ነህምያ 10 FHB Father's Heart Bible™

10 ¹እቶም ዝሓተሙ ድማ እዚኣቶም እዮም፦ ነህምያ እቲ ሹም ወዲ ሓካልያን ሴዴቅያስን፥ ²ሰራያ፥ ኣዛርያስ፥ ኤርሚያስ፥ ³ጳሽሁር፥ ኣማርያ፥ ማልክያ፥ ⁴ሃጡሽ፥ ሸባንያ፥ ማሉክ፥ ⁵ሓሪም፥ መሬሞት፥ ኣብድዩ፥ ⁶ዳንኤል፥ ጊነቶን፥ ባሩክ፥ ⁷መሱላም፥ ኣብያ፥ ሚያሚን፥ ⁸መዓዝያ፥ ቢልጋይ፥ ሳማያን። እዚኣቶም ካህናት ነበሩ። ⁹ሌዋውያን ድማ፦ ኢያሱ ወዲ ኣዛንያ፥ ቢኑይ ካብ ደቂ ሔናዳድ፥ ቃድምኤል፥ ¹⁰ኣሕዋቶም ሌዋውያን ድማ፦ ሸባንያ፥ ሆድያ፥ ቀሊጣ፥ ፐላያ፥ ሓናን፥ ¹¹ሚካ፥ ረኣብ፥ ሓሻብያ፥ ¹²ዛኩር፥ ሸሬብያ፥ ሸባንያ፥ ¹³ሆድያ፥ ባኒ፥ በኒኑ። ¹⁴ሓለቓ ህዝቢ ድማ፦ ጳሮሽ፥ ጳሓት ሞኣብ፥ ዔላም፥ ዛቱ፥ ባኒ፥ ¹⁵ቡኒ፥ ኣዝጋድ፥ ቤባይ፥ ¹⁶ኣዶንያስ፥ ቢግዋይ፥ ዓዲን፥ ¹⁷ኣጤር፥ ሕዝቅያስ፥ ዓዙር፥ ¹⁸ሆድያ፥ ሓሱም፥ ቤሳይ፥ ¹⁹ሓሪፍ፥ ኣናቶት፥ ኔባይ፥ ²⁰ማግጲዓሽ፥ መሱላም፥ ሔዚር፥ ²¹መሼዛብኤል፥ ሳዶቅ፥ ያዱዓ፥ ²²ፐላጥያ፥ ሓናን፥ ዓናያ፥ ²³ኣውሴ፥ ሃናንያ፥ ሓሱብ፥ ²⁴ሃሎሄሽ፥ ጲልሓ፥ ሾቤቅ፥ ²⁵ረሑም፥ ሓሻብና፥ መዓስያ፥ ²⁶ኣሒያ፥ ሓናን፥ ዓናን፥ ²⁷ማሉክ፥ ሓሪም፥ በዓናን።

እቲ ህዝቢ ንኣቦ ተመባፅዐ

²⁸እቲ ዝተረፈ ህዝቢ፥ ካህናት፥ ሌዋውያን፥ ሓለውቲ ደገ፥ መዘምራን፥ ኣገልገልቲ ቤተ መቕደስን፥ ኵሎም እቶም ምእንቲ ሕጊ ኣቦና ኻብ ህዝብታት እተን ሃገራት ዝተፈለዩን፥ ምስ ኣንስቶምን ደቆምን ኣዋልዶምን፥ ፍልጠትን ምስትውዓልን ዘለዎም ኵሉ፥ ²⁹እዚኣቶም ኵላቶም ምስ ኣሕዋቶም ክቡራት ተፀንበሩ፤ ነቲ ብሙሴ ባርያ እግዚኣብሄር ዝተውሃበ ሕጊ ኣቦና ኽስዕቡ፥ ንኵሉ ትእዛዛት ጐይታና ኣቦ፥ ንፍርድታቱን ንሕጋጋቱን ድማ ኽሕልዉ ክገብሩ ድማ፥ ብመርገምን ብመሓላን ተኣሰሩ። ³⁰ንኣዋልድና ነቶም ኣብ ዙርያና ዘለዉ ህዝብታት ከም ዘይንህበን፥ ኣዋልዶም ድማ ንደቅና ኸም ዘይንወስድ፥ ተመባፅዕና። ³¹እቶም ህዝቢ እታ ምድሪ ብሰንበት ንምሻጥ ኣቑሑ ወይ እኽሊ እንተ ኣምፅኡ፥ ብሰንበት ወይ ብዝኾነ ቅድስቲ መዓልቲ ካብኣቶም ከም ዘይንሽምት ተመባፅዕና። በብሻውዓይ ዓመት ድማ ነታ ምድሪ ኸነዕርፋን ኵሉ ዕዳ ኽንሓድግን ኢና።

³²ንኣገልግሎት ቤት ኣቦና ድማ፥ በብዓመት ኣርባዕተ ግራም ብሩር ክንህብ ኣብ ነፍስና ትእዛዝ ገበርና፦ ³³ነቲ ኣብ ቅድሚኡ ዝቕረብ እንጀራ፥ ንናይ ዕለት ናይ እኽሊ ቝርባንን ንዝቃፀል መስዋእትን፥ ንሰንበትን ንወርሒ እትወፀላ በዓልን ንበዓላትን ዝኸውን መስዋእቲ፥ ንቅዱሳት መባእን ንስርየት ሓጢኣት እስራኤል ዝኸውን መስዋእቲ ሓጢኣትን፥ ንኵሉ ዕዮ ቤት ኣቦና ዝኸውን እዩ። ³⁴ንሕና ካህናትን ሌዋውያንን ህዝብን ድማ፥ ከምቲ ሕጊ ዝብሎ፥ ኣብ መሰውኢ ኣቦና ኽነንድዶ፥ ነቲ መስዋእቲ ዕንፀይቲ በብዓሌትና ኣብ ዝተወሰነ ጊዜ በብዓመት ናብ ቤት ኣቦና ኸነምፅኦ፥ ዕፃ ኣውደቕና። ³⁵በዅሪ ፍረ ምድርናን በዅሪ ፍረ ኵሉ ኦምን ኵሉ ድማ፥ በብዓመት ናብ ቤት ኣቦና ኸነምፅእ ተመባፅዕና። ³⁶ከምቲ ኣብ ሕጊ ተፅሒፉ ዘሎ ድማ፥ ነበዅሪ ደቅናን እንስሳናን፥ ነበዅሪ ከፍትናን ኣባጊዕናን ናብ ቤት ኣቦና ናብቶም ኣብኡ ዘገልግሉ ካህናት ከነምፅእ ኢና። ³⁷ቐዳማይ ብዅዕናን፥ መባእናን፥ ፍረ ኵሉ ኦምን፥ ወይንን ዘይትን ናብ ካህናት ናብ መዛግብ ቤት ኣቦና ኸነምፅእ ኢና፤ ዓስራት ምድርና ድማ ናብ ሌዋውያን፤ እቶም ሌዋውያን ኣብ ኵለን ሓረስቶት ዘለዋ ኸተማታትና ዓስራት ይእክቡ እዮም እሞ። ³⁸ካብ ኣሮን ዝተወለደ ካህን ድማ ምስቶም ሌዋውያን ዓስራት ክእክቡ እንተለዉ ምሳታቶም ይኸውን እዩ፤ እቶም ሌዋውያን ከዓ ካብቲ ዓስራት ዓስራት ናብ ቤት ኣቦና ናብ መዛግብ መዝገብ ከደይብዎ እዮም። ³⁹ደቂ እስራኤልን ሌዋውያንን ድማ፥ መባእ እኽልን ወይንን ዘይትን ናብቲ ኣቑሑ መቕደስ ዘለዎ መዛግብ፥ ናብቲ እቶም ዘገልግሉ ካህናትን ሓለውቲ ደገን መዘምራንን ዝቕመጡሉ ኸምፅኡ እዮም። ንቤት ኣቦና ኸዓ ሸለል ኣይክንብሎን ኢና።