Haokaphok 18

18 ¹Chitharan ithumwui Avāna Mamrewui shirimthing ngalemli Abrahamli rāchithei; ana ngashunwui kasā tharan awui kachonshim khāmongli apama. ^a a v1 Kadhara Kachama saikorali ithumwui Avāna awui naongarāna samphangshapki apongli samphanga — mibing thada, mei kala meikhamli, kazingrao thada. Hili Abrahamli rā kahai chiya ithumwui Avāna, awui naongarāli leikashi eina atam kachida phāchinga chi. ²Ana yangkakā tharan, awui ngalemli mi kathum khanganing chi thei. Athumli theilaga, awui kachonshim khāmongwui eina athumli samphang khavai yongvāda ngaleili kui mashunzanga. ³Ana hānga, "O iwui Avā, ina nawui mikyanli mayāngaiakha, ina nawuili kapona, naraowui eina mangaruivāhaialu. ⁴Tara̱ ngahom khuirāda nathumwui phei pheoranu, kala thingrong azingli ngasāmranu. ⁵Ina zāt ngahomkha khuirāda, nathum makānthuluida nathumwui ning ringphā ngasakranu, kaja nathum naraoli rāhaira." Athumna hānga, "Nana kahāng chitharanu."

⁶Abrahamna hengsāda kachonshimli Sarahli vai, kala hānga, "Thakha, manaktak kahai mathir luk kathum khuilu, nailu, kala khamui sālu." ⁷Abrahamna sei ashangva̱li yongvai, seinao nganui kala kaphā akha khuilaga, raoli mi, ana chi thaklāk eina ngarānmi. ⁸Ana makhan, seina̱, kala seinao ngarānkahai chi khuilaga, mibingwui mangāli haimi, kala athumna kazā tharan thingrong azingli athumwui ngalemli nganinga.

⁹Athumna ali ngahāna, "Napreiva̱ Sarah kali leikhala?" "Chili, kachonshimli," da ana hānga.

¹⁰Chieina ithumwui Avāna hānga, "Ina kachangkhatta zingkum khangatei hi atam chili nawuili latungra, kala napreiva̱ Sarahna mayarnao akha leira." Sarahna awui khanukli kachonshim khāmongli nganākhui.

¹¹Abraham eina Sarahna sarhaida, zingkum okpeihairasai; Sarahli preiva̱bingwui shiyan phāhaowa. ¹²Sarahna awui wuklungli mana̱da hānga, "Ina chotserhai thili, iwui khavāla sarkahai eina, ina khamathān samphangrala?"

¹³Chieina ithumwui Avāna Abrahamli hānga, "Khisāda Sarahna mana̱da, 'Ina sarkahai eina, kachangkhatta naopharāra kajila?' da hāngkhala? ¹⁴Nawui Avāwui vang khikha sakkhanā leila? Ina ngarān kahai atam chili, zingkum khangatei nawuili latungra, kala Sarahna mayarnao akha leira."

¹⁵Sarahna mamayāmada hānga, "Ina mana̱mana," kaja ana ngacheehaira. Ana hānga, "Maningmana, na mana̱haira."

Sodomshong Yangkakā

¹⁶Mibing china chiwui eina zatphoklaga Sodomshong yangkatunda, kala Abrahamna athumli chihovā khavai athum khangaso zata.

¹⁷Chitharan ithumwui Avāna hānga, "Ina sākhavai ot chi Abrahamwui eina ina thumra kajila, ¹⁸Kaja Abrahamna yur hakmahā kala pangshapa akha ngasāhaora, kala okathuiwui miyur saikorana awui mangā eina sokhami samphangra? ¹⁹Kaja ina ali kapangkakhuina, chieina ana awui thili awui naongarā kala awui shimkhur mili, mashun eina khamashung ot sāda iwui apong mayon khavai chitheira; chieina Abrahamli ina ngashit kahai chi ina ungshungmira." ²⁰Chieina ithumwui Avāna hānga, "Sodom eina Gomorrahli mamayāwui chupchup khamatui hakmahālakna, kala athumwui morei phungmatailakna, ²¹chieina ina tunglaga, ili rā chupchup khamatui athishurda athumna katonga sākahaila da yangra; chi maningakha, ina theira."

²²Chithāda mibing china apam chiwui eina ngareilaga Sodomshong vai, kha Abrahamva ithumwui Avāwui mangāli nganingda pamsai. ²³Chiwui thili Abrahamna vānganaida hānga, "Nana khamashung mili makhayābing eina ngasoda khuithuirala? ²⁴Kalikhada keinung chili khamashung mi hangphangā leiakha, chiwui alungli khalei khamashung mi hangphangāwui vang, apam chi mashivāmla nana khuithuirala? ²⁵Khamashung mili makhayā eina ngasoda shaothatda, khamashunga makhayā thāda kathānada, chikathā ot na masāmilu! Chikathā ot na masāmilu! Okathui katongawui bichar kasāna mashun bichar masāmimaralā?"

²⁶Ithumwui Avāna hānga, "Ina Sodom keinung chiwui alungli khamashung mi hangphangā samphangakha, athumwui vang apam katonga chi ina shivāra."

²⁷Abrahamna hānga, "I chifa eina hotlā maningmāng leilala, ina iwui Avāli khamatui khavai ngazekkahaina.

²⁸Kalikhada khamashung mi hangphangāli phangā vātlakha, phangāwui vang nana keinung katonga chi sāshimānrala?" Kala ithumwui Avāna hānga, "Apam chili hangmatida phangā samphangakha, ina chi masāshimānmara."

²⁹Ana ali hāngluishita, "Kalikhada apam chili hangmati samphangakha kathāra?" Ana hānga, "Hangmatiwui vang ina masāmara."

³⁰Abrahamna hānga, "Iwui Avā malung mavātmialu, ina hānghaoga. Kalikhada apam chili thumrā samphangakha kathāra?" Ana hānga, "Apam chili thumrā samphangakha, ina masāmara."

³¹Abrahamna hānga, "Ina iwui Avāli khamatui khavai ngazekkahaina; kalikhada apam chili maga̱ maningmāng samphangakha kathāra?" Ana hānga, "Maga̱wui vang, ina masāshimānmara."

³²Chiwui thili ana hānga, "Iwui Avā malung mavātmialu, akhashidamāng ina hānghaoga: kalikhada apam chili tharā maningmāng samphangakha kathāra?" Kala ithumwui Avāna hānga, "Tharāwui vang, ina masāshimānmara."

³³Ithumwui Avāna Abrahamli hāngchithei kahaiwui thili, ana thuihaowa; Abrahamna awui apamli latunghaowa.