2 Timothy 3

3 ¹Kha hi theilu: khanaowa zimikshobingli kachotkachāng atam rāra. ²Kaja mibingna khalatta leikashe, lupāli khangamara, langkaso, khayāning khanganing, mana̱kashe, ava̱ avāwui kahāng makhanganā, maningshikatheia, Vareli makathei ngasāra. ³Lukhamashan makathei, mapheomikashe, satkakharat, khalatta makhangarin, sākashimān kathema, kaphā ningkakachai, ⁴mashitkasang, khangashar paireka, khalatta phāmeida khāngchikata, ithumwui Avāli leikashe maningla ringkaphāmangli leikashe ngasāra. ⁵Athumna Vareli kaphaningwui azak khuikasanga, kha awui pangshap chi mamayāmana. Athum chi chihochaohaolu. ⁶Kaja hibingwui ngachaili shimli ngathumda zangkhayang, kala morei eina khalapkasang, khangui khangachā khangatatei eina hakmeikasang khangazan sha̱naobingli yonkhuikasā mibing lei. ⁷Atam kachida tamkakhuilala, khamashung theikhui khavai mathāhaila mangarinrara. ⁸Jannes kala Jambresna Mosesli makhamayā kathā, hibingla khamashung chi mamayāmana. Athum wuklung makhao kahai, shitkasangwui pongli makhalanshok mibingna. ^a a v8 Jannes kala Jambres hiya Mosesli mamayāmana Egyptwui meowor kathemabingwui Jihudibing kharewui khavā amingbingna (Exodus 7–8 yanglu). ⁹Kha athum katāva̱li mavāmara, kaja ani mipa khaniwui kathā athumwui mangkhama̱ chi mi saikorana theihaora.

Avāwui Tuili Leingasaklu

¹⁰Kha nana iwui tamkachithei, acham, khangarān, shitkasang, ningzinghāring, leikashi, khāngkathei, ¹¹iwui rekakharek kala kachotkachāng chi shurthuwa. Antiochli, Iconiumli, Lystrali, kathakha rekakharek ina phungkahai! Chithālala Prohona chi saikorawui eina ili kanshokmi. ¹²Khamashunga, Khrista Jishuwui mangā eina Vareli theida okthui khavai sāngaiching mi saikorana rekakharek samphangra, ¹³Kha makaphā kasā mibing kala kakapik phenbing chiya, mi minamda, khalattala minam samphangda, phāmei khavai masāla zakshimei khavai zatra. ¹⁴Kha nana tamkhui kala shitsangchao kahai chili leichinglu, khipābingwui eina chi tamkhui kaji theida, ¹⁵kala naoshinao atamli eina kathara kapi kahaibing chi nana theisā, chibingna Khrista Jishuli shitkasang eina huikhami vang nali thangmei ngasakshapa. ¹⁶Kathara lairik saikora hi ithumwui Avāna khakkhāror kahaina. Chi tamkachithei khavai, khayon theingasak khavai, mashungkakhui khavai, kala khamashung khangarong mirinli tam khavai kānnai, ^b b v16 Kathara lairik hiya ithumwui Avā khalattawui khakna—katāva̱li khalei vare akhawui kaso maningmana, kha awui naongarāli hāngkasā Avāwui kharing Tuina. ¹⁷chithākha ithumwui Avāwui mi chi kashungmei ngasakta, kaphā ot saikora sākhavai ngarānda leira.