2 Timothy 1

1 ¹Paul, apostle of Christ Jesus through di wish of our Papa, through di promise of life wey dey inside Christ Jesus, ²to Timothy, my pikin wey I love well-well: Make grace, mercy, and peace from our Papa and Christ Jesus our Oga dey with you.

Blow di Fire wey our Papa Give You

³I dey thank our Papa, wey I dey serve with clean mind like as my great-grandpapa dem take do, as I dey remember you every time for my prayer, night and day. ⁴As I dey remember your tears, I dey hungry to see you, so dat joy go full my belle. ⁵I remember your true-true faith—wey first dey live inside your grandma Lois and your mama Eunice, and now, I sure say e dey inside you too.

⁶So I dey remind you make you blow di gift wey our Papa put inside you make e turn fire, through di hand wey I take lay on top you. ⁷Because our Papa no give us spirit of fear, but di Spirit of power, love, and to hold body. ⁸So no make shame catch you about di testimony of our Oga, or about me wey be im prisoner, but join hand suffer for di gospel through di power of our Papa. ⁹Na im save us and call us with holy calling, no be because of di work wey we do but because of im own plan and grace, wey e give us inside Christ Jesus before time even start, ¹⁰and now e don show am clear through di coming of our Savior Christ Jesus, wey put end to death and shine light on life and life wey no dey die, through di gospel. ¹¹Na for dis gospel dem choose me make I be preacher and apostle and teacher. ¹²Na im make I dey suffer like dis. But shame no dey catch me, because I know di One wey I don believe, and I sure say e fit guard wetin e give me hold until di day wey e go come back.

¹³Hold di pattern of correct words wey you hear from me, inside faith and love wey dey inside Christ Jesus. ¹⁴Guard di good thing wey dem give you hold, through the Holy Spirit wey dey live inside us.

¹⁵You know dis one: everybody for di province of Asia turn dem back give me, including Phygelus and Hermogenes. ¹⁶Make our Oga Jesus show mercy to di house of Onesiphorus, because e dey always make my body fresh and shame no catch am about my chain. ¹⁷Instead, wen e reach Rome, e take strong mind find me until e see me. ¹⁸Make our Oga Jesus grant say e go find mercy from di Oga for dat day. You sabi well-well how much e take serve for Ephesus.