Paul pora Timothy ke likhi ase

Mori bole usorte thaka somoi likha Paul laga hekh chithi, Timothy ke kaam laga mosal di kene kotha prochar kori bole hukum di ase.

Adhyay 1.

Amar Pitri laga itcha pora Khrista Jisu laga apostle hoa Paul, Khrista Jisu te thaka jivon laga vachan anusar te, moi laga morom laga bacha Timothy ke: Amar Pitri aru amar Prabhu Khrista Jisu pora anugrah, doya aru shanti tumi logot thakibi.

Amar Pitri pora tumi ke diya jui tu jolai dibi

Moi laga purbo-pitri khan pora kora nisena, sapha bibek logot Moi sewa kora amar Pitri ke, rati aru din moi laga prathana khan te tumi ke hodai yaad kori kene, moi dhanyabad di ase. Tumar suku-pani khan yaad kori kene, moi khushi pora bhorta hobole, tumi ke dikhibole moi bisi mon ase. Tumar hosa biswas tu moi yaad kori ase—prothom te tumar aji Lois aru ama Eunice te jinda thakise, aru etiya, tumi te bhi ase koi kene moi biswas kori ase.

Etu nimite moi laga hath rakhi diya pora tumi te thaka amar Pitri laga uphar tu jolai dibole, moi tumi ke yaad kori di ase. Kilemane amar Pitri pora amikhan ke bhoi laga atma dia nai, kintu takot, morom aru nijor ke rukhabole para laga Atma dise. Etu nimite amar Prabhu laga gawahi nimite, aru Tar bondhi-manuh moi nimite sorom na-koribi, kintu amar Pitri laga takot pora susamachar nimite dukh bhag loi lobi. Tai amikhan ke bachai kene pobitro mati pora matise, amikhan laga kaam pora nohoi kintu Tar nijor itcha aru anugrah pora, juntu homoi shuru huwa age te Khrista Jisu te amikhan ke dise, aru etiya amar Trankorta Khrista Jisu ulai aha pora etu janai dise, Tai pora mrityu tu khotom korise aru susamachar pora jivon aru namora jinis tu ujala korise. Etu susamachar nimite moi ke prachar-korta aru apostle aru hikhok bona hoise. Etu karone moi eneka dukh pai ase. Kintu moi sorom nakore, kilemane moi kun ke biswas korise moi jane, aru Tai wapas aha din tak moi ke di diya jinis tu rukhabo pare koi kene moi biswas kori ase.

Moi pora tumi huna sapha kotha laga niyom tu, Khrista Jisu te biswas aru morom logot dhori rakhibi. Amikhan bhitor te thaka Pobitro Atma pora, tumi ke di diya bhal jinis tu rukhi rakhibi.

Eitu tumi jane: Asia desh laga sob manuh, Phygelus aru Hermogenes bhi, moi pora ghuri jaise. Amar Prabhu Jisu pora Onesiphorus laga ghor manuh khan ke doya dibi, kilemane tai bar-bar moi ke aram dise aru moi laga sikal nimite sorom kora nai. Ulta te, tai Rome te ponchi kene moi ke napua tak mon diye kene moi ke bisarise. Amar Prabhu Jisu pora, hei din te tai Prabhu pora doya pabole dibi. Ephesus te tai kiman sewa korise, tumi bhal pora jane.