Nehemiya 10 FHB Father's Heart Bible™

10 ¹Amana batu bana básya kidimbu kya bawu bakála: Nehemiya pfumu wa kinzunga, mwana wa Hakaliya, yi Zedekiya, ²Seraiya, Azaliya, Yelemiya, ³Pasuli, Amaliya, Malakiya, ⁴Hatusi, Sebaniya, Maluki, ⁵Halimi, Melemoti, Obadiya, ⁶Tanyela, Ginetoni, Baluki, ⁷Mesulami, Abiya, Miyamini, ⁸Maziya, Biligayi, yi Semaya. Batu meni bakála banganga Nzambi. ⁹Amana balefi: Yesuwa mwana wa Azaniya, Binuwi wa muna bana ba Henadadi, Kadimiyeli, ¹⁰amana balefi bakwawu: Sebaniya, Hodiya, Kelita, Pelaya, Hanani, ¹¹Mika, Lehobi, Hasabiya, ¹²Zakuli, Selebiya, Sebaniya, ¹³Hodiya, Bani, yi Beninu. ¹⁴Bapfumu ba batu: Palosi, Pahati-Mowabi, Elami, Zatu, Bani, ¹⁵Buni, Azigadi, Bebayi, ¹⁶Adoniya, Bigivayi, Adini, ¹⁷Ateli, Ezekyasi, Azuli, ¹⁸Hodiya, Hasumi, Bezayi, ¹⁹Halifi, Anatoti, Nebayi, ²⁰Magipiyasi, Mesulami, Heziri, ²¹Mesezabeli, Satoki, Yaduwa, ²²Pelatiya, Hanani, Anaya, ²³Hoseya, Hananiya, Hasubi, ²⁴Halohesi, Pila, Sobeki, ²⁵Lehumi, Hasabana, Maaseya, ²⁶Ahiya, Hanani, Anani, ²⁷Maluki, Halimi, yi Baana.

Batu Basidi Lusilu kwena Tata

²⁸Batu bana basyadi—banganga Nzambi, balefi, mintadi mya mielu, basingi, basadi ba nzu ya Nzambi, yi boosu bana badihambula yi batu ba makanda ma tsi, kikuma kya mitsiku mya Tata wetu—kumosi yi bakhetu ba bawu, bana ba bayakala yi bana ba bakhetu, mutu wosu wena yi nzayilu yi ngangu, ²⁹boosu bawu bákhundakana yi bakhaka ba bawu ba luzitu, amana bákasama mu lusingu yi mu ndefi mu kulanda mitsiku mya Tata wetu mina máhangama mu nzila ya Moyize musadi wandi, amana mu kulunda yi kusala mikuku myosu mya Pfumu Tata wetu, yi mazengolo mandi yi mitsiku myandi. ³⁰Tusidi lusilu ni twahánaku bana betu ba bakhetu mu dikwela kwena makanda mana matuzyungidi, amana twabóngaku bana ba bakhetu ba bawu kikuma kya bana betu ba bayakala. ³¹Yuka ni batu ba tsi banata bima holo bule mu kutekisa mu kilumbu kya Sabata, tukasúmbaku kwena bawu mu kilumbu kya Sabata holo mu kilumbu kyosu kyahedila. Kosu mvula ya tsambwadi tukayámbula tsi yavunda amana tukakátula pfuka zoosu.

³²Twasidi lusilu phi ni tuhána kimosi kya nana kya onsi ya phalata kosu mvula kikuma kya kisalu kya nzu ya Tata wetu: ³³kikuma kya mapha mana masyámina ku thwala yandi, kikuma kya mulambu wa bule wa kosu kilumbu yi bimenga bya kuyoka, kikuma kya bimenga bya Sabata, bya ngonda ya pha, yi bya mikinzi, kikuma kya makabu mahedila, yi bimenga bya masumu mu kukatula masumu ma Kiseledi—kikuma kya kisalu kyosu kya nzu ya Tata wetu. ³⁴Betu, banganga Nzambi, balefi, yi batu, tubeti zeki kikuma kya mulambu wa miti, hanga twanata wawu ku nzu ya Tata wetu mu bikanda bya betu, mu matangwa mázengama kosu mvula, ndangu twayoka hana mesa ma kimenga ma Tata wetu, bwosu básonika mu mitsiku. ³⁵Twasidi lusilu phi ni tunata mbutu ya theti ya mafu ma betu yi mbutu ya theti ya bibundu byosu bya miti myosu, mvula muna mvula, ku nzu ya Tata wetu. ³⁶Tukanáta phi bana betu ba batsomi yi bibulu bya batsomi, bwosu básonika mu mitsiku, yi batsomi ba bangombi za betu yi ba mameme ma betu, ku nzu ya Tata wetu, kwena banganga Nzambi bana bisi sala kuna. ³⁷Tukanáta kitini kya theti kya kithoba kya betu, makabu ma betu, bibundu bya miti myosu, vinu ya pha, yi masi, kwena banganga Nzambi, ku nzu za kulundila bima bya nzu ya Tata wetu; amana kimosi kya kumi kya tsi ya betu kwena balefi, mukuma balefi bawu bisi bonga kimosi kya kumi muna mavula moosu metu mana bisi sala bilanga. ³⁸Nganga Nzambi mosi wa muna butuka dya Loni kakhúndakana yi balefi tangwa babonga kimosi kya kumi, amana balefi bakanáta kimosi kya kumi kya kyawu ku nzu ya Tata wetu, ku nzu za kulundila bima bya mukunzu wa mbongu. ³⁹Batu ba Kiseledi yi balefi bakanáta makabu ma bule, vinu ya pha, yi masi, ku nzu za kulundila bima bya kikumbu, kuna bisi zinga banganga Nzambi bana bisi sala, mintadi mya mielu, yi basingi. Tukaléwulaku nzu ya Tata wetu.