Isoomei Ezra Ng'atuutik
Kisoom piik Ng'atuutigap Kwandanyo icheek, ak kitononi ye isoman Ezra kong'eetee karon agoi week asiis komaotenso, ak kiiito Lawiik ng'aleek. Kiirei icheek agobo ne kogas, ago kimwachin kole oam amitwogik, opcheche amitwogik, ak oboiboi, yeityo oriip paornateet eng' emening' che nyigiisen.
8 1Ye kiit arawetap tisap, ki iyumgei piik tugul ko uu agenge eng' ooreet ne mi taitap Oiiwetap Peek, ak koteebee Ezra siriindet koip bukuitap Ng'atuutigap Musa, chooto ki ng'at Kwandanyo agobo Israel. 2Eng' peetuutap tai eng' arawetap tisap, ki ip Ezra tisiindet Ng'atuutik taitap paornateetap murenik, kwonyiik ak piik tugul che kimuuchi konai kiit ne kogas. 3Kosoman, kotoorchin ooreet ne mi taitap Oiiwetap Peek, kong'eetee karon agoi week asiis komaotenso, kogoochi murenik, kwonyiik ak piik tugul che kimuuchi konai. Ki kas piik tugul iit komyee bukuitap Ng'atuutik. 4Ki tonon Ezra siriindet eng' kaataametap keetiik ne kooi ne ki kiyai agobo poisyoni. Ki tonon eng' eunnyi ne po tai Matitia, Shema, Anai, Uriah, Hilkia ak Maaseia; ak eng' eunnyi ne po kaataam, Pedaia, Mishael, Malkia, Hashum, Hashbadana, Zekariah ak Meshulam. 5Ki tyach Ezra bukuit konyeguk piik tugul, amu ki tononi eng' ole-parak ne po piik tugul; kingo tyach, kotononi icheek tugul. 6Ki ilas Ezra Kwandanyo, Kamuktaindet ne oo, ak kiiito piik tugul eunekwak ak kowol kole, “Amen! Amen!” Yeityo kong'uruuk, kotokyi togoochikwak ng'wony, kolasu Kwandanyo.
7Lawiik—Jeshua, Bani, Sherebia, Jamin, Akub, Shabetai, Hodia, Maaseia, Kelita, Azariah, Josabad, Hanani ak Pelaia—ko ki ineeti piik Ng'atuutik yon tononi piik eng' emaisyekwak. 8Kosoman bukuit, Ng'atuutigap Kwandanyo, komyee, kogoochi keiguiyet si konai piik osomaneet.
9Yeityo koleenji Nehemia pounindet, Ezra tisiindet ak siriindet, ak Lawiik che ineeti piik, pichooto tugul, “Peetuuni ko tiliil eng' Kwandang'wong'. Amat oteiye anan oriir.” Amu ki riiryo piik tugul kingo kas ng'aleegap Ng'atuutik. 10Ki leenji Nehemia icheek, “Oba oam amitwogik che chaang', oee kiit ne anyiny, ak oyookchi porotennywa icheek che ma tinyei kiy age tugul ne tetat, amu peetuuni ko tiliil eng' Kwandanyo ne Kiptaiyat. Amat oteiye; amu poiboiyetap Kwandanyo ko kimnateeng'wong'.”
11Ki igaigai Lawiik piik tugul, kole, “Omuung'et, amu peetuuni ko tiliil. Amat oteiye.”
12Ki pa piik tugul koam, koee, kogoochigei porotennywa, ak koboiboitu eng' poiboiyet ne oo, amu ki nai ng'aleek che kigiboorwa.
Riibisyetap Igoortap Keryosyek
13Eng' peetuut ne po aeng', ki iyumgei metowegap kap piik tugul, kobooto tisiik ak Lawiik, ole mi Ezra siriindet si konai ng'aleegap Ng'atuutik. 14Ki kogeer ki kisir eng' Ng'atuutik kole ki ng'at Kwandanyo eng' Musa: nyolu piigap Israel komeny keryosyek eng' igoortap arawetap tisap. 15Nyolu komwaita ak koyookto ng'olyoondoni eng' nganasoosyekwak tugul ak Jerusalem: “Oba tuloonook ak oip mooriigap mseituni, mseituni ne po timdo, keetiigap murti, sosik ak keetiik alak che nyigiisen, si keyai keryosyek, ko uu ye kisiirto.”
16Ki pa piik saang', koip mooriik, ak koteech keryosyek—kityo chii eng' koonnyi parak, eng' kokwotinwek, eng' kokwotinwegap kootap Kwandanyo, ak eng' kurumosyek che mi Oiiwetap Peek ak Oiiwetap Ephraim. 17Ki teech paornateet komugul ne po exiliik che kiga koweekta keryosyek, komeny eng' icheek; ki ma kigoyai piigap Israel ko uu nooto kong'eetee peetuusyegap Joshua weeriitap Nun agoi peetuunooto, ak ki oo poiboiyennywa miising'. 18Peet age tugul, kong'eetee peetuut ne po tai agoi ne po let, kosoman Ezra bukuitap Ng'atuutigap Kwandanyo. Ki riip igoorata peetuusyek tisap, ak eng' peetuut ne po sisiit koyai tuiyetap kaming'inetapkei, ko uu ye magaat Ng'atuutik.