Tito 1

1 ¹Si Pablo, ulipon sa atong Amahan ug apostol ni Jesu-Cristo, alang sa pagtuo sa mga pinili sa atong Amahan ug sa kahibalo sa kamatuoran nga nagatultol ngadto sa pagkadiosnon, ²diha sa paglaom sa kinabuhing dayon, nga gisaad sa atong Amahan, nga dili gayod mamakak, sa wala pa magsugod ang mga katuigan, ³ug sa iyang kaugalingong panahon iyang gipadayag ang iyang pulong pinaagi sa mensahe nga gipiyal kanako sumala sa sugo sa atong Amahan, nga atong Manluluwas. ⁴Ngadto kang Tito, akong tinuod nga anak diha sa atong giambitang pagtuo: ang grasya ug kalinaw gikan sa atong Amahan ug kang Cristo Jesus nga atong Manluluwas.

Ang mga Ansiyano nga Nagpakita sa Kinaiya sa Amahan

⁵Gibilin ko ikaw sa Creta tungod niini nga hinungdan: aron humanon ang nahibilin ug magtudlo ug mga ansiyano sa matag lungsod, sumala sa akong gisugo kanimo. ⁶Ang usa ka ansiyano kinahanglan walay ikasaway, bana sa usa ka asawa, nga may matinumanon nga mga anak nga wala giakusahan sa buang-buang nga pagkinabuhi o sa pagkamasinupakon. ⁷Kay ang usa ka magtatan-aw, ingon nga piniyalan sa atong Amahan, kinahanglan walay ikasaway—dili garboso, dili daling masuko, dili palahubog, dili bangis, dili hakog sa makauulaw nga ganansya, ⁸kondili maabiabihon, mahigugmaon sa maayo, mapugnganon sa kaugalingon, matarong, balaan, ug disiplinado. ⁹Kinahanglan kuptan niya pag-ayo ang kasaligang mensahe sumala sa gitudlo, aron makadasig siya pinaagi sa maayong pagtulon-an ug makapamatuod nga sayop kadtong mosupak niini.

¹⁰Kay daghan ang mga masinupakon, nga nagsultig walay pulos ug nagpahisalaag sa uban—ilabina ang pundok sa mga tinuli. ^a a v10 Ang ‘pundok sa mga tinuli’ nagtumong sa mga magtutudlo nga kagikan sa mga Judio nga namugos nga ang mga Hentil nga magtutuo kinahanglang tulion aron tinuod nga maluwas. ¹¹Kinahanglan silang pahilomon, kay gigun-ob nila ang tibuok mga panimalay, nga nagtudlo sa dili angay, tungod sa makauulaw nga ganansya. ¹²Usa sa ilang kaugalingong mga propeta ang nag-ingon niini: “Ang mga taga-Creta kanunayng mga bakakon, daotang mga mananap, tapolan nga mga palakaon.” ¹³Tinuod kini nga pagpamatuod. Busa badlonga sila pag-ayo, aron mahimo silang maayo sa pagtuo, ¹⁴ug dili tagdon ang mga tinumotumo sa mga Judio ug ang mga lagda gikan niadtong nagsalikway sa kamatuoran. ¹⁵Ang tanang butang putli ngadto sa mga putli; apan alang sa mga nadunot ug sa mga dili matinuohon, walay bisan unsa nga putli—ang ilang hunahuna ug tanlag nahimong mahugaw. ¹⁶Nag-angkon sila nga nakaila sa atong Amahan, apan ilang gilimod siya pinaagi sa ilang mga binuhatan—mangil-ad, masinupakon, ug dili takos sa bisan unsang maayong buhat.