Hiak swak thang rwe
Chongdip

Asa Kabataknu Titus khou

Crete tuikoi ram bi chwan phunnu rwan zong lang khatle bazenu bachu thangnu bachu thang lang, Titus khou zathang pinu gaye.

Bung 1.

Ani Pa om chwanlaang mi, Jisu Christa om chonglang rwan Paul eina, ani Pa om kathang swaknu bing om balumsat lang khatle Rikrwang ding kachinu khou kai hungnu bazenu theinu lang hiaknuwe. Ringzoknu kum om bachunnu bi, baraanto mun thei maknu ani Pa na bakaan inza hung mak basaan kathan thang ngaaknu, khatle Baraanto om lumik pi, ani Pa, ani Kanthangnupa om chongtan paanna akhou bachoi thangnu kasam paan bina Maanna Bachong ga indao thang rwe. Balumsat bacham bi Asa bataknu Titus khou: ani Pa khatle ani Kanthangnupa Christa Jisu khouna phaangkriang khatle dai bazaangnu nang khou ong ding ngo.

Pa om Charut Indaonu Chwan Phunnu rwan

To loi dingnu bing ga loi thangluga, eina nakhou chongtan pi thangnu danga nampui khatna chwan phunnu rwan zong lang, hei langna eina nang Crete pi thang ngaake. Chwan phunnu maan ga koi dou maaknu, bamei khatcha om basan rwan, ra-aam ringnu mak tabe chongtan thouto maknu diga koi impu thang maknu balumsanu basa rwan amnu to ding ngo. Balangbe phaangsin thangnu maan ga ani Pa om chwanlaang mi danga koi maaknu to ding ngo: maan ga lian tonu maknu, lung pwan raaknu maknu, zu in maknu, kabit kamai maknu, ririak se maknu sian ra-aam maknu to ding ngo, atiyeda takhwang man phunnu, kasanu ding kriangnu, sung bazaangnu, ririak senu, bathiangnu khatle karak theinu to ding ngo. Maanna maitwang sanu bachu thangnu paan bina mi nun bathem thang lang khatle ha ding kakhangnu nun le to kabat kabaang thang lang, bachu thang damnu danga balumsa lang khopnu chong ga tipka khaang ding ngo.

Balangbe mi katamna chong zei maknu, pang kabia kabianu rinnu khatle mi nun lampui kaimaannu nunne—batak takka ret tatnu pek om mi nunne. a a v10 “Ret tatnu pek” dinuba Jihudi khouna hungnu bachu thangnu rwan ding rinnuwe, banina Jihudi mak balumsanu nun batak takka thang lang ret tat lat ting gaye diga rin ngaake. Banina kazaknu alaang tong lang bachu thang mak dingnu bing ga bachu thangga insung bapum to braan briakpina, bani khwam thang ding ngo. Bani raanto om thiamting rwan lak pina khatna rin rwe, “Crete rwan ga bakaan mun theinu, sa maknu khouring bing, takaatnu taraonu nunne.” Heiba sake ga batak takka gaye. Atibriakpina banina balumsat tipka ong lang, bani ding rakanga tweiyo, khatle Jihudi rwan om pwaknu meiri khatle bazenu ding zeinu nun om chongtan bing ding le thang nwam mako. Bathiangnu mi nun lang pot bapum ga bathiangnuwe; atiyeda braan ongnu khatle balumsa maknu nun lang khatchale bathiangnu make—bani sung le bani baze theinu sung le tanaatnu thang rwe. Banina ani Pa ding theiye diga rinne atiyeda bani chwan bingna Maan ding za nwamme—batannu, chong zei maknu, kasanu chwan khatchale to lang khopnu maknu nunne.