Kuna Tito, Mwananga Wandimomwene
Malango kuna Tito thangwi ya kusankhula akulu na kupfunzisa pfunziso yakuwanga pa cisuwa ca Kreta.
1 1Ine Paulu, ntumiki wa Baba wathu na mpostolo wa Yezu Kirixtu, thangwi ya cikhulupiro ca anthu akusankhulwa a Baba wathu na cidziwiso ca undimo mwene cinatsogolera ku kulambira Mulungu, 2mu cidikhiro ca upulumuki wakukhonda kumala, ule udapikira Baba wathu, wakukhonda kunama, midzidzi mingadzati kutoma, 3na pa n'dzidzi wace ene, Iye apangiza fala yace kubulukira mu mphangwa zidapaswa ine mwa ntongo wa Baba wathu, Mpulumusi wathu. 4Kuna Tito, mwananga wandimomwene mu cikhulupiro cibodzi cathu: kukoma ntima na ntendere kubulukira kuna Baba wathu na Kirixtu Yezu Mpulumusi wathu.
Akulu Anapangiza Makhaliro a Baba
5Ndakusiya ku Kreta thangwi ya ici: toera kumalisa pidasala na kusankhula akulu m'nzinda unango na unango, ninga mudakupangira ine. 6Nkulu asafunika kukhala wakusowa mulando, mamuna wa nkazi m'bodzi, na ana akukhulupirika akukhonda kupambizirwa kuti ali na umaso wakuipa peno kukhonda kubvera. 7Thangwi nyakuyang'anira, ninga ntumiki wakugomezerwa wa Baba wathu, asafunika kukhala wakusowa mulando—nkhabe kudzikuza, nkhabe kuipirwa mwakucimbiza, nkhabe kuledzera, nkhabe kumenya anthu, nkhabe kusirira kupata kobiri mwakunyengeza, 8mbwenye nyakutambira alendo, nyakufuna pinthu pyadidi, wakutonga ekha, wakulungama, wakucena, na wakupfundzika. 9Iye asafunika kuphatisisa fala yakukhulupirika ninga mudapfundziswa iye, toera akwanise kuwangisa anthu na cipfundziso cadidi na kupokanya ale anaipokanya.
10Thangwi azinji ndi akukhonda kubvera, analonga pinthu pyapezi mbanyengeza anango—makamaka anthu a nsoka wakusidzwa. a a v10 'Nsoka wakusidzwa' asalonga apfundzisi akhabuluka ku Ajuda, adalimbisa kuti anyakukhulupira a maJentiyo asafunika kusidzwa toera apulumuswe mwandimomwene. 11Iwo asafunika kumatiswa milomo, thangwi asapwaza mabanja onsene, mbapfundzisa pinthu pyakuti nee asafunika kupfundzisa, toera apate kobiri mwamanyadzo. 12M'bodzi wa aprofeta awo ene alonga tenepa: “Akreta ndi anyakunama ndzidzi onsene, pinyama pyakuipa, anyakudya kakamwe aulesi.” 13Umboni unowu ndi wandimomwene. Na tenepo, alange mwamphambvu, toera akhale akuwanga mu cikhulupiro, 14mbakhonde kubvesera ngano za Ajuda na matongero a anthu ale anakhonda undimo mwene. 15Pinthu pyonsene ndi pyakucena kuna ale akucena; mbwenye kuna anthu akuipiswa na akukhonda kukhulupira, nkhabe cinthu cakucena—manyerezero awo na cikumbuntima cawo pyonsene pyaipiswa. 16Iwo asalonga kuti asadziwa Baba wathu, mbwenye asan'khonda na macitiro awo—mbakhala akunyanyasa, akukhonda kubvera, akukhonda kuthema toera kucita basa yadidi iri yonsene.
