Nehemiah 10

10 ¹Ara chiwuitungli mahor nam kahaibing chiya: Hacaliahwui nao rammunga Nehemiah, kala Zedekiah, ²Seraiah, Azariah, Jeremiah, ³Pashhur, Amariah, Malchijah, ⁴Hattush, Shebaniah, Malluch, ⁵Harim, Meremoth, Obadiah, ⁶Daniel, Ginnethon, Baruch, ⁷Meshullam, Abijah, Mijamin, ⁸Ma-aziah, Bilgai, kala Shemaiah. Athum hi pāngmonbingna. ⁹Kala Levinaobing: Azaniahwui nao Jeshua, Henadadwui naomayarabingwui eina Binnui, Kadmiel, ¹⁰kala athumwui achinā ngarābing: Shebaniah, Hodiah, Kelita, Pelaiah, Hanan, ¹¹Mica, Rehob, Hashabiah, ¹²Zaccur, Sherebiah, Shebaniah, ¹³Hodiah, Bani, kala Beninu. ¹⁴Mibingwui kathānabing: Parosh, Pahath-moab, Elam, Zattu, Bani, ¹⁵Bunni, Azgad, Bebai, ¹⁶Adonijah, Bigvai, Adin, ¹⁷Ater, Hezekiah, Azzur, ¹⁸Hodiah, Hashum, Bezai, ¹⁹Hariph, Anathoth, Nebai, ²⁰Magpiash, Meshullam, Hezir, ²¹Meshezabel, Zadok, Jaddu-a, ²²Pelatiah, Hanan, Anaiah, ²³Hoshea, Hananiah, Hasshub, ²⁴Hallohesh, Pilha, Shobek, ²⁵Rehum, Hashabnah, Ma-aseiah, ²⁶Ahiah, Hanan, Anan, ²⁷Malluch, Harim, kala Baanah.

Mibingna Avāli Khalattali Khalaphaina

²⁸Mibing katai, pāngmonbing, Levinaobing, ngavei khamayonbing, laa kasābing, khorumshimli otram khangatha̱bing, kala ithumwui Avāwui ainwui vang ngaleiwui mibing saikorawui eina ngatei ngasak kahai saikora, athumwui preiva̱ ngarā, naomayara ngarā, kala naongalāva̱ ngarābingli, theikakhui kala theishingkakhui kakā mi saikorana, ²⁹hibing saikorana athumwui achinā khangambing longli ngarumhailaga, khonkashi kala khangashit eina khalaphaida, awui rao Moseswui eina mihaida khalei ithumwui Avāwui ain shurkhavai, kala ithumwui Proho Avāwui ningkhami saikora, awui shiyan-chikan kala awui ain mayonda sākhavai ngashithaira. ³⁰Ithumna ithumwui naongalāva̱ ngarāli ithumwui kuikhamareili khalei mibingli ngakum khavai mamila, kala athumwui naongalāva̱ ngarāli ithumwui naomayara ngarāwui vang makhuimara da ngashithai. ³¹Ngaleiwui mibingna sabbaththang ot lah mā yorkhavai khuirā tharan, ithumna sabbaththang lah kathara zimiksho khipānakha athumwui eina malomara. Kala kum kashine kachida ithumna ngalei chi ngasāmira kala leiman saikora khamasaimira.

³²Kala ithumwui Avāwui shimwui otramwui vang kum kachida ounce akhawui kachishata lupā mikhavai ithumna ngashithaira: ³³awui mangāli chikatching maiyan khamui, thangkachida tharāzāt kachigat kala rikkatā kachigat, sabbaththang, changwokthang, kala phanitthangwui kachigat, kathara kachigatbing, kala Israelwui vang pheomi khavai suiham kachigatbing, ithumwui Avāwui shimwui ot saikorawui vangna. ³⁴Ithum, pāngmonbing, Levinaobing, kala mibingna, avāva̱ ngarā shimkhur eina kum kachida retmi kahai atamli ithumwui Avāwui shimli khuirā khavai, ithumwui Avāwui hanphuttungli riktā khavai, ainli kapihai athishurda, thingwui kachigatwui vang kalā yanga. ³⁵Ithumnala ithumwui ngaleiwui matheikhare, kala thingrong saikorawui atheiwui matheikhare, kum kum eina ithumwui Avāwui shimli khuirā khavai khangashit sāra. ³⁶Ithumnala ainli kapi kahai athishurda, ithumwui naomayarabingwui pharākhare kala ithumwui sha̱keiwui pharākhare, kala ithumwui sei kala yaowui pharākhare, ithumwui Avāwui shimli, chili otram ngatha̱ pāngmonbingli khuirāra. ³⁷Ithumnala ithumwui hātkhuikhare, ithumwui vākshot, thingrong saikorawui athei, drakhāra̱, kala thao chi pāngmonbingli, ithumwui Avāwui shimwui lanshimli khuirāra; kala ithumwui ngaleiwui tithe chi Levinaobingli khuirāra, kaja Levinaobingna ithumwui luikhavā keinung saikorali tithe ngashaikhui. ³⁸Aaronwui ara̱-azā pāngmon akha, Levinaobingna tithe ngashaikhui tharan athumli ngasora, kala Levinaobingna chiwui tithe chi ithumwui Avāwui shimli, lanshim zātshimli khuikāra. ³⁹Israelwui mibing kala Levinaobingna māngum, drakhāra̱, kala thao kachigat chi katharapamwui khorkhong khalei lanshimli khuirāra, chili otram ngatha̱ pāngmonbing, ngavei khamayonbing, kala laa kasābing pama. Ithumna ithumwui Avāwui shim machihohailakmara.