2 ጢሞቴዎስ 4

4 ¹በአባታችንና በሕያዋንና በሙታን ላይ በሚፈርደው በክርስቶስ ኢየሱስ ፊት፣ በመገለጡና በመንግሥቱም አጥብቄ አደራ እሰጥሃለሁ፤ ²ቃሉን ስበክ፤ በጊዜውም ያለ ጊዜውም ተዘጋጅተህ ቁም፤ በሙሉ ትዕግሥትና በትምህርት ዝለፍ፣ ገሥጽ፣ አበረታታም። ³ሰዎች ጤናማውን ትምህርት የማይታገሡበት ዘመን ይመጣልና፤ ነገር ግን ጆሮአቸው ስለሚያሳክክ እንደ ገዛ ምኞታቸው የሚስማሙ አስተማሪዎችን ለራሳቸው ያከማቻሉ፤ ⁴ጆሮአቸውንም ከእውነት መልሰው ወደ ተረት ይሳባሉ። ⁵አንተ ግን በነገር ሁሉ ልብህን ጠብቅ፣ መከራን ታገሥ፣ የወንጌላዊን ሥራ ሥራ፣ አገልግሎትህንም ፈጽም። ⁶እኔ አስቀድሞ እንደ መጠጥ መሥዋዕት እየፈሰስሁ ነውና፤ የምሄድበትም ጊዜ ደርሷል። ^a a v6 የመጠጥ መሥዋዕት በመሠዊያው ላይ እንደ መሥዋዕት የሚፈስ የወይን ጠጅ ነበር፤ ጳውሎስ የራሱን ሞት ለሌሎች ሲል የሚፈስ የመጨረሻ የአምልኮ ተግባር አድርጎ ይስለዋል። ⁷መልካሙን ገድል ተጋድያለሁ፣ ሩጫውን ፈጽሜአለሁ፣ ሃይማኖትን ጠብቄአለሁ። ⁸አሁንም የጽድቅ አክሊል ይጠብቀኛል፤ ይህንም ጻድቅ ፈራጅ የሆነው ጌታ በዚያ ቀን ይሰጠኛል፤ ለእኔ ብቻ ሳይሆን መገለጡን ለወደዱ ሁሉ ደግሞ ይሰጣቸዋል።

የጳውሎስ የመጨረሻ ሐሳቦች

⁹ፈጥነህ ወደ እኔ ልትመጣ ትጋ። ¹⁰ዴማስ ይህን የአሁኑን ዓለም ወዶ ትቶኝ ወደ ተሰሎንቄ ሄደ፤ ቄርቂስ ወደ ገላትያ፣ ቲቶም ወደ ዳልማጥያ ሄደ። ¹¹ሉቃስ ብቻ ከእኔ ጋራ ነው። ማርቆስን ይዘህ ከአንተ ጋራ አምጣው፤ ለአገልግሎት ይጠቅመኛልና። ¹²ቲኪቆስን ወደ ኤፌሶን ላክሁት። ¹³ስትመጣ በጢሮአዳ በቀርጶስ ዘንድ የተውሁትን ካፖርት፣ መጻሕፍቱንም፣ ይልቁንም ብራናዎቹን አምጣ። ¹⁴አንጥረኛው እስክንድር ብዙ ክፉ አደረገብኝ፤ ጌታ እንደ ሥራው ይከፍለዋል። ¹⁵አንተም ከእርሱ ተጠበቅ፤ ቃላችንን እጅግ ተቃውሞአልና።

¹⁶በመጀመሪያው መልሴ ጊዜ ማንም ከእኔ ጋራ አልቆመም፤ ሁሉም ተዉኝ፤ ይህ አይቆጠርባቸው። ¹⁷ጌታ ግን ከእኔ ጋራ ቆመ፤ አበረታኝም፤ ይኸውም በእኔ በኩል ቃሉ ፍጹም እንዲሰበክና አሕዛብ ሁሉ እንዲሰሙ ነበር። ከአንበሳውም አፍ ዳንሁ። ¹⁸ጌታ ከክፉ ሥራ ሁሉ ያድነኛል፤ ወደ ሰማያዊ መንግሥቱም በደኅና ያደርሰኛል። ለእርሱ ከዘላለም እስከ ዘላለም ክብር ይሁን። አሜን።

የመጨረሻ ሰላምታ

¹⁹ጵርስቅላንና አቂላን፣ የአናሲፎሩንም ቤተ ሰዎች ሰላምታ አቅርብልኝ። ²⁰ኤርስጦስ በቆሮንቶስ ቀረ፤ ጥሮፊሞስንም ታሞ ስለ ነበር በሚሊጢስ ተውሁት። ²¹ከክረምት በፊት ልትመጣ ትጋ። አውብሉስ፣ ጱዴስ፣ ሊኖስ፣ ቀላውዲያና ወንድሞችና እኅቶች ሁሉ ሰላምታ ያቀርቡልሃል።

²²ጌታ ከመንፈስህ ጋራ ይሁን። ጸጋ ከሁላችሁ ጋራ ይሁን።