Me basika na mukanda
Dibuku

Na Tito, Mwana ya Munu ya Kyeleka

Bantumunu na Tito na yina me tadila kutula bakuluntu mpe kulonga malongi ya mbote na kisanga ya Kelete.

Kapu 1.

Ni munu Polo, kisadi ya Tata ya beto mpe ntumwa ya Yesu-Klisto, samu na kiminu ya bantu yina Tata ya beto soolaka mpe samu na luzabu ya kyeleka yina ke nat aka na kuzitisa Nzambi, na kivuvu ya luzingu ya seko, yina Tata ya beto, yina ke vunaka ve, silaka na ntwala ya bantangu nyonso, mpe na ntangu ya yandi mosi, yandi monisaka mambu ya yandi na nzila ya nsangu yina ba pesaka munu na lutumu ya Tata ya beto, Muvuukisi ya beto. Na Tito, mwana ya munu ya kyeleka na kiminu yina beto ke kabula kintwadi: Bika ti Tata ya beto mpe Yesu-Klisto, Muvuukisi ya beto, kupesa nge bumbote mpe kizunu.

Bakuluntu Bayina ke Monisa Kikalulu ya Tata

Mu bikaka nge na kisanga ya Kelete samu na dyambu yayi: samu na kumanisa mambu yina bikanaka mpe kutula bakuluntu na konso mbanza, mutindu mu pesaka nge ntumunu. Kuluntu fwana kuvwanda ya kusungama, bakala ya nkento mosi kaka, mpe na bana ya kukwikama yina bantu ke funda ve na luzingu ya mvindu to na kukolama. Samu ti nkengi, bonso ntwadisi ya Tata ya beto, fwana kuvwanda ya kusungama—ya lunangu ve, ya makasi ya nswalu ve, muntu yina ke kolaka malafu ve, muntu ya mambu ya ngolo ve, yina ke sosaka ve ndandu ya mvindu, kasi yandi fwana kuvwanda muntu ya kuyamba banzenza, muntu yina ke zolaka mambu ya mbote, yina ke yalaka nzutu ya yandi, muntu ya kudedama, muntu ya longo, mpe muntu ya kukeba. Yandi fwana kusimba ngolo nsangu ya kyeleka mutindu ba longisaka yawu, samu ti yandi lenda kukindisa bantu na malongi ya mbote mpe kununga bayina ke tediminaka yawu.

Samu ti bantu mingi kele ya kukolama, bawu ke tubaka mambu ya mpamba mpe ke kusaka bantu ya nkaka—mingi-mingi bantu ya kimvuka ya nzengolo ya bubakala. a a v10 «Kimvuka ya nzengolo ya bubakala» ke tubila balongi yina katukaka na kati ya ba-Zwife, yina vwandaka kwika ti bakwikidi ya bayinsi ya nkaka fwana kuzenga bubakala samu na kuvuuka kibeni. Bantu yina, ba fwana kukanga bawu yinwa, samu ti bawu ke bebisaka mabuta ya mvimba, bawu ke longaka mambu yina bawu fwana kulonga ve, samu na ndandu ya nsoni. Mumbikudi mosi ya bawu mosi tubaka yawu: «Bantu ya Kelete kele ntangu nyonso bantu ya luvunu, bibulu ya yimbi, bantu ya bubolo mpe ya kinsuza.» Kimbangi yayi kele ya kyeleka. Ni yawu yina, sungika bawu na ngolo, samu ti bawu kuvwanda na kiminu ya ngolo, mpe bawu kutula dikebi ve na bansangu ya mpamba ya ba-Zwife mpe na bantumunu ya bantu yina ke mangaka kyeleka. Bima nyonso kele ya kuvedila na bantu ya kuvedila; kasi na bantu yina me beba mpe yina ke kwikilaka ve, ata kima mosi kele ya kuvedila ve—mabanza ya bawu mpe yisi ya ntima ya bawu me kuma ya mvindu. Bawu ke tubaka ti bawu me zaba Tata ya beto, kasi bawu ke mangaka yandi na bisalu ya bawu—bantu ya nganzi, bantu yina ke tumamaka ve, bantu yina me lunga ve na kusala kisalu ata mosi ya mbote.