دوېم تيموتيوس 1 FHB Father's Heart Bible™

1 ¹زۀ پولوس، د زمونږ پلار په رضا سره د مسيح عيسىٰ رسول، د هغه ژوندون د وعدې مطابق چې په مسيح عيسىٰ کښې دے، ²تيموتيُس ته، زما ګران بچى. دې دپاره چې د زمونږ پلار او زمونږ د مالِک مسيح عيسىٰ له خوا فضل، رحم او سلامتى درباندې وى.

هغه اور چې زمونږ پلار درکړے دے، تازه ساتۀ

³زۀ د زمونږ پلار شکر ادا کوم، چې زۀ د خپلو مشرانو په شان په صاف ضمير سره د هغۀ عبادت کوم، او شپه او ورځ په خپلو دُعاګانو کښې تۀ تل يادوم. ⁴ستا اوښکې يادوم او زۀ ستا د ليدو ارمان لرم، دې دپاره چې زۀ په خوشحالۍ ډک شم. ⁵زۀ ستا هغه خالص ايمان يادوم چې اول ستا په انا لوئيس او ستا په مور يُونيکې کښې ژوندے وو، او اوس زۀ يقين لرم چې تا کښې هم دے.

⁶نو زۀ تا له يادونه کوم چې د زمونږ پلار هغه نعمت چې زما د لاسونو په ايښودلو سره تا کښې دے، هغه د اور په شان تازه وساته. ⁷ځکه چې زمونږ پلار مونږ ته د ويرې روح نۀ دے راکړے، بلکې د قوت، د مينې او د ضبط روح يې راکړے دے. ⁸نو زمونږ د مالِک د ګواهۍ نه مۀ شرميږه، او نۀ زما نه چې د هغۀ قيدى يم، بلکې د زمونږ پلار د قوت په وسيله د اِنجيل دپاره په تکليفونو کښې شريک شه. ⁹هغۀ مونږ خلاص کړو او په يو پاک بلنه يې راوبللو، نۀ زمونږ د کارونو په سبب بلکې د خپل مقصد او فضل په سبب، چې مونږ ته د ازل نه مخکښې په مسيح عيسىٰ کښې راکړے شوے وو، ¹⁰او اوس زمونږ د خلاصونکى مسيح عيسىٰ د راڅرګندېدو په وسيله څرګند شو، چې هغۀ مرګ ختم کړو او د اِنجيل په وسيله يې ژوندون او بقا رڼا کړل. ¹¹د دې اِنجيل دپاره زۀ مُناد، رسول او اُستاذ مقرر شوم. ¹²ځکه زۀ دا تکليفونه ګالم. خو زۀ نۀ شرميږم، ځکه چې زۀ پوهيږم چې په چا مې ايمان راوړے دے، او يقين لرم چې هغه کولے شى زما سپارل شوے امانت تر هغې ورځې پورې وساتى چې هغه بيا راشى.

¹³د روغو خبرو هغه نمونه چې تا زما نه اورېدلې ده، هغه په مسيح عيسىٰ کښې په ايمان او مينه سره ټينګه ونيسه. ¹⁴هغه ښۀ امانت چې تا ته سپارلے شوے دے، هغه د روحُ القُدس په وسيله وساته چې زمونږ دننه اوسيږى.

¹⁵تۀ دا پوهيږې چې د آسيا په صوبه کښې ټول زما نه مخ واړولو، چې په هغوئ کښې فيګيلُس او هرمُوجينِس هم دى. ¹⁶زمونږ مالِک عيسىٰ دې د اُنِيسيفورُس کور باندې رحم وکړى، ځکه چې هغۀ زۀ اکثر تازه کولم او زما د زنځيرونو نه نۀ شرمېدلو، ¹⁷بلکې کله چې هغه رووم ته راغلو نو زما ډېر په شوق سره لټون يې وکړو، تر هغې چې زۀ يې وموندلم. ¹⁸زمونږ مالِک عيسىٰ دې دا ورکړى چې هغه په هغه ورځ د مالِک له خوا رحم ومومى. تۀ ښۀ پوهيږې چې هغۀ په اِفسُس کښې څومره خدمت کړے دے.