Amar Pitri Abraham ke sabole ahhise
Tinjon mehman pora Abraham laga jaldi kora mehman-dari loise, aru ekjon pora putro laga vachan aru ekbar koise. Sarah tambu laga pichete hanshe aru narom pora dhora khai. Titia Abraham pora Sodom laga dhormik manuh khan nimite amar Pitri logot pochas pora dos tak dor-daam kore.
18 1Etiya, din laga gorom somoi te Abraham tar tombu laga dorja te bohi thaka homoi te, Mamre laga oak gos khan usorte amar Pitri tar ke dikhai dise. a a v1 Purana Niyom laga sob jagate amar Pitri Tar bacha khan pora lok koribo para rup te dikhai diye — manuh khan nisina, jui aru badal te, ekjon doot nisina. Yate Abraham logot te aha Jon tu amar Pitri ase, Jun pora hodai Tar bacha khan ke morom pora bisari ahhise. 2Tar pora uporte sai kene tar usorte tinjon manuh khara thaka dikhise. Taikhan ke dikhi kene, taikhan ke lok koribole tar tombu laga dorja pora polai ahhi kene matite matha jhukai dise. 3Tai koise, “Moi laga Raja Pitri, jodi moi Apuni laga age te anugrah paise koile, Apuni laga noukar ke chari kene najabi. 4Apuni khan laga theng dhui bole olop pani anibo dibi, aru gos laga nichete aram koribi. 5Moi olop roti anibo, titia Apuni khan age te jabole age te nijor ke taja koribo pare, kilemane Apuni khan laga noukar logot te ahhise.” Taikhan koise, “Tumi kowa nisina koribi.”
6Abraham joldi tombu bhitorte Sarah logot te jai kene koise, “Joldi, pochis pound bhal atta loi kene, eitu makhi kene, roti bonabi.” 7Abraham goru khan logot te polai jai kene, ekta norom aru bhal bacha goru loi kene, noukar ke dise, aru noukar pora eitu joldi bonaise. 8Tai doi, gakhir, aru bonai thaka bacha goru tu loi kene, manuh khan age te rakhise, titia taikhan khai thaka homoi te tai gos nichete taikhan usorte khara hoise.
9Taikhan pora tar ke hudise, “Tumi laga maiki Sarah kot ase?” Tai koise, “Ta te, tombu bhitorte ase.”
10Titia amar Pitri koise, “Moi hosa pora aha saal eitu homoi te tumi logot te wapas ahhibo, aru tumi laga maiki Sarah laga ekta chokra hobo.” Sarah pora tar piche te tombu laga dorja te huni thakise.
11Abraham aru Sarah bura hoi jaise, umor boi jaise; Sarah laga mahina howa tu bondh hoi jaise. 12Sarah nijor bhitorte hahi kene koise, “Moi purana hoi juwa pichete, moi laga mota bhi bura hoi kene, moi khushi pabo naki?”
13Titia amar Pitri pora Abraham ke koise, “Sarah kele hahise, ‘Moi eneka bura hoi kene, hosa pora bacha jonom dibo naki?’ koi kene? 14Tumi laga Pitri karne kiba bisi digdar ase naki? Aha saal thik kora homoi te Moi tumi logot te wapas ahhibo, aru Sarah laga ekta chokra hobo.”
15Sarah mana korise, “Moi haha nai,” koi kene, kilemane tai bhoi lagise. Tai koise, “Nai, tumi hahise.”
Sodom phale sa-a
16Manuh khan ta te pora ulai kene Sodom phale nichete saise, aru Abraham taikhan ke pathai dibole taikhan logote jaise.
17Etiya amar Pitri koise, “Moi ki koribole ase eitu Abraham pora Moi lukai thakibo naki, 18kilemane Abraham hosa pora ekta dangor aru takot thaka desh hobo, aru prithibi laga sob desh khan tar dwara ashirbad pabo? 19Kilemane Moi tar ke basi loise, titia tai tar piche laga bacha khan aru tar ghor manuh khan ke thik aru niyai kaam kori kene Moi laga rasta mani thakibole sikhabo, titia Moi Abraham ke vachan diya tu purah koribo pare.” 20Titia amar Pitri koise, “Sodom aru Gomorrah birodh te kanda-maatha tu dangor ase, aru taikhan laga paap bisi bhari ase, 21etu karne Moi nichete nami kene sabo, Moi logot te aha kanda-maatha pora kowa nisina taikhan pura eneka kaam korise na nai; jodi korise nai koile, Moi janibo.”
22Titia manuh khan ta te pora ghuri kene Sodom phale jaise, kintu Abraham amar Pitri age te khara hoi thakise. 23Titia Abraham usorte ahhi kene koise, “Apuni hosa pora biya manuh logote dharmik manuh ke bhi khotom kori dibo naki? 24Jodi sheher bhitorte pachas dharmik manuh thakile — Apuni hosa pora eitu khotom kori dibo naki, bhitorte thaka pachas dharmik manuh karne hei jaga ke nabachabo naki? 25Biya manuh logote dharmik manuh ke morai dibole, duijon ke eke nisina chalabole, eitu Apuni pora kitia bhi nakoribi! Apuni pora eneka kitia bhi nakoribi! Pura prithibi laga Bisar-korta pora niyai nakoribo naki?”
26Amar Pitri koise, “Jodi Moi Sodom sheher bhitorte pachas dharmik manuh pale, taikhan karne Moi pura jaga ke bachai dibo.”
27Abraham koise, “Moi khali dhula aru chai he hoile bhi, moi laga Raja Pitri logote kotha kobole himot korise.
28Jodi pachas dharmik manuh pora pansta komti hoile. Pans jon karne Apuni pura sheher ke khotom kori dibo naki?” Titia amar Pitri koise, “Jodi Moi ta te chalis-pans jon pale, Moi eitu khotom nokoribo.”
29Tai aru ekbar tar logote kotha koise, “Jodi ta te chalis jon pale.” Tai koise, “Chalis jon karne Moi eitu nokoribo.”
30Abraham koise, “Moi laga Raja Pitri khong nohobi, aru moi ke kobole dibi. Jodi ta te tris jon pale.” Tai koise, “Jodi Moi ta te tris jon pale, Moi eitu nokoribo.”
31Abraham koise, “Moi laga Raja Pitri logote kotha kobole himot korise dei, jodi ta te khali bis jon he pale.” Tai koise, “Bis jon karne, Moi eitu khotom nokoribo.”
32Titia tai koise, “Moi laga Raja Pitri khong nohobi, aru ekbar he moi ke kobole dibi: jodi ta te khali dos jon he pale.” Titia amar Pitri koise, “Dos jon karne, Moi eitu khotom nokoribo.”
33Jitia amar Pitri Abraham logote kotha kowa khotom korise, Tai jai jaise; Abraham tar nijor jaga te wapas jaise.