāwui Mibing Latkhaung Mishānkhui

⁵Chieina iwui Avāna khangambing, wungnaobing, kala mibingli rākazipkhuida mithotwui athishurda mishānkhui khavai iningli hai. Ina rikkaphok latkhaungbingwui mithot lairik samphanga, kala chiwui alungli hithada kapihaida samphanga:

⁶Hibing hi Babylonwui awunga Nebuchadnezzarna Babylonli tukvā kahai, raithā kahaiwui eina latunga leikhaiwui mibingna, kachichāramli kaja Jerusalemli, Judahli latkhaung, ⁷Athumna Zerubbabel, Jeshua kala Nehemiah, Azariah, Raamiah kala Nahamani, Mordecai, Bilshan kala Mispereth, Bigvai kala Nehum, Baanah athumkatingsi ngasounga. Israelnaobingwui mi mashing chi:

⁸Paroshwui naomayarabing, thingkhani shākha hangshinida khani;

⁹Shephatiahwui naomayarabing, shākathum hangshinida khani;

¹⁰Arahwui naomayarabing, shātharuk hangphangāda khani;

¹¹Pahath-moabwui naotunbing (Jeshua kala Joabwui shimkhurna), thingkhani shāchishat tharāda chishat;

¹²Elamwui naomayarabing, thingkha shākhani hangphangāda mati;

¹³Zattuwui naomayarabing, shāchishat hangmatida phangā;

¹⁴Zaccaiwui naomayarabing, shāshini hangtharuk;

¹⁵Binnuiwui naomayarabing, shātharuk hangmatida chishat;

¹⁶Bebaiwui naomayarabing, shātharuk maga̱da chishat;

¹⁷Azgadwui naomayarabing, thingkhani shākathum maga̱da khani;

¹⁸Adonikamwui naomayarabing, shātharuk hangtharukta shini.

¹⁹Bigvaiwui naomayarabing, thingkhani hangtharukta shini.

²⁰Adinwui naomayarabing, shātharuk hangphangāda phangā.

²¹Aterwui naomayarabing, kaja Hezekiahwui naomayarabing, hangchikoda chishat.

²²Hashumwui naomayarabing, shākathum maga̱da chishat.

²³Bezaiwui naomayarabing, shākathum maga̱da mati.

²⁴Hariphwui naomayarabing, shākha tharāda khani.

²⁵Gibeonwui naomayarabing, hangchikoda phangā.

²⁶Bethlehem eina Netophahwui naotunbing, shākha hangchishatta chishat.

²⁷Anathothwui naotunbing, shākha maga̱da chishat.

²⁸Beth-azmavethwui naotunbing, hangmatida khani.

²⁹Kiriath-jearim, Chephirah kala Be-erothwui mibing, shāshini hangmatida kathum.

³⁰Ramah eina Gebawui naotunbing, shātharuk maga̱da akha.

³¹Michmaswui naotunbing, shākha maga̱da khani.

³²Bethel eina Aiwui naotunbing, shākha maga̱da kathum.

³³Nebo akhapāwui naotunbing, hangphangāda khani.

³⁴Elam akhapāwui naomayarabing, thingkha shākhani hangphangāda mati.

³⁵Harimwui naotunbing, shākathum maga̱.

³⁶Jerichowui naotunbing, shākathum hangmatida phangā.

³⁷Lod, Hadid kala Onowui naotunbing, shāshini maga̱da akha.

³⁸Senaahwui naotunbing, thingkathum shāchiko thumrā.

³⁹Pāngmonbing: Jedaiahwui naotunbing (Jeshuawui shimkhurna), shāchiko hangshinida kathum.

⁴⁰Immerwui naotunbing, thingkha hangphangāda khani.

⁴¹Pashhurwui naotunbing, thingkha shākhani hangmatida shini.

⁴²Harimwui naotunbing, thingkha tharāda shini.

⁴³Levinaobing: Hodevahwui naomayara Jeshua eina Kadmielwui naotunbing, hangshinida mati.

⁴⁴Laa kasābing: Asaphwui naotunbing, shākha hangmatida chishat.

⁴⁵Ngavei khamayonbing chi Shallum kala Ater, Talmon, Akkub kala Hatita, Shobaiwui naotunbing, shākha thumrāda chishat.

⁴⁶Khorumshimli otram khangatha̱bing: Zihawui naotunbing, Hasuphawui naotunbing, Tabbaothwui naotunbing, ⁴⁷Keroswui naotunbing, Siawui naotunbing, Padonwui naotunbing, ⁴⁸Lebanawui naotunbing, Hagabawui naotunbing, Shalmaiwui naotunbing, ⁴⁹Hananwui naotunbing, Giddelwui naotunbing, Gaharwui naotunbing, ⁵⁰Re-aiahwui naotunbing, Rezinwui naotunbing, Necodawui naotunbing, ⁵¹Gazzamwui naotunbing, Uzzawui naotunbing, Paseahwui naotunbing, ⁵²Besai, Me-unim, Nephushesim, ⁵³Bakbuk, Hakupha, Harhur, ⁵⁴Bazlith, Mehida, Harsha, ⁵⁵Barkos, Sisera, Temah, ⁵⁶Neziah, kala Hatipha.

⁵⁷Solomonwui raobingwui naotunbing: Sotaiwui naotunbing, Sopherethwui naotunbing, Peridawui naotunbing, ⁵⁸Jaala, Darkon, Giddel, ⁵⁹Shephatiah, Hattil, Pochereth-hazzebaim, kala Amon. ⁶⁰Solomonwui raobingwui naotunbing kala khorumshimwui otram khangatha̱bing saikora shākathum hangchikoda khani.

⁶¹Hibing hi Tel-melah kala Tel-harsha, Cherub, Addon kala Immer athumram eina hongkharā; kha athumna awo-ayiwui shimkhur kachangkhat, Israel eina maningmakhala kaji, mahāngrarthuwa:

⁶²Delaiahwui naotunbing, Tobiahwui naotunbing, kala Necodawui naotunbing, shātharuk hangmatida khani.

⁶³Pāngmonbingwui naotunbing: Hobaiahwui naotunbing, Hakkozwui naotunbing kala Barzillaiwui naotunbing. Ana Gileadpa Barzillaiwui ngalāva̱bingwui akhali ngakumlaga athumwui mingpho hoihaowa.

⁶⁴Athumna mithotwui lairikli athumwui aming ayanga, kha masamphangthu; chieina makathara yurda athumli pāngmonwui eina khuishoka. ⁶⁵Pāngmon akha Urim kala Thummim eina yangmi khavai maleiranglakha eina tangda, tharmathengmeikap kaji ot chi mazālu da lammungana athumli hānga. ^a a v65 Urim eina Thummim chiya pāngmon khareina khuihaikahai kathara khorkhong china; matheikhamaron pongbingli Varewui eina khamashung khakaso phā khavai singhaisai.

⁶⁶Kazip katonga ngarumlaga thinghangmatida khani shākathum hangtharukna, ⁶⁷Chili lāngda athumwui sha̱nao mayarnao rao thingshini shākathum thumrāda shinina; kala athumwui sha̱nao mayarnao laa kasābing shākhani hangmatida phangāna. ⁶⁸Sigui chi shāshini thumrāda tharukna; gadhā ni chi shākhani hangmatida phangāna. ⁶⁹Ut chi shāmati thumrāda phangāna; gadhā chi thingtharuk shāshini maga̱na.

⁷⁰Shimkhurwui wungva̱ kaikhana ot chiwui vang chigata. Governorna lan kazipli sinā tolla thingkha, koklui hangphangā, kala pāngmonwui kachon shāphangā thumrā chigata. ⁷¹Shimkhurwui wungva̱ kaikhana ot chiwui lan kazipli sinā tolla thing maga̱, kala mina lupāsā thingkhani shāshini hangphangā chigata. ⁷²Khangatei mibingna sinā tolla thing maga̱, mina lupāsā thingkhani shāphangā, kala pāngmonwui kachon hangtharukta shini chigata.

⁷³Pāngmonbing, Levinaobing, ngavei khamayonbing, laa kasābing, mi kaikha, khorumshimli otram khangatha̱bing, kala Israel saikorana athumwui keinungli pamhaowa. Kachāng kashine kharā tharan, Israelnaobing athumwui keinungli pama.