2 Timothy 1

1 ¹Ithumwui Avāwui kaphaning athishurda, Khrista Jishuli khalei kharing ngashitmi kahai athishurda, Khrista Jishuwui paokazata Paul ina, ²iwui leikashiya nao Timothyli: Ithumwui Avā kala ithumwui Proho Khrista Jishuwui eina lukhamashan, phaningkhami, kala chingri kahai nali ngasomiranu.

Ithumwui Avāna Mikahai Sokhami chi Meiwon thāda Chuikatā Ngasaklu

³Iwui avā ngarā thāda tharzā kahai mashun-makhui eina otram khangatha̱ ithumwui Avāli ina ningshi, iwui seihā kasāli ngashun ngayā nali khamalai masāla phaningungchinga. ⁴Nawui chāra̱ phaningungda, khamathānna pemtinghai khavai ina nali yangkhavai ngayilaka. ⁵Nawui kachangkhatwui shitkasang chi ina phaningunga. Chi rida nashāyi Lois kala nawui ava̱ Eunicewuilungli leilakha, kala ara nalila lei da ina shitsangchaowa.

⁶Chiwui vang eina ina nali phaningung ngasakna, iwui pāng parkharor eina nawuitungli khalei ithumwui Avāwui sokhami chi meiwon thāda chuikatā ngasaklu. ⁷Khikhalajila ithumwui Avāna ithumli khangacheewui manglā mamimana, kha pangshapwui, leikashiwui, kala khalatta khangarinwui Manglā chi ithumli mihaira. ⁸Chiwui vang eina ithumwui Prohowui shākhili makhayakalu, awui phātopli zangkasā ilila makhayakalu, kha ithumwui Avāwui pangshap eina paokaphāwui vang kachotkachāng phungrumlu. ⁹Ana ithumli huikhuida kala kathara kaho eina hokhui, hi ithumwui ot kasana maningla, kha awui khalattawui kharin kala lukhamashan eina, chi atam haokaphok masāranglakha eina thuida Khrista Jishuli ithumli mikahaina. ¹⁰kala ara chi ithumwui Huikhame Khrista Jishuwui rāthang eina chitheihaira, ana kathili sāshimānda, paokaphāwui mangā eina kharing kala kathi makhavai chi kahorli khuishokhaira. ¹¹Hi paokaphāwui vang ili paokaphā hākashok, paokazata, kala ojā sāda chihovai. ¹²Chiwui vang eina ina hithāda kachotkachāng phunga. Kha ina makhayakmana, kaja ina khipāli shitsanghaira kaji ina thei, kala ana hankhaung zimiksho eina tangda ili horsang kahai chi ngākshap da ina shitsangchaowa.

¹³Khrista Jishuli khalei shitkasang kala leikashi eina, nana iwui eina kashā khamathā tuibingwui acham chi singtitmalu. ¹⁴Ithumwuilungli mungda khalei Manglā Kathara eina, nawuitungli mikahai kaphā samkaphang chi mayonlu.

¹⁵Hi nana thei: Asia ngaleili khalei mi saikorana iwui eina thuihaira, athumwui ngachaili Phygelus eina Hermogenesla zanga. ¹⁶Ithumwui Proho Jishuna Onesiphoruswui shimkhurli phaningkhami miranu, kaja ana ra̱ra̱ iwui ning ringphā ngasakhaowa, kala iwui mari khanghuili makhayakmana. ¹⁷Chithālala, ana Romeli vākashung tharan, ili samphangranglakha eina tangda panglāk eina ili phākhui. ¹⁸Proho Jishuna chithang zimiksholi Prohowui eina phaningkhami samphang khavai ali ngasomiranu. Ephesusli ana kayākha otram ngatha̱khala kaji nana thatheihaira.