2 Timoti 1 FHB Father's Heart Bible™

1 ¹Paulu, mpostolo wa Kirixtu Yezu mwa kufuna kwa Baba wathu, mwakubverana na pikiro ya umaso uli mwa Kirixtu Yezu, ²kuna Timoti, mwananga wakufunika: Kukoma ntima, ntsisi, na ntendere kubuluka kuna Baba wathu na Kirixtu Yezu Mbuya wathu.

Pfutumusa Moto Udakupasani Baba Wathu

³Ndisapereka takhuta kuna Baba wathu, ule ndisantumikira na cikumbuntima cakucena ninga mukhacitira ambuya anga, mbandikukumbukani n'dzidzi onsene m'maphembero anga, masiku na masikati. ⁴Mukukumbuka misozi yanu, ndisafunisisa kukuonani, toera ndidzale na kutsandzaya. ⁵Ndisakumbuka cikhulupiro canu cadidi—cikhali maso pakutoma mwa yavu wanu Loisi na mai wanu Yunise, na cincino, ndanyindira kuti ciri na imwe pontho.

⁶Natenepa ndisakukumbusani toera mupfutumuse muoni wa Baba wathu uli muna imwe, kubulukira mu kukutsamikirani manja anga. ⁷Thangwi Baba wathu nee adatipasa nzimu wa kugopa tayu, mbwenye Nzimu wa mphambvu, kufuna, na kulibata ekha. ⁸Natenepa lekani kupaswa manyadzo na umboni wa Mbuya wathu, nee na ine nkaidi wace, mbwenye gawanani nthabwa thangwi ya Mphangwa Zadidi mwa mphambvu ya Baba wathu. ⁹Iye adatipulumusa mbaticemera na kucemerwa kwakucena, tayu thangwi ya mabasa athu, mbwenye thangwi ya cifuno cace ekha na kukoma ntima, kudatipasa mwa Kirixtu Yezu n'dzidzi udzati kutoma, ¹⁰mbwenye cincino cadziwika kubulukira mu kuonekera kwa Mpulumusi wathu Kirixtu Yezu, ule adamalisa kufa mbaceneza umaso na kukhonda kufa kubulukira mu Mphangwa Zadidi. ¹¹Thangwi ya Mphangwa Zadidi izi ine ndasankhulwa kukhala mmwazi mphangwa, mpostolo na mpfundzisi. ¹²Ndiyo thangwi yace ndisathabuka tenepa. Mbwenye nkhabe kupaswa manyadzo, thangwi ndisandziwa ule ndidankhulupira, pontho ndisanyindira kuti Iye anakwanisa kukoya pidaperekwa kuna ine mpaka ntsiku yace ya kubwerera.

¹³Phatani cisandzo ca mafala adidi adabva imwe kuna ine, mu cikhulupiro na kufuna kuli mwa Kirixtu Yezu. ¹⁴Koyani cinthu cadidi cidaikhwa kuna imwe, kubulukira mwa Nzimu Wakucena ule anakhala muna ife.

¹⁵Musadziwa ipyi: anthu onsene a ku Azya andisiya, kuphatanizambo Fidjelu na Hermojene. ¹⁶Mbuya wathu Yezu mbapase ntsisi kuna banja ya Onesiforu, thangwi kazinji kene andipumuza mbakhonda kupaswa manyadzo na maunyolo anga. ¹⁷Mbwenye, pidafika iye ku Roma, andisaka mwaphinga mpaka andigumana. ¹⁸Mbuya wathu Yezu mbacitise toera iye agumane ntsisi kuna Mbuya pa ntsiku ineyi. Imwe musadziwa mwadidi kakamwe momwe iye adatumikira ku Efesu.