1 1 पौल, आमच्या पित्याच्या इच्छेने ख्रिस्त येशूचा प्रेषित, ख्रिस्त येशूमधील जीवनाच्या अभिवचनानुसार, 2 माझ्या प्रिय मुला तीमथ्याला: आमचा पिता आणि आपला प्रभु ख्रिस्त येशू यांच्याकडून कृपा, दया व शांती.
आमच्या पित्याने दिलेली ज्योत फुलवा
3 माझ्या पूर्वजांप्रमाणे शुद्ध विवेकाने ज्याची मी सेवा करतो, त्या आमच्या पित्याचे मी आभार मानतो; रात्रंदिवस माझ्या प्रार्थनांमध्ये मी तुझी सतत आठवण करतो. 4 तुझ्या अश्रूंची आठवण करून, मी तुला भेटण्याची उत्कंठा धरतो, यासाठी की मी आनंदाने भरून जावे. 5 तुझ्या निर्मळ विश्वासाची मला आठवण होते—जो प्रथम तुझी आजी लोइस व तुझी आई युनीके यांच्यामध्ये जिवंत होता, आणि आता, माझी खात्री आहे की, तुझ्यामध्येही आहे.
6 म्हणून मी तुला आठवण करून देतो की, माझ्या हात ठेवण्याद्वारे तुझ्यामध्ये असलेले आमच्या पित्याचे दान ज्योतीसारखे फुलव. 7 कारण आमच्या पित्याने आपल्याला भीतीचा आत्मा दिला नाही, तर सामर्थ्याचा, प्रीतीचा व संयमाचा आत्मा दिला. 8 म्हणून आपल्या प्रभूच्या साक्षीची लाज धरू नकोस, किंवा त्याचा बंदिवान म्हणून माझीही लाज धरू नकोस, तर आमच्या पित्याच्या सामर्थ्याने सुवार्तेसाठी दुःखाचा वाटा उचल. 9 त्याने आपले तारण केले व पवित्र पाचारणाने आपल्याला बोलावले, आपल्या कर्मांमुळे नव्हे, तर त्याच्या स्वतःच्या हेतूने व कृपेने, जी काळाच्या आरंभापूर्वी ख्रिस्त येशूमध्ये आपल्याला दिली गेली. 10 आणि आता आपला तारणारा ख्रिस्त येशू याच्या प्रकट होण्याद्वारे ती प्रकट झाली; त्याने मृत्यूचा नाश केला आणि सुवार्तेद्वारे जीवन व अमरत्व प्रकाशात आणले. 11 या सुवार्तेसाठी मला उपदेशक, प्रेषित व शिक्षक म्हणून नेमण्यात आले. 12 याच कारणामुळे मी असे दुःख सोसतो. तरी मला लाज वाटत नाही, कारण ज्याच्यावर मी विश्वास ठेवला आहे त्याला मी ओळखतो, आणि माझी खात्री आहे की, तो परत येण्याच्या दिवसापर्यंत माझ्याकडे सोपवलेले जपून ठेवण्यास तो समर्थ आहे.
13 जी सुवचने तू माझ्याकडून ऐकलीस त्यांचा नमुना, ख्रिस्त येशूमधील विश्वासाने व प्रीतीने धरून ठेव. 14 आपल्यामध्ये राहणाऱ्या पवित्र आत्म्याद्वारे, तुझ्याकडे सोपवलेली उत्तम ठेव जपून ठेव.
15 तुला हे माहीत आहे: आशियातील सर्वांनी माझ्यापासून तोंड फिरवले, त्यांत फुगल व हर्मगनेस हेही आहेत. 16 आपला प्रभु येशू अनेसिफरच्या घराण्यावर दया करो, कारण त्याने पुष्कळ वेळा मला ताजेतवाने केले आणि माझ्या साखळ्यांची लाज धरली नाही. 17 उलट, तो रोममध्ये आल्यावर मला सापडेपर्यंत त्याने आस्थेने माझा शोध घेतला. 18 आपला प्रभु येशू असे करो की, त्या दिवशी त्याला प्रभूकडून दया मिळो. इफिसात त्याने किती सेवा केली हे तुला चांगले माहीत आहे.
