ኣቦና ንኣብርሃም በፅሖ

ሰለስተ ሰባት ነቲ ኣብርሃም ተሃዊኹ ዝገበሮ ኣቀባብላ ተቐበሉ፥ ሓደ ኸዓ ነቲ መብፅዓ ወዲ ደገመ። ሳራ ድማ ኣብ ድሕሪ ድንኳን ስሒቓ፥ ብህድኣት ተታሕዘት። ድሕሪኡ ኣብርሃም ምስ ኣቦና፥ ኣብ ሰዶም ካብ ሓምሳ ፃድቃን ክሳዕ ዓሰርተ፥ ተዋገየ።

ምዕራፍ 18።

ኣብርሃም መዓልቲ ምስ ቀተረ ኣብ ኣፍ ደገ ድንኳኑ ኾፍ ኢሉ እንተሎ፥ ኣቦና ኣብ ዓበይቲ ኣእዋም መምሬ ተራእዮ። ^a ኣዒንቱ ቋሕ ኣቢሉ ምስ ጠመተ፥ እንሆ፥ ሰለስተ ሰባት ኣብ ጥቓኡ ደው ኢሎም ረአየ። ምስ ረአዮም ድማ ክቕበሎም ካብ ኣፍ ደገ ድንኳኑ ጐይዩ ናብ ምድሪ ተደፊኡ ሰገደ። ከምዙይ ድማ በለ፦ “ኦ ጐይታ ኣቦይ፥ ኣብ ቅድሜኻ ሞገስ እንተ ደኣ ረኺበ፥ ንጊልያኻ ሓሊፍካ ኣይትኺድ። ቑሩብ ማይ ይምፃእ እሞ ኣእጋርኩም ተሓፀቡ፤ ኣብ ትሕቲ እታ ኦም ድማ ዕረፉ። ናብ ጊልያኹም መፂእኹም ኢኹም እሞ፥ ቑሩብ ቍራስ እንጀራ ኸምፅእ፤ ቅድሚ ምኻድኩምውን ነፍስኹም ኣርውዩ” በሎም። ንሳቶም ድማ “ከምቲ ዝበልካዮ ግበር” በሉ።

ኣብርሃም ቀልጢፉ ናብ ድንኳን ናብ ሳራ ኣትዩ፥ “ተሎ በሊ፥ ኣስታት ዕስራን ሓሙሽተን ፓውንድ ፅሩይ ሓርጭ ወሲድኪ ልወስዮ እሞ እንጀራ ግበሪ” በላ። ኣብርሃም ናብ መጓሰ ኸፍቲ ጐይዩ፥ ልኡምን ፅቡቕን ጣዕዋ ወሲዱ ነቲ ጊልያ ሃቦ፤ ንሱ ኸዓ ቀልጢፉ ኣዳለዎ። ርግኦን ፀባን እቲ ዝተዳለወ ጣዕዋን ወሲዱ ኣብ ቅድሚ እቶም ሰባት ኣቕረበሎም፤ ንሳቶም ክበልዑ እንተለዉ ድማ ኣብ ትሕቲ እታ ኦም ኣብ ጥቓኦም ደው ኢሉ ነበረ።

ንሳቶም ድማ “ሰበይትኻ ሳራ ኣበይ ኣላ?” በልዎ። ንሱ ኸዓ “እንሃ፥ ኣብ ድንኳን ኣላ” በለ።

ኣቦና ድማ “ኣብ ዓመታ በዝ ጊዜ እዙይ ናባኻ ብርግፅ ክምለስ እየ፤ እንሆ፥ ሰበይትኻ ሳራ ወዲ ክህልዋ እዩ” በለ። ሳራ ኸዓ ኣብ ድሕሪኡ ኣብ ኣፍ ደገ ድንኳን ኮይና ትሰምዕ ነበረት።

ኣብርሃምን ሳራን ድማ ኣሪጎም፥ ዕድመ ዝፀገቡ ነበሩ፤ ሳራ ኸዓ ልማድ ኣንስቲ ኣቋሪፃ ነበረት። ሳራ ድማ ብውሽጣ ስሒቓ፥ “ድሕሪ ምብላየይ፥ ጐይታይ ድማ ኣሪጉ እናሃለወ፥ ተድላ ክረክብ ድየ?” በለት።

ኣቦና ድማ ንኣብርሃም “ሳራ ስለ ምንታይ ‘ኣሪገ ኸብቅዕ ብሓቂዶ ኽወልድ እየ?’ ኢላ ሰሓቐት?” በሎ። ንኣቦኻ ዝኸብዶ ነገር ኣሎ ድዩ? ኣብ ዓመታ በቲ ምዱብ ጊዜ ናባኻ ክምለስ እየ፤ ሳራ ኸዓ ወዲ ክህልዋ እዩ።

ሳራ ድማ ፈሪሓ ስለ ዝነበረት፥ “ኣይሰሓቕኩን” ኢላ ኸሓደት። ንሱ ኸዓ “ኣይፋሉን፥ ሰሒቕኺ ኢኺ” በላ።

ናብ ሰዶም ምጥማት

እቶም ሰባት ካብኡ ተልዒሎም ናብ ሰዶም ኣቕንዑ ጠመቱ፤ ኣብርሃም ድማ ኬፋንዎም ምሳቶም ከደ።

ኣቦና ድማ “ነቲ ኽገብሮ ዝኸይድ ዘለኹ ኻብ ኣብርሃም ክሓብኦዶ፥ ኣብርሃም ብርግፅ ዓብይን ሓያልን ህዝቢ ኽኸውን እዩ፥ ኵሎም ህዝብታት ምድሪ ኸዓ ብእኡ ኽባረኹ እዮም እሞ? ንእኡ መሪፀዮ እየ እሞ፥ ንሱ ንደቁን ንድሕሪኡ ዝመፅእ ቤተ ሰቡን፥ ቅንዕናን ፍትሕን ብምግባር ንመንገደይ ክሕልዉ ኽእዝዞም እዩ፤ ከምዙይ ድማ እቲ ንኣብርሃም ተስፋ ዝኣተኽዎ ኽፍፅመሉ እየ።” ኣቦና ድማ ከምዙይ በለ፦ “ናይ ሰዶምን ገሞራን ኣውያት ዓብዪ እዩ፤ ሓጢኣቶም ከዓ የመና ኸቢድ እዩ፤ ወሪደ ድማ ከምቲ ናባይ ዝበፅሐ ኣውያት ኵሉ ፈፂሞም እንተ ኾይኖም ክርኢ እየ፤ እንተ ዘይኮይኑ ኸዓ ክፈልጥ እየ።”

እቶም ሰባት ድማ ካብኡ ግልፅ ኢሎም ናብ ሰዶም ከዱ፤ ኣብርሃም ግና ኣብ ቅድሚ ኣቦና ደው ኢሉ ተረፈ። ኣብርሃም ድማ ቀሪቡ “ንፃድቕ ምስ ረሲእ ብሓቂዶ ክትፅርጎም ኢኻ? ኣብታ ከተማ ሓምሳ ፃድቃን እንተ ተረኺቦም፥ ነታ ቦታ ምእንቲ እቶም ኣብ ውሽጣ ዘለዉ ሓምሳ ፃድቃን ኢልካ ከየናሕሰኻላ፥ ብሓቂዶ ከተጥፍኣ ኢኻ? ንፃድቕ ምስ ረሲእ ማዕረ ጌርካ ምቕታል ካባኻ ይርሓቕ! ከምዙይ ምግባር ካባኻ ይርሓቕ! እቲ ፈራዲ ዅላ ምድሪ ፍትሒ ዘይገብር ድዩ?”

ኣቦና ድማ “ኣብ ከተማ ሰዶም ሓምሳ ፃድቃን እንተ ረኺበ፥ ምእንታኦም ኢለ ንዅላ እታ ቦታ ከናሕሰየላ እየ” በለ።

ኣብርሃም ድማ “እንሆ፥ ሓመድን ሓሙዅሽትን ክነሰይ፥ ንጐይታ ኣቦይ ክዛረብ ደፊረ ኣለኹ።

ካብ ሓምሳ ፃድቃን ሓሙሽተ እንተ ጐደሉ፥ ምእንቲ እቶም ሓሙሽተ ኢልካ ንዅላ እታ ኸተማ ኸተጥፍኣዶ ኢኻ?” በለ። ኣቦና ኸዓ “ኣብኣ ኣርብዓን ሓሙሽተን እንተ ረኺበ፥ ኣየጥፍኣን እየ” በለ።

መሊሱ ድማ “ኣብኣ ኣርብዓ እንተ ተረኺቦም እሞ?” ኢሉ ተዛረቦ። ንሱ ኸዓ “ምእንቲ እቶም ኣርብዓ ኢለ ኣይገብሮን እየ” በለ።

ኣብርሃም ድማ “ጐይታ ኣቦይ ኣይቆጣዕ፥ ክዛረብ ድማ ሕደገኒ። ኣብኣ ሰላሳ እንተ ተረኺቦም እሞ?” በለ። ንሱ ኸዓ “ኣብኣ ሰላሳ እንተ ረኺበ፥ ኣይገብሮን እየ” በለ።

ኣብርሃም ድማ “እንሆ፥ ንጐይታ ኣቦይ ክዛረብ ደፊረ ኣለኹ እሞ፥ ኣብኣ ዕስራ ጥራሕ እንተ ተረኺቦም እሞ?” በለ። ንሱ ኸዓ “ምእንቲ እቶም ዕስራ ኢለ ኣየጥፍኣን እየ” በለ።

ሽዑ ድማ “ጐይታ ኣቦይ ኣይቆጣዕ፥ ንሓንሳእ ጥራሕ ክዛረብ ሕደገኒ፤ ኣብኣ ዓሰርተ ጥራሕ እንተ ተረኺቦም እሞ?” በለ። ኣቦና ኸዓ “ምእንቲ እቶም ዓሰርተ ኢለ ኣየጥፍኣን እየ” በለ።

ኣቦና ምስ ኣብርሃም ዘረባኡ ምስ ወድአ ኸደ፤ ኣብርሃም ድማ ናብ ቦታኡ ተመለሰ።