Me basika na mukanda
Dibuku

Polo ke sonikina Timote

Mukanda ya nsuka ya Polo, yina yandi sonikaka pene-pene ya lufwa, ke pesa kisalu ya yandi na Timote mpe ke pesa yandi ntumunu na kuzabisa mambu ya Nzambi.

Kapu 1.

Ni munu Polo, ntumwa ya Yesu-Klisto mutindu Tata ya beto zolaka, samu na nsilulu ya luzingu yina kele na Yesu-Klisto, na Timote, mwana ya munu ya luzolo: Bika ti Tata ya beto mpe Yesu-Klisto Mfumu ya beto kupesa nge bumbote, kyadi, mpe kizunu.

Pelisa tiya yina Tata ya beto pesaka nge

Mu ke vutula matondo na Tata ya beto, yina mu ke sadilaka na ntima ya kukuluka mutindu bankooko ya munu salaka, na kutanguna nge konso ntangu na kati ya balusambulu ya munu, mpimpa na mwini. Na kutanguna mansangasa ya nge, mu kele na nsatu ya kumona nge, samu ti mu fuluka na kyese. Mu ke bambuka moyo na kiminu ya nge ya kukuluka—kiminu yina vwandaka moyo ntete na nkaka ya nge Loisi mpe na mama ya nge Enise, mpe ntangu yayi, mu ke na kivuvu ti, yawu kele mpe na kati ya nge.

Ni yawu yina, mu ke bambula nge moyo na kupelisa dyaka tiya ya dikabu ya Tata ya beto yina kele na kati ya nge, na nzila ya kutula maboko ya munu. Samu ti Tata ya beto pesaka beto ve mpeve ya boma, kasi Mpeve ya ngolo, ya luzolo, mpe ya kuyala nzutu ya beto mosi. Ni yawu yina, kuvwanda na nsoni ve na kimbangi ya Mfumu ya beto, mpe na munu, muntu ya boloko ya yandi, kasi tala mpasi kintwadi samu na Nsangu ya Mbote na lulendo ya Tata ya beto. Yandi vuukisaka beto mpe bokilaka beto na mbokilu ya longo, na bisalu ya beto mosi ve, kasi na lukanu ya yandi mosi mpe na bumbote ya yandi, yina yandi pesaka beto na Yesu-Klisto na ntwala ya luyantiku ya ntangu, mpe ntangu yayi, yandi me zabisa yawu na nzila ya kumonikina ya Muvuukisi ya beto Yesu-Klisto, yina manisaka lufwa, mpe pesaka nsemo na luzingu mpe na kukonda lufwa na nzila ya Nsangu ya Mbote. Samu na Nsangu ya Mbote yayi, ba soolaka munu samu na kuvwanda muntu ya kuzabisa Nsangu ya Mbote, ntumwa, mpe mulongisi. Ni yawu yina mu ke tala mpasi mutindu yayi. Kasi mu kele na nsoni ve, samu ti mu zaba muntu yina mu kwikilaka, mpe mu ke na kivuvu ti yandi lenda kukeba kima yina ba pesaka munu tii na kilumbu yina yandi ke vutuka.

Simba kifwani ya bangogo ya mbote yina nge waka na munu, na kiminu mpe na luzolo yina kele na Yesu-Klisto. Keba kima ya mbote yina ba pesaka nge, na nzila ya Mpeve ya Longo yina ke zinga na kati ya beto.

Nge zaba yawu: bantu nyonso ya kizunga ya Aziya me yambula munu, kintwadi na Fizele mpe Elemozene. Bika ti Mfumu ya beto Yesu pesa kyadi na dibuta ya Onesifole, samu ti yandi katulaka munu kyadi bambala mingi mpe vwandaka na nsoni ve na basinga ya munu. Kasi, ntangu yandi kumaka na Loma, yandi sosaka munu na ngolo nyonso tii yandi kuzwaka munu. Bika ti Mfumu ya beto Yesu pesa yandi nswa ya kuzwa kyadi na Mfumu na kilumbu yina. Nge zaba mbote-mbote mutindu yandi sadilaka mingi na Efezo.