ቲቶ 1

1 ¹የአባታችን አገልጋይ፣ የኢየሱስ ክርስቶስም ሐዋርያ የሆንሁ ጳውሎስ፤ ይህም የአባታችን ለተመረጡት እምነትና ወደ እግዚአብሔር መገዛት ለሚመራ የእውነት ዕውቀት ነው፤ ²ይህም ፈጽሞ የማይዋሽ አባታችን ዘመናት ከመጀመራቸው አስቀድሞ ተስፋ በሰጠው በዘላለም ሕይወት ተስፋ ላይ ነው፤ ³በራሱም ጊዜ፣ በመድኀኒታችን በአባታችን ትእዛዝ ለእኔ በአደራ በተሰጠኝ ስብከት ቃሉን ገለጠ። ⁴በጋራ እምነት እውነተኛ ልጄ ለሆነው ለቲቶ፤ ከአባታችንና ከመድኀኒታችን ከክርስቶስ ኢየሱስ ጸጋና ሰላም ይሁን።

የአብን ባሕርይ የሚያንጸባርቁ ሽማግሌዎች

⁵በቀርጤስ የተውኩህ ስለዚህ ምክንያት ነበር፤ ይኸውም የቀረውን ነገር ትፈጽም ዘንድ፣ ባዘዝሁህም መሠረት በየከተማው ሽማግሌዎችን ትሾም ዘንድ ነው። ⁶ሽማግሌ ነውር የሌለበት፣ የአንዲት ሚስት ባል፣ በመዳራት ወይም በዐመፅ የማይከሰሱ ታማኝ ልጆች ያሉት ሊሆን ይገባል። ⁷ኤጲስ ቆጶስ እንደ አባታችን መጋቢ ነውር የሌለበት ሊሆን ይገባልና፤ ትዕቢተኛ፣ ቁጡ፣ ሰካራም፣ ጨካኝ ወይም ነውረኛ ረብ የሚመኝ አይሁን፤ ⁸ነገር ግን እንግዳ ተቀባይ፣ መልካሙን የሚወድድ፣ ራሱን የሚገዛ፣ ቅን፣ ቅዱስና ሥርዐታማ ይሁን። ⁹እንደተማረው የታመነውን ቃል አጥብቆ ሊይዝ ይገባዋል፤ ይኸውም በቀና ትምህርት ሊያበረታታ፣ የሚቃወሙትንም ሊወቅስ ይችል ዘንድ ነው።

¹⁰ዐመፀኞች የሆኑ፣ ከንቱ የሚናገሩና ሌሎችን የሚያስቱ ብዙዎች አሉና፤ ይልቁንም ከተገረዙት ወገን የሆኑ። ^a a v10 ‘ከተገረዙት ወገን’ የሚለው፣ አሕዛብ አማኞች በእውነት ለመዳን መገረዝ አለባቸው ብለው አጥብቀው የሚያስተምሩ፣ ከአይሁድ ባሕል የመጡ አስተማሪዎችን ያመለክታል። ¹¹እነዚህን አፋቸውን ማስያዝ ያስፈልጋል፤ ምክንያቱም ለሚያሳፍር ረብ ሲሉ ሊያስተምሩ የማይገባቸውን በማስተማር ቤተ ሰቦችን በሙሉ ያፈርሳሉ። ¹²ከእነርሱው ነቢያት አንዱ እንዲህ ብሏል፤ “የቀርጤስ ሰዎች ሁልጊዜ ውሸታሞች፣ ክፉ አራዊት፣ ሰነፍ ሆዳሞች ናቸው።” ¹³ይህ ምስክርነት እውነት ነው። ስለዚህ በእምነት የቀኑ ይሆኑ ዘንድ አጥብቀህ ውቀሳቸው፤ ¹⁴የአይሁድን ተረቶችና እውነትን ከሚጥሉ ሰዎች የመጡ ትእዛዛትን ቸል ይሉ ዘንድ። ¹⁵ለንጹሐን ሁሉም ነገር ንጹሕ ነው፤ ለረከሱትና ለማያምኑት ግን ምንም ንጹሕ የለም፤ አእምሮአቸውም ኅሊናቸውም ረክሰዋልና። ¹⁶አባታችንን እናውቃለን ይላሉ፤ በሥራቸው ግን ይክዱታል፤ አስጸያፊዎች፣ የማይታዘዙና ለማንኛውም መልካም ሥራ የማይበቁ ናቸው።