ነቲ ቓል ስበኽ

ናይ መወዳእታ ምዕዳ ጳውሎስ፥ ኣብ ቅድሚ ኣቦና ዝተገበረ፦ ነቲ ቓል ብጊዜኡ ይኹን ብዘይ ጊዜኡ ስበኽ፥ ሰባት ከም ትምኒት ልቦም ዝዛረቡ መምህራን ክእክቡ እዮም እሞ። ናይ ባዕሉ መወዳእታ ይፈልጥ — ከም መስዋእቲ መስተ ይፈስስ፥ ነቲ ጉያ ፈፂሙ — መን ከም ዝሓደጎ፥ መን ከም ዝፀንሐ፥ መን ምስኡ ከም ዝቖመ ድማ ይሰምዮም።

ምዕራፍ 4።

ኣብ ቅድሚ ኣቦናን ነቲ ንህያዋንን ንምዉታትን ዝፈርድ ክርስቶስ ኢየሱስን፥ ብምግላፁን ብመንግስቱን ከምዙይ ኢለ ብትሪ እምዕደካ ኣለኹ፦ ነቲ ቓል ስበኽ፤ ብጊዜኡ ይኹን ብዘይ ጊዜኡ ድሉው ኩን፤ ብምሉእ ትዕግስትን ትምህርትን፥ ግሰፅ፥ ገንሕ፥ ኣተባባዕ። ጥዑይ ትምህርቲ ዘይፅወሩሉ፥ የግዳስ ኣእዛኖም ስለ ዝሕከኾም ከም ትምኒት ልቦም ዝኸውን መምህራን ዘኽምሩሉ ጊዜ ክመፅእ እዩ፤ ኣእዛኖም ድማ ካብ ሓቂ መሊሶም ናብ ጽውጽዋይ ክዛብዑ እዮም። ንስኻ ግና ኣብ ኵሉ ነቒሕ ኩን፥ መከራ ፅገብ፥ ናይ ወንጌላዊ ዕዮ ግበር፥ ኣገልግሎትካ ፈፅም። ኣነ ድሮ ኸም መስዋእቲ መስተ ይፈስስ ኣለኹ፤ ጊዜ ምፍላሰይ ድማ በፂሑ ኣሎ። ^a ነቲ ፅቡቕ ውግእ ተዋጊአ፥ ነቲ ጉያ ፈፂመ፥ ነቲ እምነት ሓሊወ ኣለኹ። ሕዚ ኣኽሊል ፅድቂ ተዳልዩለይ ኣሎ፤ ነዙይ ኸዓ እቲ ፃድቕ ፈራዲ ጐይታ፥ በታ መዓልቲ እቲኣ ክህበኒ እዩ፤ ንኣይ ጥራሕ ዘይኮነስ፥ ነቶም ምግላፁ ዘፍቀሩ ዅሎም ከዓ።

መወዳእታ ጉዳያት ጳውሎስ

ቀልጢፍካ ናባይ ክትመፅእ ጽዓር። ዴማስ ነዛ ሕዚ ዘላ ዓለም ኣፍቂሩ ሓዲጉኒ ናብ ተሰሎንቄ ኸደ፤ ቅሬስቅስ ናብ ገላትያ፥ ቲቶ ኸዓ ናብ ዳልማትያ ኸደ። ሉቃስ ጥራሕ ምሳይ ኣሎ። ንማርቆስ ሒዝካ ምሳኻ ኣምፅአዮ፤ ንሱ ንኣገልግሎት ይጠቕመኒ እዩሞ። ንቲኪቆስ ናብ ኤፌሶን ሰዲደዮ ኣለኹ። ክትመፅእ እንተለኻ፥ ነቲ ኣብ ጢሮኣዳ ኣብ እንዳ ቃርጶስ ዝሓደግክዎ ኽዳን፥ ነቶም መፃሕፍቲ ድማ፥ ኣውራ ኸዓ ነቶም ብራናታት ኣምፅኣዮም። እስክንድር እቲ ሰራሒ ነሃስ፥ ብዙሕ ጕድኣት ኣውረደለይ፤ ጐይታ ኸም ግብሩ ክፈድዮ እዩ። ንሱ ንቓልና ብርቱዕ ተቓዊምዎ እዩሞ፥ ንስኻ ኸዓ ኻብኡ ተጠንቀቕ።

ኣብ ቀዳማይ ምክልኻለይ ምሳይ ዝቖመ ዋላ ሓደ ኣይነበረን፤ ኵሎም ሓደጉኒ። እዙይ ኣይተሓዘሎም። ጐይታ ግና ምሳይ ቖመ፥ ኣፅንዓኒውን፤ እቲ ቓል ብኣይ ፍፁም ምእንቲ ኽእወጅ፥ ኵሎም ኣህዛብ ከዓ ምእንቲ ኽሰምዕዎ እዩ። ካብ ኣፍ ኣንበሳ ድማ ደሓንኩ። ጐይታ ኻብ ኵሉ ኽፉእ ግብሪ ኼድሕነኒ፥ ናብ ሰማያዊ መንግስቱ ኸዓ ብደሓን ኬብፅሐኒ እዩ። ንእኡ ንዘለኣለመ ኣለም ክብሪ ይኹን። ኣሜን።

መወዳእታ ሰላምታ

ንጵርስቅላን ንኣቂላን፥ ነቶም ስድራ ቤት ኦኔሲፎሮስን ሰላም በሎም። ኤርስጦስ ኣብ ቆሮንቶስ ተረፈ፤ ንጥሮፊሞስ ድማ ሓሚሙ ስለ ዝነበረ ኣብ ሚሊጦስ ሓደግክዎ። ቅድሚ ኽረምቲ ኽትመፅእ ጽዓር። ኤውቡሎስን ጲዶስን ሊኖስን ቀላውዴያን፥ ኵሎም ኣሕዋት ከዓ ሰላም ይብሉኻ ኣለዉ።

ጐይታ ምስ መንፈስካ ይኹን። ፀጋ ምስ ኵላትኩም ይኹን።