Konyoonji Kwandanyo Abraham
Ki nam toek somok tunisietap Abraham ne chaakta, ak koweeko age arorutyetap weeriit. Konyeis Sarah let eng' emait ak kinamei ineendet eng' ung'oot. Yeityo koteebe Abraham Kwandanyo kong'etee piik che po iman tamanwogik mut che mi Sodom agoi taman.
Ng'alaali Kwandanyo eng' mustarisyek 10, 13–15, 17–21, 26, 28–32
18 1Ki iboorchigei Kwandanyo Abraham eng' keetiik che po Mamre, ye kita kotebi eng' kurgeetap emainnyi eng' kiptoret peet. a a v1 Eng' Testamente ne Kiigil komugul, ko iboorchigei Kwandanyo eng' iitwogik che imuuchi lagokyik komeet — ko uu piik, eng' maat ak poliit, ko uu malaikaiyat. Chiichooto ne nyoonji Abraham yu ko Kwandanyo, ne ki isupei lagokyik eng' chamyet koigeny. 2Ki ng'eet konyekyik parak, ak kogeer murenik somok che tononi neegit ineendet. Ye kagogeer icheek, kolabat eng' kurgeetap emainnyi si komeet icheek, ak kogutuny ng'wony. 3Ki le, “Kiptaiyannyu Kwanda, ngot ko kaanyooru chameet eng' taing'ung', asoomin ale, mesiirto otwogeng'ung'. 4Ingeibwok peek che tutigin, si oun keelyekwok, ak omuuny eng' keetit. 5Aibun magatyat kitigin, si obiyo saboonwekwok, ko tomo obendi, amu kagobwonji otwogeng'ung'.” Ki le, “Yai ko uu ye kimwa.”
6Ki chaakta Abraham koba emait ole mi Sarah, ak kole, “Chaakte labat, inam kondagik che myach che ging'eete pounik tamanwogik aeng' ak mut, ichuuch, ak iyae magatiinik.” 7Ki rwe Abraham koba tuuga, ak konam moita ne tenden ne myee, ak kogoito weeroto, ne ki chaakta kochop. 8Ki nam mwaitap cheego, ak cheego, ak moita ne ki kagochop, ak koinde eng' taitap murenik, ak kotonon neegit ineendet eng' keetit ye kita koamei.
9Ki teebee icheek koleenji, “Ole mi Sarah kwoonyeng'ung'?” “Yon, eng' emait,” kole.
10Ki le Kwandanyo, “Awekuni ole imi iman eng' sait ni eng' kenyiit ne nyoonei, ak kosich Sarah kwoonyeng'ung' weeriit.” Ki kas Sarah eng' kurgeetap emait ne mi letyeenyi.
11Kiga koosit Abraham ak Sarah, kiga kotar kenyiisyek; kagobata Sarah ortinwegap kwonyiik. 12Ki roori Sarah eng' muguleldonyi, kole, “Ye kagong'etyo, tos anyoor boiboindo, ak koosit kiptaiyannyu?”
13Ki leenji Kwandanyo Abraham, “Amu nee si roori Sarah, kole, ‘Tos asich iman lakweet, ye kagoosit?’ 14Tos mi kiy age tugul ne uui eng' Kwandang'ung'? Awekuni ole imi eng' sait ne kiigil eng' kenyiit ne nyoonei, ak kosich Sarah weeriit.”
15Ki eesyo Sarah, kole, “Ma aroori,” amu ki iywei. Kole, “Acha, ki iroori.”
Keeroot Komanda Sodom
16Ki ng'eet murenik eng' olooto, ak kogeer ng'wony komanda Sodom, ak kibendi Abraham kobooto icheek si koisteyi.
17Ki le Kwandanyo, “Tos auny Abraham ne amache ayai, 18amu egu iman Abraham pororyet ne oo ak ne kiim, ak koberuurotin pororyosyek tugul che po ng'wony eng' ineendet? 19Amu ki alewen ineendet, si kong'at lagokyik ak kaameenyi che mi let, koriip ooreennyu eng' koyai ne lititen ak imanda, si ayai kosulda ne ki kayomisyi Abraham.” 20Ki le Kwandanyo, “Oo waagaatap Sodom ak Gomorah, ak ya miising' tengekwogikwak, 21ale aiiti ng'wony si ageer, ngo ki koyai komugul ko uu waagaat ne kagonyoonwo; ngo ma uu nooto, anai.”
22Ki wirtoogei murenik eng' olooto, ak koba komanda Sodom, ago ki tebi Abraham kotononi eng' taitap Kwandanyo. 23Ki riik Abraham ak kole, “Tos ibuuktoi iman piik che imanat kobooto kiptengeginik? 24Ngo mi piik che imanat konom eng' nganaseet—tos ibuuktoi iman, ak ma iriiree olooto amu piik che imanat konom che mi oriit? 25Loo nooto eng' inyee ibar piik che imanat kobooto kiptengeginik, koger icheek agenge! Loo nooto eng' inyee! Tos ma yai Kirwoogindetap ng'wony komugul ne imanat?”
26Ki le Kwandanyo, “Ngo anyoor piik che imanat konom eng' nganaseetap Sodom, ariiree olooto komugul amu icheek.”
27Ki le Abraham, “Kaatwek ang'alaalji Kiptaiyannyu Kwanda, agot ye aa ng'ung'unyek ak oreek kityo.
28Ngo rarta piik che imanat konom mut. Tos ing'em nganaseet komugul amu mut?” Ak ki le Kwandanyo, “Ma ang'em ngo anyoor piik tamanwogik ang'wan ak mut yooto.”
29Ki ng'alaalji kogeny: “Ngo kinyoor tamanwogik ang'wan yooto.” Kole, “Amu tamanwogik ang'wan, ma ayai.”
30Ki le Abraham, “Menerech Kiptaiyannyu Kwanda, si ang'alaal. Ngo kinyoor sosom yooto.” Kole, “Ma ayai ngo anyoor sosom yooto.”
31Ki le Abraham, “Amu kaatwek ang'alaalji Kiptaiyannyu Kwanda, ngo kinyoor tamanwogik aeng' kityo yooto.” Kole, “Amu tamanwogik aeng', ma ang'em.”
32Ki le, “Menerech Kiptaiyannyu Kwanda, si ang'alaal kot agenge kogeny: ngo kinyoor taman kityo yooto.” Ak ki le Kwandanyo, “Amu taman, ma ang'em.”
33Ye kagobata Kwandanyo kong'alaal ak Abraham, kowe; ki week Abraham ole menyei.