Nehemiah 10

10 ¹Àwọn tí wọ́n sì fi èdìdì sí i ni: Nehemáyà baálẹ̀, ọmọ Hakaláyà, àti Sedekáyà, ²Seráyà, Asaráyà, Jeremáyà, ³Paṣuri, Amaráyà, Malkiáyà, ⁴Hattuṣi, Ṣebaníyà, Malluki, ⁵Harimu, Meremoti, Obadáyà, ⁶Daníẹ̀lì, Ginnetoni, Baruku, ⁷Meṣullamu, Abíyà, Mijamini, ⁸Maasáyà, Biligai, àti Ṣemáyà. Wọ̀nyí ni àwọn àlùfáà. ⁹Àti àwọn ọmọ Lefi: Jeṣua ọmọ Asanáyà, Binnui nínú àwọn ọmọ Henadadi, Kadmieli, ¹⁰àti àwọn ọmọ Lefi ẹlẹgbẹ́ wọn: Ṣebaníyà, Hodiáyà, Kelita, Pelaáyà, Hanani, ¹¹Mika, Rehobu, Haṣabáyà, ¹²Sakkuri, Ṣerebáyà, Ṣebaníyà, ¹³Hodiáyà, Bani, àti Beninu. ¹⁴Àwọn olórí àwọn ènìyàn: Paroṣi, Pahati-moabu, Elamu, Sattu, Bani, ¹⁵Bunni, Asgadi, Bebai, ¹⁶Adoníyà, Bigfai, Adini, ¹⁷Ateri, Hesekáyà, Assuri, ¹⁸Hodiáyà, Haṣumu, Besai, ¹⁹Harifu, Anatoti, Nebai, ²⁰Magpiaṣi, Meṣullamu, Hesiri, ²¹Meṣesabeli, Sadoku, Jaddua, ²²Pelatáyà, Hanani, Anaáyà, ²³Hoṣea, Hananáyà, Haṣubu, ²⁴Halloheṣi, Pilha, Ṣobeki, ²⁵Rehumu, Haṣabna, Maaseáyà, ²⁶Ahiáyà, Hanani, Anani, ²⁷Malluki, Harimu, àti Baanà.

Àwọn Ènìyàn Dì Ara Wọn Pọ̀ mọ́ Baba

²⁸Àwọn ènìyàn tí ó kù—àwọn àlùfáà, àwọn ọmọ Lefi, àwọn olùṣọ́nà, àwọn akọrin, àwọn ìránṣẹ́ tẹ́mpìlì, àti gbogbo àwọn tí wọ́n ya ara wọn sọ́tọ̀ kúrò lọ́dọ̀ àwọn ènìyàn ilẹ̀ náà nítorí òfin Baba wa—pẹ̀lú àwọn aya wọn, àwọn ọmọkùnrin àti àwọn ọmọbìnrin wọn, olúkúlùkù ẹni tí ó ní ìmọ̀ àti òye, ²⁹gbogbo wọn wọ̀nyí darapọ̀ mọ́ àwọn ọ̀tọ̀kùlú ẹlẹgbẹ́ wọn, wọ́n sì fi ègún àti ìbúra dì ara wọn láti máa tẹ̀lé òfin Baba wa tí a fi fún wọn láti ọwọ́ Mose ìránṣẹ́ rẹ̀, àti láti máa pa gbogbo àṣẹ Baba wa Olódùmarè mọ́ kí wọ́n sì máa ṣe wọ́n, àwọn ìdájọ́ rẹ̀ àti àwọn ìlànà rẹ̀. ³⁰Àwa ṣèlérí pé àwa kì yóò fi àwọn ọmọbìnrin wa fún àwọn ènìyàn tí ó yí wa ká ní ìgbéyàwó, bẹ́ẹ̀ ni àwa kì yóò gba àwọn ọmọbìnrin wọn fún àwọn ọmọkùnrin wa. ³¹Bí àwọn ènìyàn ilẹ̀ náà bá mú ọjà tàbí ọkà wá láti tà ní ọjọ́ Ìsinmi, àwa kì yóò rà á lọ́wọ́ wọn ní ọjọ́ Ìsinmi tàbí ní ọjọ́ mímọ́ kankan. Ní ọdún keje kọ̀ọ̀kan àwa yóò jẹ́ kí ilẹ̀ náà sinmi, àwa yóò sì dá gbogbo gbèsè sílẹ̀.

³²Àwa pẹ̀lú dì ara wa láti máa san ìdámẹ́jọ áùnsì fàdákà lọ́dọọdún fún iṣẹ́ ilé Baba wa: ³³fún àkàrà tí a gbé kalẹ̀ níwájú rẹ̀, fún ẹbọ ọkà àti ẹbọ sísun ojoojúmọ́, fún àwọn ẹbọ ọjọ́ Ìsinmi, Oṣù Tuntun, àti àwọn àjọ̀dún, fún àwọn ọrẹ mímọ́, àti fún àwọn ẹbọ ẹ̀ṣẹ̀ láti ṣe ètùtù fún Israẹli—fún gbogbo iṣẹ́ ilé Baba wa. ³⁴Àwa, àwọn àlùfáà, àwọn ọmọ Lefi, àti àwọn ènìyàn, dìbò nípa ọrẹ igi, láti máa mú un wá sí ilé Baba wa gẹ́gẹ́ bí ìdílé wa, ní àwọn àkókò tí a yàn ní ọdọọdún, láti máa sun ún lórí pẹpẹ Baba wa, gẹ́gẹ́ bí òfin ti wí. ³⁵Àwa pẹ̀lú ṣèlérí láti máa mú àkọ́so ilẹ̀ wa àti àkọ́so gbogbo èso igi gbogbo wá, ní ọdún dé ọdún, sí ilé Baba wa. ³⁶Àwa yóò sì mú àwọn àkọ́bí àwọn ọmọkùnrin wa àti ti àwọn ẹran ọ̀sìn wa wá, gẹ́gẹ́ bí a ti kọ ọ́ sínú òfin, àti àwọn àkọ́bí agbo ẹran àti agbo àgùntàn wa, sí ilé Baba wa, sí ọ̀dọ̀ àwọn àlùfáà tí ń ṣiṣẹ́ níbẹ̀. ³⁷Àwa yóò mú àkọ́kọ́ ìyẹ̀fun wa, àwọn ọrẹ wa, èso gbogbo igi, wáìnì tuntun, àti òróró wá fún àwọn àlùfáà, sí àwọn yàrá ìkótọ́jú ilé Baba wa; àti ìdámẹ́wàá ilẹ̀ wa fún àwọn ọmọ Lefi, nítorí àwọn ọmọ Lefi ni wọ́n ń gba ìdámẹ́wàá ní gbogbo ìlú oko wa. ³⁸Àlùfáà kan tí ó jẹ́ àtẹ̀lé Aaroni yóò bá àwọn ọmọ Lefi wà nígbà tí wọ́n bá ń gba ìdámẹ́wàá, àwọn ọmọ Lefi yóò sì mú ìdámẹ́wàá nínú rẹ̀ gòkè wá sí ilé Baba wa, sí àwọn yàrá ìkótọ́jú ilé ìṣúra. ³⁹Àwọn ọmọ Israẹli àti àwọn ọmọ Lefi yóò mú àwọn ọrẹ ọkà, wáìnì tuntun, àti òróró wá sí àwọn yàrá ìkótọ́jú níbi tí a ti ń pa àwọn ohun èlò ibi mímọ́ mọ́, níbi tí àwọn àlùfáà tí ń ṣiṣẹ́, àwọn olùṣọ́nà, àti àwọn akọrin ń gbé. Àwa kì yóò gbàgbé ilé Baba wa.