2 Timotheo 1

1 ¹Paulo, mtume wa Kristo Yesu kwa mapenzi ya Baba yetu, kwa ahadi ya uzima ulio katika Kristo Yesu, ²kwa Timotheo, mwanangu mpendwa: Neema, rehema, na amani kutoka kwa Baba yetu na Kristo Yesu Bwana wetu.

Chochea Moto Ambao Baba Yetu Alikupa

³Namshukuru Baba yetu, ninayemtumikia kwa dhamiri safi kama walivyofanya baba zangu, nikikukumbuka daima katika maombi yangu, usiku na mchana. ⁴Nikikumbuka machozi yako, ninatamani sana kukuona, ili nipate kujazwa furaha. ⁵Naikumbuka imani yako ya kweli—iliyokuwa hai kwanza katika nyanya yako Loisi na mama yako Yunike, na sasa, nina hakika, ndani yako pia.

⁶Kwa hiyo nakukumbusha uuchochee uwe moto kipawa cha Baba yetu kilicho ndani yako, kwa kuwekewa mikono yangu. ⁷Kwa maana Baba yetu hakutupa roho ya woga, bali Roho ya nguvu, ya upendo, na ya kiasi. ⁸Kwa hiyo usionee haya ushuhuda wa Bwana wetu, wala usinionee haya mimi mfungwa wake, bali ushiriki mateso kwa ajili ya injili kwa nguvu za Baba yetu. ⁹Yeye alituokoa na kutuita kwa wito mtakatifu, si kwa matendo yetu bali kwa kusudi lake mwenyewe na neema yake, tuliyopewa katika Kristo Yesu kabla ya wakati kuanza, ¹⁰na sasa imefunuliwa kwa kudhihirika kwa Mwokozi wetu Kristo Yesu, aliyeuangamiza mauti na kuuangazia uzima na kutokufa kwa njia ya injili. ¹¹Kwa ajili ya injili hii niliwekwa kuwa mhubiri na mtume na mwalimu. ¹²Ndiyo maana ninateswa hivi. Lakini sionei haya, kwa maana namjua yeye niliyemwamini, nami nina hakika kwamba aweza kukilinda kile nilichokabidhiwa hata siku ile atakapokuja.

¹³Shika kielelezo cha maneno yenye afya uliyoyasikia kwangu, katika imani na upendo ulio katika Kristo Yesu. ¹⁴Kilinde kile kitu chema kilichokabidhiwa kwako, kwa njia ya Roho Mtakatifu akaaye ndani yetu.

¹⁵Unajua jambo hili: kila mtu katika jimbo la Asia aliniacha, wakiwemo Figelo na Hermogene. ¹⁶Bwana wetu Yesu na aijalie rehema nyumba ya Onesiforo, kwa maana mara nyingi aliniburudisha wala hakuionea haya minyororo yangu. ¹⁷Bali, alipofika Rumi alinitafuta kwa bidii hata akanipata. ¹⁸Bwana wetu Yesu na amjalie apate rehema kutoka kwa Bwana siku ile. Nawe unajua vyema jinsi alivyotumika sana huko Efeso.