Titus ke, Moi laga Hosa Bacha
Crete dwip te bura manuh khan ke basibole aru thik sikhai sikhabole Titus ke dibole nirdesh.
1 1Paul, amar Pitri laga noukar aru Jisu Khrista laga pasoni, amar Pitri pora basi luwa manuh khan laga biswas nimite aru Isor ke bhokti te loijai diya hosa laga gyaan nimite, 2ananta jivon laga asha te, juntu ananta jivon, kitia bhi misa nokowa amar Pitri pora yug khan shuru huwa age te vachan dise, 3aru Tar nijor homoi te, amar Pitri, amar Trankorta laga hukum pora moi ke bhar di diya prochar laga dwara, Tar laga kotha dikhai dise. 4Titus ke, amikhan eke biswas te thaka nimite moi laga hosa bacha ke: amar Pitri aru amar Trankorta Khrista Jisu pora anugrah aru shanti hobi.
Pitri laga Sobhab Dikhai Diya Bura Manuh Khan
5Moi tumi ke Crete te eitu karne chari ahhise: ki baki thakise utu khotom koribole aru, moi tumi ke koise nisena, sob sohor te bura manuh khan ke niyukti koribole. 6Ekjon bura manuh dush nathaka hobo lage, ekjon maiki laga mota, aru tar bacha khan biswasi hobo lage, biya jibon kora nohoile bidroho kora laga dush nathaka. 7Kilemane ekjon dhyan rakhoia, amar Pitri laga ghor cholaoia nisena, dush nathaka hobo lage—phutani nakora, joldi khong nauthaka, sharab nakhuwa, mar-dhor nakora, misa pora labh bisari lalchi nakora, 8kintu manuh ke ghor te matikena bhal pa'a, bhal jinis ke morom kora, nijor ke dhori rakha, thik rasta te chola, pobitro, aru niyom te thaka hobo lage. 9Jineka sikhai dise, tineka biswas kora laga kotha ke tai mojbut pora dhori rakhibo lage, titia tai bhal siksha pora manuh khan ke himot dibo pare aru kun pora bhirodh kore, tarkhan ke thik koribo pare.
10Kilemane bisi manuh bidrohi ase, misa misi kotha koi aru dusra khan ke biya rasta te loijai—khaas pora sunnot kora dol. a a v10 ‘Sunnot kora dol’ mane Yehudi pora aha sikhoia khan ase, kun pora Porjati biswasi khan ke hosa pora poritran pabole sunnot koribo lage koi kene jor korise. 11Tarkhan ke chup kori dibo lage, kilemane tarkhan ki sikhabo nalage utu sikhai kene, sorom laga labh nimite, pura ghor khan ke nosto kori diye. 12Tarkhan nijor laga bhabobadi ekjon pora koise, “Crete manuh khan hodai misa kowa ase, biya janwar, alsi aru bisi khuwa manuh ase.” 13Eitu gawahi hosa ase. Etu karne tarkhan ke kara pora samjai dibi, titia tarkhan biswas te mojbut hobo, 14aru Yehudi khan laga misa kahani khan, aru hosa ke namani diya manuh khan laga niyom khan ke dhyan nadibi. 15Sapha manuh khan nimite sob jinis sapha ase; kintu letera aru biswas nokora khan nimite eku bhi sapha nai—tarkhan laga mon aru bhabona duita bhi letera hoi jaise. 16Tarkhan amar Pitri ke jane koi, kintu tarkhan laga kaam pora Tar ke namane—ghin laga, kotha nomani, aru eku bhal kaam nimite thik nathaka.