2 KuThimothewu 1

1 ¹UPawulu, umphostoli kaKhristu uJesu ngentando kaBaba wethu, ngesithembiso sokuphila okukuKhristu uJesu, ²kuThimothewu, mntanami othandekayo: Umusa, isihawu, nokuthula okuvela kuBaba wethu nakuKhristu uJesu iNkosi yethu.

Vuselela Ilangabi uBaba Wethu Akunike Lona

³Ngibonga uBaba wethu, engimkhonza nganembeza ohlanzekileyo njengokhokho bami, ngikukhumbula njalo emikhulekweni yami, ebusuku nasemini. ⁴Ngikhumbula izinyembezi zakho, ngilangazelela ukukubona, ukuze ngigcwaliswe ngenjabulo. ⁵Ngikhumbula ukholo lwakho olungenakuzenzisa—olwaqala lwaphila kugogo wakho uLowisi nakunyoko u-Yunike, manje nginesiqiniseko sokuthi lukhona nakuwe.

⁶Ngakho ngiyakukhumbuza ukuba uvuselele ube yilangabi isipho sikaBaba wethu esikuwe, ngokubekwa kwezandla zami. ⁷Ngokuba uBaba wethu akasinikanga umoya wokwesaba, kodwa uMoya wamandla, nowothando, nowokuzithiba. ⁸Ngakho ungabi namahloni ngobufakazi beNkosi yethu, nangami isiboshwa sayo, kodwa hlanganyela ekuhluphekeni ngenxa yevangeli ngamandla kaBaba wethu. ⁹Wasisindisa wasibiza ngobizo olungcwele, hhayi ngenxa yemisebenzi yethu kodwa ngenxa yenjongo yakhe neyomusa wakhe, esasiwuphiwa kuKhristu uJesu singakaqali isikhathi, ¹⁰manje osekwaziswa ngokubonakala koMsindisi wethu uKhristu uJesu, owaqeda ukufa wakhanyisa ukuphila nokungafi ngevangeli. ¹¹Ngenxa yaleli vangeli ngamiswa ukuba ngibe ngumshumayeli nomphostoli nomfundisi. ¹²Yingakho ngihlupheka kanje. Kodwa anginamahloni, ngokuba ngiyamazi lowo engimkholwayo, futhi nginesiqiniseko sokuthi unamandla okulondoloza lokho engikuphathisiweyo kuze kube yilolo suku abuya ngalo.

¹³Bambelela esibonelweni samazwi aphilile owawezwa kimi, ngokholo nangothando olukuKhristu uJesu. ¹⁴Londoloza into enhle oyiphathisiweyo, ngoMoya oNgcwele ohlala ngaphakathi kwethu.

¹⁵Uyakwazi lokhu: bonke abasesifundeni sase-Asiya bangifulathela, kuhlanganisa uFigelu noHermogene. ¹⁶Sengathi iNkosi yethu uJesu ingayipha isihawu indlu ka-Onesiforu, ngokuba wayevame ukungiqabula futhi engabi namahloni ngamaketanga ami. ¹⁷Kunalokho, lapho efika eRoma wangifunisisa ngenkuthalo waze wangithola. ¹⁸Sengathi iNkosi yethu uJesu ingamnika ukuba athole isihawu eNkosini ngalolo suku. Uyakwazi kahle kakhulu ukuthi wakhonza kangakanani e-Efesu.