2 Timotheo 2

2 ¹Basi, mwanangu, jipatie nguvu katika neema iliyo ndani ya Kristo Yesu. ²Na yale uliyoyasikia kutoka kwangu mbele ya mashahidi wengi, uwakabidhi watu waaminifu watakaoweza kuwafundisha wengine pia. ³Chukua fungu lako la mateso kama askari mwema wa Kristo Yesu. ⁴Hakuna askari aliye kazini ajishughulishaye na mambo ya maisha ya kawaida—anataka kumpendeza yule aliyemwandika. ⁵Na mwanamichezo hatajwi taji asiposhindana kwa kufuata kanuni. ⁶Mkulima anayefanya kazi kwa bidii ndiye anayestahili kuwa wa kwanza kupata fungu la mazao. ⁷Fikiri juu ya hayo ninayosema, kwa maana Bwana atakupa ufahamu katika kila jambo.

⁸Mkumbuke Yesu Kristo, aliyefufuka kutoka kwa wafu, mzao wa Daudi, kama isemavyo injili yangu, ⁹ambayo kwa ajili yake ninateseka, nikiwa nimefungwa minyororo kama mhalifu. Lakini neno la Baba yetu halikufungwa! ¹⁰Kwa hiyo ninavumilia kila kitu kwa ajili ya wateule, ili wao nao wapate wokovu ulio katika Kristo Yesu, pamoja na utukufu wa milele. ¹¹Neno hili ni la kuaminika: Ikiwa tumekufa pamoja naye, tutaishi pia pamoja naye; ¹²tukivumilia, tutatawala pia pamoja naye; tukimkana, yeye pia atatukana; ¹³tusipokuwa waaminifu, yeye hudumu kuwa mwaminifu, kwa maana hawezi kujikana mwenyewe.

Mtenda Kazi Aliyekubaliwa na Baba

¹⁴Wakumbushe mambo haya, na uwaonye mbele ya Baba yetu wasibishane juu ya maneno—jambo lisilo na faida, nalo huwaharibu wale wasikiao.

¹⁵Jitahidi kujionyesha mbele ya Baba yetu ukiwa umekubaliwa, mtenda kazi asiye na sababu ya kuona haya, ukilitumia vema neno la kweli. ¹⁶Lakini jiepushe na maneno matupu yasiyo ya kumcha Mungu; huwaingiza watu zaidi katika uovu, ¹⁷na maneno yao yataenea kama donda ndugu. Miongoni mwao wamo Himenayo na Fileto, ¹⁸waliopotoka mbali na kweli, wakidai kwamba ufufuo umekwisha kutokea, nao wanaipindua imani ya watu kadhaa. ¹⁹Lakini msingi imara wa Baba yetu unasimama, ukiwa umetiwa muhuri: "Bwana anawajua walio wake," na "Kila aliitajaye jina lake na aache uovu."

²⁰Katika nyumba kubwa hakuna vyombo vya dhahabu na fedha tu, bali pia vya mti na vya udongo—vingine kwa heshima, vingine kwa aibu. ²¹Basi mtu akijitakasa na haya, atakuwa chombo cha heshima: kilicho kitakatifu, chenye faida kwa Bwana, kilicho tayari kwa kila kazi njema.

²²Kimbia tamaa za ujana; fuatilia haki, imani, upendo, na amani pamoja na wale wamwitao Bwana kwa moyo safi. ²³Usijihusishe na maswali ya kipumbavu na yasiyo na maarifa; wajua ya kuwa huzaa magomvi. ²⁴Mtumishi wa Bwana haipasi kuwa mgomvi, bali kuwa mpole kwa watu wote, awezaye kufundisha, mvumilivu anapotendewa mabaya, ²⁵akiwaonya kwa upole wale wampingao. Huenda Baba yetu atawajalia toba ili wapate kuijua kweli, ²⁶nao wapate kuzinduka, wakiuepuka mtego wa ibilisi ambaye amewateka mateka ili wafanye mapenzi yake.