2 Timothy 2

2 ¹Chiwui vang eina inao, Khrista Jishuli khalei lukhamashan eina nakhalatta pang ngasakhaolu. ²Kala shākhi kachungkhawui mangāli nana iwui eina nganākhui chi, kateibingli tamchithei sākhavai shitkasanga mibingli horsangmilu. ³Khrista Jishuwui raimi kaphā akha thāda kachotkachāng nala phungrumlu. ⁴Otram khangatha̱ raimi khipānakha okathuiwui otbingli mazangmana, kaja ana ali raiwui vang singkhui chili ningyāng ung ngasakngai. ⁵Kala khangareo mi akhana mashun athishurda makhangareoakha, wonrui masamphangmara. ⁶Panglāk eina ot kasā luikhavā china heiunwui sharuk chi rida samphangphalungra. ⁷Ina kahāngkahai chili chukkhamaja̱lu, kaja Prohona nali ot saikorali theishingkakhui mira.

⁸Iwui paokaphāli hāngkahai athishurda, kathiwui eina ringlui kahai Davidwui ara̱-azā Jishu Khristali phaningunglu, ⁹chiwui vang ina ain kakai mi thāda khalaphaida kachotkachāng phungda lei. Kha ithumwui Avāwui tui chi khalaphai maleimana! ¹⁰Chiwui vang eina, kapang kahaibingwui vang, ina ot saikora khānga; chieina athumnala Khrista Jishuli khalei huikhami, katang makhavai tekhamatei eina ngasoda, samphangra. ¹¹Hi khuisangkapai chānsamna: Ithumna ali ngasoda thihaiakha, ithumnala ali ngasoda ringra; ¹²Ithumna khāngtheiakha, ithumnala ali ngasoda mungra; ithumna ali makhamayāakha, anala ithumli mamayāmara; ¹³Ithum mashitsangkapaiakha, a shitsangkapai leichinga, kaja ana akhalatta makhamayā masārarmana.

Avāna Khuisangkapai Ot Kasā Akha

¹⁴Tuibing hi athumli phaningung ngasaklu, kala tui eina makharar khavai ithumwui Avāwui mangāli athumli machinlu. Chi khikha kānkhanā maleimana, kala kashābingli shaipama.

¹⁵Nakhalatta ithumwui Avāli khuisangkapai ot kasā, khayak makhalei, khamashung tui chi mashun eina ngateida chigatchao khavai kashap eina tangda sālu. ¹⁶Kha khamakhao tui kala mangkhama̱wui ngaphat-ngayāt chili mazangalu; kaja china mibingli makhayāli latluida thānvai, ¹⁷kala athumwui tui chi ahuili kazam natsu thāda ngayaovaira. Athumwui ngachaili Hymenaeus eina Philetusla zanga, ¹⁸khamashungwui eina horhailaklaga, ringkhalui chi arui shokkahaina da hānglaga, mi kaikhawui shitkasang chi shimān ngasaka. ¹⁹Kha ithumwui Avāwui shimphunga ngatar chi nganinga, khorhaida: "Ana awuibingli thei," kala "Awui ming hokhui mi saikorana makaphā horhairanu."

²⁰Shim kahakva akhali sinā kala lupāsāwui khorkhongmāng maningla, thingwui kala leikhonwui khorkhongla lei. Kaikha aman kasaka vangna, kaikha kapaiya vangna. ²¹Chiwui vang eina, kachikathāna hibingwui eina ala tharngasakakha, ana aman kasaka khorkhong akha sāhaora. Ana kathara, Akhavāli kānnai, kala kaphā ot saikora sākhavai ngarānhai.

²²Ara̱kuiwui ningkachāng chi masaalu; khamashung khangarong, shitkasang, leikashi, kala chingri kahai chi, kathara wuklung eina Proholi ngakao mibingli ngasoda phālu. ²³Mangkhama̱ kala matheithangkhamei ngaphat khangarokli mazangalu; chibingna khararkhangarok thotsanga kaji nana thei. ²⁴Prohowui rao china makhararkazāra ngasāphalungra, kha mi saikorali malungkhanim khavai, tamchithei theikhavai, kala khayon sāhai tharan khāngda sākhavai ngasāra. ²⁵Ali mamayā mibingli malungkhanim eina hāngkhamachin ngasāra. Chithākha khamashung chi theikhui khavai ithumwui Avāna athumli morei ning ngatei mira, ²⁶kala athumna mashun phākhuida, awui ningkachāng sākhavai chipeena athumli tukthui kahai khalen chiwui eina yāmshoknanaira.