2 Timothy 4

4 ¹Kharingabing kala kathebingli bichar sāki kaji ithumwui Avā kala Khrista Jishuwui miktāli, awui kharā kala awui wungram eina, ina nali kakasona: ²Tui hi hāshoklu; atam khamahai lala makhamahai lala shaksākhariklu; kachangkhat ningzinghāring kala tamkachithei eina mashung khangasaklu, hāngkhamachinlu kala kasatsanglu. ³Kaja atam akha rāra, chi atam tharan athumna tamkachithei khamathā chi maja̱mira, kha athum khalatta ningkachāng athishurda ojābing phāsangra, kaja athumwui khanā khamuihaowa, ⁴kala athumwui khanā chi khamashung eina pākhailaga khararchānli yaozatra. ⁵Kha nana ot saikorali ning ngasharda leilu, kachotkachāng khānglu, evangelistwui ot sālu, nawui otram khangatha̱ chi ungshunglu. ⁶Kaja ina ra̱mangwui kachigat thāda arui heishokmi kajina; iwui zat khavai atam rāhaira. ^a a v6 Ra̱mangwui kachigat hi kachigat sākhavai altarli heishokmi ra̱na — Paulna awui thikahai chi mibingwui vang heishokmi khokharumwui khanaowa ot akha thāda semkhuina. ⁷Ina khamahai rai raihaira, ina shongzā kuphaira, ina shitkasang singtithaira. ⁸Ara khamashung khangarongwui kuihon iwui vang ngaraida lei, chi khamashunga bichar khameta Prohona chithang atamli ili mira—imāngli maningla, awui kharā chi leishikhaibing saikorali mira.

Paulwui Khanaowa Ningchānbing

⁹Iwuili thakta rākhavai kashap eina tangda sālu. ¹⁰Demasna aja okathui hi leishihaoda ili horlaga Thessalonicali vāhaowa. Crescensna Galatiali vāhaowa, kala Titusna Dalmatiali vāhaowa. ¹¹Lukemāngna ili ngasopamda lei. Markli na ngasoda khuirālu, kaja ana otram khangatha̱wui vang ili kānnai. ¹²Ina Tychicusli Ephesusli chihovāhaira. ¹³Nana rā tharan, ina Troasli Carpuswui pāngli haimi kahai kachon chi, kala lairikbing, mataimeikapta mehui lairikbing chi khuirālu. ¹⁴Thir khame Alexander china ili zakkashi tema sāhaira; Prohona awui otsak athishurda ali tandi khamira. ¹⁵Na khalatta ali ning ngasharlu, kaja ana ithumwui tui chi panglāk eina mamayāhaira.

¹⁶Iwui khare kaphayatli khipākha ili ngasopamda manganingmana. Saikorana ili horhaowa. Hi athumli mashānkhui ngasakranu. ¹⁷Kha chithākha iwui mangā eina chānpao chi kupphā eina hāshok khavai kala yur saikorana chi shākhui khavai, Prohona ili ngasoda nganinga kala ili pang ngasaka. Kazingkha̱wui khamorwui eina ili kanshokmi samphanga. ¹⁸Prohona ili makaphā otsak kachiva̱wui eina kanshokra, kala ili chingri eina awui kazingram wungramli khuizangra. Ali katang mavaila tekmateichingranu. Amen.

Naomeikapta Shālam

¹⁹Priscilla eina Aquilali, kala Onesiphoruswui shimkhurli shālam mili. ²⁰Erastusna Corinthli pamsanga, kala ina kazāda leikahai Trophimusli Miletusli haihaowa. ²¹Sikachāng atam marāranglakha eina rākhavai hotnālu. Eubulus, Pudens, Linus, Claudia, kala ivānaobing saikorana nali shālam chiphunli.

²²Prohona nawui manglāli ngasomiranu. Lukhamashan china nathum saikorali ngasomichingranu.